Isenene zabaye imari ikomeye ku isoko (Amafoto)

Yanditswe na Thamimu Hakizimana
Kuya 10 Ukuboza 2016 saa 02:36
Yasuwe :
0 0

Mu gihe bimenyerewe ko inyama, amafi n’indagara z’indundi biri mu biribwa byigonderwa n’abifite mu Mujyi wa Kigali, muri iyi minsi iyi mvugo ishobora guhinduka bitewe n’iyaduka ry’isenene, ikiribwa giharawe na benshi kandi kinahenze ku isoko.

Mu bice bitandukanye by’Umujyi ahari hamenyerewe gukarangirwa amafi n’indagara no kotsa inyama (Brochette), hari kumvikana mpumuro y’udusimba twitwa isenene, abazicuruza n’abakunzi bazo babatije “Inyama zo mu Ijuru”.

I Nyamirambo, Kimisagara na Gatsata ndetse na Kacyiru hafi y’Inteko Ishinga Amategeko, usanga ku matara yo ku mihanda hari abantu bafite amashashi n’imifuka bari gutoragura isenene.

Iyo muganiriye bavuga ko iyo zaguye bishima cyane kuko muri icyo gihe batandukana n’ubukene.

Abazicuruza bavuga ko zibafasha gukemura bimwe mu bibazo baba bafite nko gushaka amafaranga y’ishuri, ari naho bahera bavuga ko zimeze nka Manu bahawe n’Imana yo mu Ijuru. Bamwe muri bo bemeza ko isenene ziryoha ndetse benshi baba bifuza kuzigura. Ikiro cyazo bakirangura amafaranga ibihumbi bine, bakakigurisha bitanu.

Musafiri Patrick utuye mu Murenge wa Gitega yagize ati “Iyo isenene zaguye sinjya ndyama kubera ko ijoro ryose ndara ndi kuzihiga bwacya nkajya kuzigurisha nkabona kujya kuryama.”

Mukamuhizi Rose uzwi ku izina rya Mama Nema utuye mu Mudugudu w’Intwari mu Kagari ka Rwezamenyo ho mu Murenge wa Rwezamenyo we yabwiye IGIHE ko mu byumweru bibiri zitangiye kugwa zimaze kumuzanira inyungu ifatika.

Yagize ati “Nashoye ibihumbi 100 none maze kunguka ibihumbi 80, isenene zirantunze kandi hari n’abagura imodoka kubera zo.”

Nyirahavugimana Saidati, umubyeyi w’abana batandatu utuye mu Murenge wa Rwezamenyo mu Karere ka Nyarugenge avuga ko iyo isenene zaguye aba yizeye ko ibibazo bye bigiye gucyemuka.

Yagize ati “Mu minsi ibiri nashoyemo ibihumbi 20 ariko maze kunguka ibihumbi 10 ku buryo kuri njye mba numva isenene zahora zigwa kuko byangabanyiriza ibibazo bitandukanye by’amafaranga mba mfite buri gihe.”

Yakomeje avuga ko ikiro bakigurisha amafaranga ibihumbi bitanu ariko akemeza ko bitewe n’uko isenene zihenda bagerageza bakazigurisha mu buryo butandukanye bitewe n’ubushobozi bw’abakiriya baba babagannye ku buryo n’iz’amafaranga 100 bazitanga.

Isenene zitunganywa mu buryo butandukanye n’uko inyama zisanzwe cyangwa ifi bitekwa kuko zo zikarangwa gusa ariko ntizishyirwamo amazi cyangwa amavuta; zishobora gukarangwa zikabikwa zikamara igihe kirekire zitarangirika.

Mbere yo kuzikaranga babanza kuzikuraho amababa
Isenene zigiye gukarangwa
Ahacururizwa isenene haba hari urujya n'uruza rw'abantu bashaka kuzigura
N'ubwo isenene zihenze, uzishaka ahabwa izingana n'ubushobozi bwe
Abacuruza isenene bavuga ko babona amafaranga abafasha gukemura ibibazo bitandukanye
Abagiye kugura isenene bumvikana n'umucuruzi
Abazicuruza bazitekera ku muhanda
Uko isenene z'amafaranga ijana zingana
Nyirahavugimana Saidati akaranga isenene
Isenene zabaye imari ikomeye i Nyamirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza