Indi Banki yo muri Kenya igiye gutangira imirimo mu Rwanda

Yanditswe na Rabbi Malo Umucunguzi
Kuya 30 Ukuboza 2016 saa 08:27
Yasuwe :
0 0

Guverineri wa Banki Nkuru y’u Rwanda, John Rwangombwa, yatangaje ko bari mu cyiciro cya nyuma cyo guha ibyangombwa indi banki yo muri Kenya yifuza gukorera mu Rwanda, Commercial Bank of Africa (CBA), yifuza gukorera mu gihugu nk’ikigo cy’imari iciriritse.

Mu gihe ibyangombwa byaba bibonetse, CBA yatangira imirimo mu mwaka utaha wa 2017 nk’uko The New Times yabitangaje, ikaza isanga izindi banki ebyiri zikomoka muri Kenya arizo Kenya Commercial Bank-Rwanda (KCB) na Equity Bank.

Kuza mu Rwanda kwa CBA kwatangiye kuvugwa mu 2012 ubwo yatangazaga ko yifuza kugira ibikorwa mu bihugu 10 bya Afurika, birimo u Rwanda, Mozambique, Sudani y’Epfo, Uganda, DRC, u Burundi na Ethiopia.

Icyo gihe yari iya munani muri Kenya mu bijyanye n’umutungo ndetse uyu munsi ikaba ikiri hafi aho, n’umutungo mbumbe wa miliyari 2.166 z’amadolari ya Amerika.

CBA yashinzwe mu 1962 muri Tanzania ariko iza kwimurira ibikorwa byayo i Nairobi muri Kenya, ubwo icyo gihugu cyari gitangiye gahunda y’uko banki zose z’abikorera ziba mu maboko y’abenegihugu, ahagana mu 1967. Isanzwe ifite ibikorwa muri Kenya, Uganda na Tanzania.

CBA iraza mu Rwanda isanga izindi banki 17 zifite uburenganzira bwo gukorera mu gihugu n’ibigo by’imari bisaga 75 mu gukomeza gutanga serivisi z’imari mu gihugu. Kugira ngo ikigo cy’imari gikorere mu Rwanda bisaba ko nibura kiba gifite imari shingiro ya miliyari imwe n’igice z’amafaranga y’u Rwanda, mu gihe banki nyayo iba ifite miliyari 5 Frw.

Izindi banki ziheruka gutangira gukorera mu Rwanda harimo Bank of Africa yaguze Agaseke Bank na Attijariwafa Bank zombi zo muri Maroc, iri mu biganiro byo kugura 76.19% muri Cogebanque igahita ishoramo miliyoni $41.

Umutungo wa banki mu Rwanda mu 2016 wiyongereyeho 9.8% kugeza muri Nzeri bingana na miliyari 2.2 Frw. Gusa inyungu muri rusange yagabanutseho 2.8% mu 2016 kuko yabaye miliyari 32 Frw ivuye kuri miliyari 33Frw zabonetse mu gihe nk’icyo mu 2015.

Banki Nkuru y’u Rwanda kuri uyu wa Gatatu nibwo yatangaje ko yagabanije inyungu banki ziboneraho inguzanyo, ivanwa kuri 6.5% igera kuri 6.25%.

Rimwe mu mashami ya CBA muri Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza