Impamvu ubutaka bwo ku nyanja Djibouti yahaye u Rwanda butarabyazwa umusaruro

Yanditswe na Evariste Nsengimana
Kuya 29 Gicurasi 2018 saa 11:41
Yasuwe :
0 0

Abadepite babajije Minisitiri w’Ubucuruzi n’Inganda, Munyeshyaka Vincent, impamvu hashize imyaka isaga ine ubutaka Djibouti yahaye u Rwanda butabyazwa umusaruro nyamara ubwo rwo rwayihaye mu cyanya cyahariwe inganda i Kigali iri kubukoreraho.

Muri Werurwe 2013, nibwo Ambasaderi Nsengimana Joseph uhagarariye u Rwanda muri Djibouti, ufite icyicaro i Addis Ababa muri Ethiopia, yagiriye uruzinduko muri Djibouti mu rwego rwo gusinya amasezerano y’ihabwa ry’ubutaka bungana na hegitari 20 ku cyambu cya Djibouti, ahakunze gukorerwa ubucuruzi no kunyuzwa ibicuruzwa ku nyanja Itukura.

Ubwo butaka bwitezweho gufasha u Rwanda nk’igihugu kidakora ku nyanja, mu bucuruzi n’ubuhahirane n’ibindi bihugui ariko kugeza n’ubu nta gikorwa kibyara inyungu kirabukorerwaho.

Mu cyumweru gishize, ubwo Minisitiri Munyeshyaka yashyikirizaga abadepite imbanzirizamushinga y’itegeko rigenga amasezerano y’ubucuruzi hagati ya Djibouti n’u Rwanda, bamubajije impamvu ubwo butaka butabyazwa umusaruro uko bikwiye mu gihe umugambi wari uhari kwari ukubuhuza n’ubwo icyo gihugu kihafite busaga ha 451, bikarufasha kwagura ubucuruzi bwo mu mazi.

Depite Kalisa Evariste yavuze ko kubyaza umusaruro ubwo butaka byajemo ibibazo kuva cyera ariko Djibouti yo ubutaka bungana na Ha 10 u Rwanda rwayihaye i Kigali bwatangiye gubyazwa inyungu.

Uretse ubwo butaka bw’impano hari n’ubundi bungana Ha 40, u Rwanda ruheruka kugurayo, bwose hamwe uko ari Ha 60 nta musaruro burabyazwa nk’uko Rwanda Today yabitangaje.

Asubiza kuri icyo kibazo, Minisitiri Munyakazi yagize ati “Ku ikubitiro twasinye amasezeraho n’ikigo cy’Abashinwa ‘Tourchroad International Holding Group’ cyagomba gutunganya ubwo butaka ariko nyuma uwo mushoramari aza guhagarika amasezerano; Twasanze nta bushobozi buhagije afite bwo gutunganya buriya butaka, biba ngombwa ko dushaka undi mushoramari.”

Munyeshaka yabwiye iki kinyamakuru hari abashoramari batatu bahawe isoko ryo gutunganya ubutaka bwose, umushinga ukaba ugisuzumwa n’Ikigo cy’igihugu cy’iterambere (RDB).

Yahamije ko abo bashoramari bamaze gukora inyigo, ati “Mu biganiro duheruka kugirana batugaragarije ubushake bwo guhita batangira gutunganya ubwo butaka kuko bamaze gukora umushinga neza.”

Ikibazo cy’ubutaka si ubwo bwa mbere kivuzwe, muri Mata 2017 Minisitiri w’Ububanyi n’Amahanga w’u Rwanda, Louise Mushikiwabo, ubwo we na Perezida Kagame bari bagiriye uruzinduko muri icyo gihugu, yatangaje ko icyihutirwa ari ukubyaza umusaruro ubwo butaka.

Yagize ati “Icyo navuga cyihutirwa kandi gifatika ni ukubyaza umusaruro ubutaka leta ya Djibouti yahaye u Rwanda ku cyambu cya Djibouti. Iki gihugu gifite ubukungu bujyanye n’aho giherereye; gituye ku Nyanja hakaba ari ahantu hanyura amato menshi hari ibikorwa byinshi by’ubucuruzi.”

“Twemeranyijwe ubushize ko tugiye gushora imari nka leta ndetse tugakorana n’abikorera tukaba twafatanya kugira ngo ubwo butaka bwiza tububyaze umusaruro.”

U Rwanda na Djibouti byagiye bigirana amasezerano atandukanye arimo ajyanye n’ingendo zo mu kirere , ajyanye n’iterambere ndetse n’umutekano w’ishoramari; ajyanye n’ubufatanye mu ikoranabuhanga; ajyanye no gukuriraho ikiguzi cya visa abadipolomate ndetse n’abafite pasiporo za serivisi n’andi.

Minisitiri w’Ubucuruzi n’Inganda, Munyeshyaka Vincent

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza