Gukoresha imbuga nkoranyambaga byamuhesheje gutsindira 100,000Frw muri ‘Hirwa Ugwize na BPR’

Yanditswe na Evariste Nsengimana
Kuya 7 Kanama 2017 saa 04:16
Yasuwe :
0 0

Nyuma yo gutangiza ubukangurambaga bwiswe ‘Hirwa Ugwize na BPR’, Banki y’Abaturage y’u Rwanda, yahembye umunyamahirwe witwa Maniraguha Albert wakoresheje kurusha abandi, imbuga nkoranyambaga mu kubumenyekanisha, igihembo kingana n’amafaranga ibihumbi 100 y’u Rwanda.

Maniraguha Albert w’imyaka 29 utuye mu Karere ka Gasabo, Umurenge wa Gatsata, yavuze ko kubera gukoresha cyane imbuga nkoranyambaga zirimo Twitter, Facebook n’izindi, yabonye ku rukuta rwa BPR, ko izahemba abanyamahirwe muri ubwo bukangurambaga, yahise atangira kubisangiza abandi no gutangaho ibitekerezo, nyuma akaza kubona yamuhisemo ko agomba guhembwa ibihumbi 100Frw.

Ygize ati “Bajyaga bashyiraho ubutumwa buvuga kuri ubu bukangurambaga, nkabusoma, nkabusangiza abandi nkanabutangaho ibitekerezo, hashize iminsi mbona banshyizeho ko ari njye wa mbere watsinze. Narishimye cyane kuko ibihumbi 100 ku muntu utagira akazi ni byinshi, nshobora kubibyaza umusaruro nkagira icyo ngeraho.”

Yakomeje asaba abantu, cyane cyane urubyiruko kubyaza umusaruro imbuga nkoranyamabaga aho kuzikoresha mu bintu bidafite umumaro.

Umuyobozi ushinzwe kureberera ibikorwa by’ubucuruzi ku bakiriya bato n’abaciriritse muri BPR, Shema Mugisha, yavuze ko kuva muri Kamena uyu mwaka, Abanyamahirwe 20 bamaze guhabwa ibihembo bitandukanye birimo televiziyo, telefone zigezweho, amagare, amafaranga n’ibindi.

Yavuze ko ubwo bukangurambaga bwatangijwe hagamijwe gukangurira abantu kugira umuco wo kubitsa.

Yakomeje avuga ko iki gikorwa cyo guhemba abanyamahirwe kizakomeza kugeza muri Nzeri 2017, aho igihembo nyamukuru kizaba miliyoni y’amanyarwanda kandi ko bigaragara ko n’abakiriya bagenda bumva akamaro ko kwizigamira.

Maniraguha Albert wahembwe ibihumbi 100, yarangije amashuri yisumbuye mu 2013, mu bijyanye no gukora amashanyarazi, i Kabgayi, kuva icyo gihe nta kazi yigeze abona. Ntiyari asanzwe ari umukiriya wa BPR, gusa akimara kubona ubwo bukangurambaga yahise afunguza konti, abitsaho n’amafaranga make yari afite, agerageza amahirwe ngo arebe ko yazamusekera.

Maniraguha Albert wahembwe ibihumbi 100 Frw
Umuyobozi ushinzwe kureberera ibikorwa by'ubucuruzi ku bakiriya bato n’abaciriritse muri BPR, Shema Mugisha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza