Guverinoma yemeye kwishyurira umusoro ibigo bishobora guhungabanywa no kuvanwa muri AGOA

Yanditswe na Evariste Nsengimana
Kuya 11 Kamena 2018 saa 12:39
Yasuwe :
0 0

Guverinoma y’u Rwanda yatangaje ko izishyurira imisoro abacuruzi b’Abanyarwanda bashobora kuzagirwaho ingaruka n’umwanzuro wa Leta Zunze Ubumwe za Amerika, wo kurukura muri gahunda ifasha ibigo bimwe kwinjiza ibicuruzwa bimwe na bimwe ku isoko ry’icyo gihugu bitatswe umusoro, AGOA.

Iyi gahunda yatangijwe na Amerika mu 2000 igamije gushyigikira ubucuruzi bw’ibihugu bitandukanye bya Afurika yo munsi y’Ubutayu bwa Sahara ngo bigeze ibicuruzwa bigera ku 6500 ku isoko ryayo bidasoreshejwe, ariko buri mwaka hagasuzumwa niba igihugu cyemererwa kuguma muri iyo gahunda.

Muri Werurwe nibwo Perezida wa Amerika, Donald Trump, yatangaje ko mu minsi 60 icyo gihugu kizahagarika u Rwanda muri AGOA, nirutisubiraho ku mwanzuro rwafashe wo kugabanya imyenda n’inkweto byambawe byinjira mu gihugu binyuze mu kubizamurira umusoro.

Iyi ni imwe mu ntambara z’ubucuruzi Perezida Trump ari kurwana n’ibihugu bitandukanye byohereza ibicuruzwa muri Amerika, aho aheruka no kuzamura imisoro ku bicuruzwa biva i Burayi, Canada no mu Bushinwa n’ahandi.

Iminsi 60 Amerika yahaye u Rwanda yashize ku wa 28 Gicurasi 2018, ariko icyo gihe Minisitiri w’Ubucuruzi n’Inganda, Munyeshyaka Vincent, yabwiye IGIHE ko nta cyahindutse ku mwanzuro rwafashe, hategerejwe umwanzuro Amerika izafata.

Iyi Minisiteri ivuga ko mu bicuruzwa u Rwanda rwohereza muri Amerika, ibinyura muri gahunda ya AGOA ari 2% gusa naho ibindi byose bigasorerwa.

Mu kiganiro cyihariye Umuyobozi Mukuru w’Ikigo cy’Igihugu cy’Iterambere (RDB), Clare Akamanzi, yagiranye na The New Times, yavuze ko mu rwego rwo korohereza abacuruzi boherezaga ibicuruzwa muri Amerika, Guverinoma iri kureba uko yazabishyurira imisoro izashyirwaho mu gihe cy’umwaka umwe.

Ibyo ngo bizabafasha gushaka amasoko mashya no kurangiza amasezerano byaba byaragiranye n’amasoko yo muri Amerika.

Yakomeje agira ati “Abazagirwaho ingaruka n’uko u Rwanda rwakuwe muri AGOA, Guverinoma igiye gukorana na bo mu gutanga ibyari byaramaze gutumizwa n’abo muri Amerika mu mwaka utaha maze tubishyurire umusoro.”

“Ntabwo twifuza ko amasoko bari bamaze guhabwa ahura n’ikibazo mu gihe bagishakisha ahandi bazajya bagurisha ibicuruzwa byabo. Turi gushyiraho uburyo bushya buzadufasha kubona ikigega kizabishyurira imisoro bazashyirirwaho.”

Yavuze ko bari gukorana n’aba bacuruzi mu gushakisha andi masoko ku mugabane w’u Burayi, Aziya no muri Afurika, ashobora kwakira ibicuruzwa bitabanje gusoreshwa.

Umwanzuro wo kuvana u Rwanda muri AGOA ukiri gusuzumwa, ni intandaro y’umwanzuro rwafashe wo kugabanya imyenda n’inkweto bya caguwa byinjira mu gihugu mu rwego rwo kongerera ubushobozi inganda zarwo.

Uwo mwanzuro kandi wari watowe mu 2015 n’Abakuru b’ibihugu bigize Umuryango wa Afurika y’Iburasirazuba (EAC) ariko ibindi bihugu byo muri aka karere ntibyawubahiriza, ari nayo mpamvu byo bitarebwa n’ibi bihano.

Akamanzi yashimangiye ko nubwo gukura u Rwanda muri AGOA bizarugiraho ingaruka, rudateze kwisubiraho ku cyemezo rwafashe.

Yakomeje agira ati “Twagerageje kuvugana na Guverinoma ya Amerika ariko ndatekereza ko bigaragara ko umwanzuro wo kongera umusoro kuri Caguwa atari uw’u Rwanda gusa. Ibihugu byose bya EAC byemeranije kubikora kandi u Rwanda rukomeye ku mwanzuro wo kubikora.”

We asanga ngo nta mpamvu yo kwitandukanya n’uyu mwanzuro wa EAC nubwo hari ingaruka zizabaho ibigo nibishyirirwaho imisoro, nko ku ruganda rwa C&H.

U Rwanda ruteganya ko mu gihe gahunda zarwo zagenda uko byiyemejwe, ruzunguka byinshi birimo imirimo mishya 25,655, kongera inyungu y’ibyoherezwa mu mahanga ikagera kuri miliyoni 43$, rukanagabanya ibyo rutumizayo bikagera kuri miliyoni 33 $ bitarenze mu 2019, bivuye kuri miliyoni 124 $ mu 2015.

Guverinoma y’u Rwanda ivuga ko imaze gutera intambwe mu kubaka urwego rw’inganda zikora imyenda kuko mu mwaka ushize umusaruro wazo wazamutseho 21 % n’inyungu ivamo izamuka ho 14%.

Raporo y’Ikigega cya Leta Zunze Ubumwe za Amerika Gishinzwe Iterambere Mpuzamahanga, USAID, mu 2015, yerekana ko muri EAC honyine haje 13% bya caguwa yoherejwe ku Isi hose, ifite agaciro ka miliyoni 274 z’amadolari. Byongeye, 67 % by’abaturage muri EAC baguze imyenda ku masoko ya caguwa.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza