Gicumbi: Uruganda rwa PEMBE rugura ingano mu mahanga izera mu Rwanda zabuze isoko

Yanditswe na IGIHE
Kuya 12 Kamena 2019 saa 09:47
Yasuwe :
0 0

Abahinzi b’ingano bo mu Karere ka Gicumbi, baravuga ko bari mu gihombo baterwa nuko umusaruro wabo ubura abaguzi kuko uruganda rwa PEMBE, rukora ifarini rugura izo hanze y’u Rwanda, ruvuga ko arizo zihendutse kandi zujuje ubuziranenge.

Mu mirenge 16 kuri 21 yo mu Karere ka Gicumbi, hera toni ziri hagati y’ibihumbi 16 n’ibihumbi 19 by’ingano buri mwaka. Uyu musaruro ariko ngo nta soko ufite kuko usanga bamwe mu bahinzi bazigurisha n’abamamyi ku giciro gito, izindi bakazikoramo amandazi abandi bakazitekamo impengeri n’ibindi mu buryo bwa gakondo.

Ikibazo cy’umusaruro w’ingano ubura isoko, igiciro gito, imbuto itabonekera igihe n’ibindi biri mu buhinzi bw’ingano byahagurukije inzego zitandukanye zirimo Minisitiri w’Ubuhinzi, Umuyobozi w’Akarere ka Gicumbi, abahinzi hamwe n’abayobozi b’uruganda rwa PEMBE, kuri uyu wa Kabiri.

Twagirumukiza Potien, umuyobozi wa Koperative y’abahinzi b’ingano bo mu Murenge wa Cyumba, yavuze ko ubuhinzi bw’ingano bugenda busubira inyuma kubera ko nta soko bafite.

Ati “Ubaze igishoro uba washoye byakabaye byiza ko tugurisha nibura kuri 350 Frw ku kilo, uzijyana ku ruganda rwa PEMBE bakaguha 280 FRW cyangwa 300 FRW ku kilo bikaduhombya”.

Avuga ko ikindi kibazo bafite ari uko hari igihe uruganda rwa PEMBE rubabwira ko imbuto bahinze itemewe rukanga kubagurira kubera ko rufite aho ruzigura hanze.

Abahinzi bemera ko bafite ubumenyi bucye mu bijyanye no gukoresha ifumbire uko bikwiye bagasaba Minagri kubahugura kugira ngo bamenye gukoresha ifumbire mvaruganda ndetse n’ifumbire y’imborera mu buryo bugezweho bityo umusaruro ube mwishi kandi mwiza.

Hafi 100% by’ingano uruganda rwa PEMBE rukoramo ifarini ruzigura hanze

Umuyobozi ushinzwe umutungo mu ruganda rwa PEMBE, Hakim Willy, avuga ko uru ruganda rwatangiye gukorera mu Karere ka Gicumbi mu mwaka wa 2007 kugeza mu 2011 bakaba baraguraga ingano z’abaturage ariko ngo ntabwo zari ubwoko bwiza.

Ati “Ingano z’abaturage zabaga zifite proteyine n’ibindi bikenerwa biri hasi zitujuje ubuziranenge, ariko kubera ko twabaga dufite izindi twakuye hanze zujuje ubuziranenge tukazivanga n’izo kugira ngo tubone ifarini nziza.”

Yakomeje avuga ko nyuma y’umwaka wa 2011 bakoranye inama zitandukanye na Minagri, RAB, Minicom ndetse n’abahinzi b’ingano babagira inama yo kudakomeza guhinga mu buryo bwa gakondo ahubwo bagahinga bahingira isoko.

Ati “Uruganda rukenera toni 400 ku munsi, izo mu Rwanda tuzibonye twazikoresha ariko ntazo tubona niyo mpamvu tujya kuzigura hanze kandi izo hanze ziba ari nziza zinahendutse kurusha izo mu Rwanda […]. Hafi 100% by’ingano dukoresha tuzigura hanze mu mwaka umwe usanga dukoresha toni zirenga ibihumbi 16.”

Umuyobozi wa RAB, Dr Karangwa Patrick, avuga ko bagiye gukomeza kugira inama abahinzi yo guhinga ku buryo bugezweho.

Ati “Abo mu ruganda rwa PEMBE bavuga ko iyo bakuye ingano hanze mu bihugu nk’u Burusiya na Australie, bazigeza aha zihagaze nka 200 Frw ku kilo, bati kuki twagura iza hano kuri 300 Frw ku kilo?, ingamba twafatiye hamwe rero nuko abahinzi bakongera umusaruro kuri hegitari bakarushaho guhinga mu buryo butuma beza kugira ngo umusaruro uzamuke.”

Umurongo watanzwe na Minisitiri w’Ubuhinzi n’Ubworozi, Dr Mukeshimana Geraldine ni uko abashinzwe ubuhinzi, RAB hamwe n’abatekinisiye b’Uruganda rwa PEMBE bakwiye kwegera abaturage bakaganira ku giciro gikwiye cyatuma uruganda rwunguka kandi n’umuhinzi akunguka.

Abahinzi bavuga ko uruganda rwa Pembe rusiga ingano zabo rukajya kuzigura mu mahanga
Minisitiri w’Ubuhinzi n'Ubworozi, Dr Mukeshimana Geraldine yasabye ko abaturage begerwa bakaganirizwa ku giciro kinyuze impande zose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza