Jali Savings and Credit Plc yashowemo miliyari 3 Frw mu gutangiza serivisi z’imari iciriritse

Yanditswe na
Kuya 5 Kamena 2019 saa 04:20
Yasuwe :
0 0

Urugaga rw’Amakoperative yo Gutwara abantu n’ibintu mu Rwanda (RFTC) rwafunguye Ikigo cy’imari cyo kubitsa no kugurizanya cya Jali Savings and Credit Plc, cyashowemo asaga miliyari 3 Frw nk’intangiriro yo guhindura ubuzima bw’abanyamuryango barwo n’Abanyarwanda bose.

Jali Savings and Credit Plc ni Ikigo cy’Imari iciriritse cya Jali Holdings Ltd na Jali Transport Ltd, biri mu bikorwa by’ishoramari bya RFTC.

Iki kigo cyatashywe ku wa 1 Kamena 2019, mu muhango wabereye ahazwi nko ku Mashyirahamwe i Nyabugogo ari naho gikorera.

Umuyobozi wa ’Jali Holding Company’, Twahirwa Ludovic ’Dodo’ yavuze ko Jali Savings and Credit Plc yavutse nyuma yo kwaguka kwa RFTC yatangiranye miliyoni 700 Frw, nyuma y’imyaka itandatu ikagera kuri miliyari 13 Frw.

Yagize ati "Twasanze ayo mafaranga no kugenzura koperative bitoroshye. Hashyirwaho ikigo cya Jali Holdings cyatumye RFTC yinjira mu bucuruzi."

Jali Savings and Credit Plc yatangiranye imari shingiro ya miliyari 3 Frw. Mu kuyitangiza Zigama CSS yatanze ubufasha mu kwigisha abakozi, kubasangiza ubumenyi ku buryo amakonti afungurwa n’ibindi.

Col Twahirwa yagize ati "Mu minsi mike tuzaba tumaze kugera ahantu heza. Ubu dutanga inguzanyo kuva kuri miliyoni ziri hagati ya 5 Frw na 6 Frw. Turateganya gutanga inguzanyo za miliyoni 100 Frw."

Iki kigo kirateganya gufungura amashami muri za gare zo mu ntara mu korohereza abanyamuryango kugerwaho na serivisi z’imari mu buryo bworoshye kandi butekanye.

Minisitiri w’Ingabo, Maj. Gen. Murasira Albert, yashimye RFTC yatekereje ku gikorwa kigamije kubaka ubukungu bw’igihugu.

Yagize ati “Si ubwa mbere Jali ikora igikorwa nk’iki. Kuva aho mwatangiriye ni inzira ndende igaragaza ubwitange mu kubaka igihugu cyacu. Ndi hano ku butumire kuko hari uruhare Minisiteri y’Ingabo yagize mu kubaka iki kigo nk’uko biri mu nshingano zayo.’’

“Jali yaje gushaka ubufasha inyuze muri Minadef, ijya muri CSS yahise ibisamira hejuru kuko ihora ishaka ko Abanyarwanda bose bagira imibereho myiza.’’

Minisitiri Murasira yavuze ko itangira rya Jali Savings and Credit Plc ari inyongera nziza ku kwegereza Abanyarwanda serivisi z’imari, anizeza ubufasha bwa Minisiteri ayoboye muri iyo nzira y’iterambere.

Ati "Iyo ushaka gutera imbere si byiza guhenda abakugana, iyo bakugannye si byiza kubaha serivisi nk’ubagirirye impuhwe, bakwiye kubibona nk’uburenganzira bwabo. Ibi bizatuma n’abafata inguzanyo biteza imbere. Muzakomeze inzira yo kwishakira ibisubizo ngo dukomeze guteza igihugu cyacu imbere.’’

Ubuhamya bw’abaganuye kuri serivisi z’imari

Umuyobozi wa Koperative y’Urubyiruko rwakoreraga muri Gare ya Nyabugogo, Light Business, Kubwimana Lazarre, yavuze ko bafashijwe n’iki kigo kwiyubaka.

Ati "Twasanze iki kigo gikora mu buryo butandukanye n’ibindi. Cyatugiriye inama yo kwizigama, kubitsa no kwiteganyiriza. Tumaze kubyungukiramo. Urubyiruko rugera kuri 300 rwibumbiye muri koperative, ubu dukorera mu isoko rya kijyambere aho twishyura milliyoni 1 Frw. Dukomeje intambwe y’iterambere tubifashijwemo n’ubuyobozi butuba hafi.’’

Munyemana Fabien umaze imyaka irindwi atwara imodoka mu Mujyi wa Kigali yavuze ko bishimiye iki kigo cy’imari kuko kizabahindurira ubuzima.

Ati “Mbitsa muri iki kigo kuva mu mezi abiri. Serivisi baduha ni nziza cyane, nta murongo muremure uhasanga kandi bafite abakozi bita ku bakiliya.’’

Jari Savings and credit PLC imaze amezi atatu itangiye gutanga serivisi; yandikishijwe, ihabwa ubuzima gatozi n’Ikigo cy’Igihugu cy’Iterambere (RDB) ku wa 26 Mutarama 2019. Ku wa 3 Mutarama nibwo cyahawe uburenganzira bwo kwakira ubwizigame no gutanga inguzanyo na Banki Nkuru y’Igihugu (BNR).

Iki kigo gifite abakozi 10 n’abanyamuryango basaga 8 000, kimaze gutanga inguzanyo ku bakiliya 132.

Ibyo wamenya kuri serivisi zitangwa na Jali Savings and Credit Plc

Jali Savings and Credit Plc itanga serivisi zijyanye no gufungurira abakiliya konti, kubitsa no kubikuza, ubujyanama ku micungire y’imari, gutanga amasomo ajyanye no gukora imishinga no kwigisha kuyikurikirana.

Umukiliya ashobora gufunguza konti zitandukanye zirimo iyo kwizigamira ku bushake, ndetse yungukirwa 6% buri mwaka.

Hari kandi konti yo kwizigamira k’ushaka kubona inguzanyo. Iyi konti ishyirwaho 3% avuye ku mushahara wa buri kwezi, yungukirwa 7% kuri ubwo bwizigame bw’igihe kirekire, bushingirwaho mu gihe umuntu asabye inguzanyo bukamubera ingwate.

Imitangire y’inguzanyo

Umuntu ushaka inguzanyo ye ku giti cye, ashobora gushaka avansi ku mushahara. Ihabwa nibura umukozi umaze amezi atatu ahemberwa muri Jali. Usabye inguzanyo ishingiye ku mushahara akubirwa inshuro 16.

Inguzanyo ya Ngoboka itangwa hagati mu kwezi, ifasha umuntu gukemura ibibazo bitandukanye.

Iki kigo kinatanga inguzanyo yo kwishyura amashuri y’abana, iyo kwivuza, iyo gutembera ku bantu bari muri konji n’ibindi. Kinatanga kandi inguzanyo y’ubucuruzi ibafasha kwagura ibikorwa byabo. Uyisaba agomba kuba nibura amaze amezi atandatu akora ishoramari ku buryo bigaragara ku nyandiko za banki basanzwe bakorana, kuba yarishyuye ipatanti n’imisoro ayitanga neza.

Inguzanyo y’ikodeshagurisha yo ihabwa abakiliya benshi (3-10) bafite ingwate zaba izifatika n’izidafatika. Itera inkunga imishinga y’ubucuruzi buto n’ubuciriritse, ingwate ikaba kwishingirana mu buryo bwa magirirane.

Inguzanyo zitangwa na Jali Savings and Credit Plc zishyurwa ku nyungu iciriritse iri hagati ya 15 na 16%.

Jali Savings and Credit Plc ifite intego yo kubaka ikigo kiri ku isonga mu gutanga serivisi cyegereza abakigana, kibafasha kuzigama amafaranga yabo kikanabaha n’inguzanyo yaba iyo ku giti cyabo, iy’ubucuruzi n’izindi.

Minisitiri w'Ingabo Gen Maj Albert Murasira n'Umunyamabanga wa Leta muri Minisiteri y'Ibikorwa remezo Ushinzwe Ubwikorezi, Uwihanganye Jean de Dieu, bafungura ku mugaragaro Jali Savings and Credit Plc
Abayobozi batandukanye basuye aho Jali Savings and Credit Plc ikorera
Minisitiri w'Ingabo Gen Maj Albert Murasira n'Umunyamabanga wa Leta Ushinzwe Ubwikorezi, Uwihanganye Jean de Dieu, basobanurirwa imikorere ya Jali Savings and Credit Plc
Jali Savings and Credit Plc imaze amezi atatu itanga serivisi
Uwihanganye Jean De Dieu, Gen Maj Murasira na Twahirwa 'Dodo' bungurana ibitekerezo mu muhango wo gufungura ku mugaragaro Jali Savings and Credit Plc
Twahirwa Ludovic 'Dodo' uyobora RFTC yatangije Jali Savings and Credit Plc
Ni umunsi wanaranzwe n'ubusabane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza