Umushoramari w’ibikomoka ku buhinzi n’ubworozi bitarengeje miliyoni 12 Frw ntazongera kwakwa umusoro ku musaruro

Yanditswe na Evariste Nsengimana
Kuya 22 Gicurasi 2018 saa 05:15
Yasuwe :
0 0

Ikigo cy’imisoro n’amahoro (RRA) cyatangaje ko hari impinduka zashyizwe mu itegeko rishya rishyiraho imisoro ku musaruro, mu rwego rwo kwihutisha ishoramari mu Rwanda no guhuza amategeko agenga ishoramari n’agenga umusoro ku musaruro mu gihugu.

Muri iryo tegeko Nº 016/2018 ryo ku wa 13/04/2018 risimbura Itegeko n°16/2005 ryo ku wa 18/08/2005, ryashyiragaho umusoro utaziguye ku musaruro, hagaragaramo impinduka zirimo ko umuntu ukora ubuhinzi cyangwa ubworozi, bufite umusaruro uri munsi ya miliyoni 12 Frw ku mwaka, yakuriweho umusoro burundu.

Mu kiganiro RRA yagiranye n’itangazamakuru ku wa 22 Gicurasi 2018, mu rwego rwo gusobanura zimwe mu mpinduka z’ingenzi zabayemo, Komiseri w’imisoro y’imbere mu gihugu, Kayigi Habiyambere Aimable, yavuze ko zakozwe mu rwego rwo koroshya ishoramari mu gihugu.

Kayigi yavuze ko ku musoro w’ibikomoka ku buhinzi n’ubworozi, muri iryo tegeko, iryari risanzwe ryateganyaga ko ukora ubwo bucuruzi bufite umusaruro uri munsi ya miliyoni 12 Frw, adasoreshwa ariko hakabamo imbogamizi ko uwayarenzaga, yasoreshwaga izo miliyoni 12 Frw zidakuwemo ariko iryashyizweho ubu rikaba ribisobanura neza.

Urugero, niba umuntu ukora ubwo bucuruzi, akinjiza umusaruro wa miliyoni 35 Frw, irishya riteganya ko azajya asorera miliyoni 23 Frw gusa, ni ukuvuga miliyoni 35 Frw ukuyemo zimwe zidasoreshwa 12 Frw.

RRA itangaza ko mu Rwanda habarurwa abasora (abasoreshwa) b’umusoro ku musaruro banditse banganga na 156,184.

Komiseri w'imisoro y'imbere mu gihugu, Kayigi Habiyambere Aimable

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza