KCB mu rugamba rwo korohereza abahinzi kurushaho kugera kuri serivisi z’imari

Yanditswe na Mukaneza M.Ange
Kuya 15 Kamena 2018 saa 02:48
Yasuwe :
0 0

Banki y’Ubucuruzi ya Kenya (KCB Rwanda) yatangaje ko yatangiye ibiganiro n’inzego zitandukanye hagamijwe gushaka uburyo bushya bwatuma abahinzi barushaho koroherwa no kugera kuri serivisi z’imari.

Mu biganiro byahuje aba bayobozi n’inararibonye mu birebana n’ubuhinzi ku wa 14 Kamena 2018, hagaragajwe gahunda ishobora kuzasiga abajyana ibicuruzwa mu bigo binini bahita bishyurwa hatabayeho gutegereza igihe kirekire.

Umuyobozi mukuru w’Ikigo Ennovative Capital, Kefa Nyakundi, uri mu bazanye iki gitegerezo yavuze ko ikigamijwe ari ukuzana ikoranabuhanga rizakuraho imbogamizi abari mu buhinzi bahuraga nazo igihe bajyaga kuguza banki amafaranga yo gukoresha mu bikorwa byabo.

Ati “ Riramutse rikoreshejwe neza ryabasha kugabanya ikiguzi cyo kugera kuri serivisi z’imari ndetse ibigo bito n’ibiciriritse bikabasha kuzigeraho kenshi gashoboka. Ntabwo uzaba ukeneye gutanga ingwate cyangwa kunyura mu nzira zose zirebana no kwiga ku nguzanyo. Igihe cyose ufite umuguzi mwiza, icyo gihe uba ufite amahirwe yo kubona inguzanyo ingana n’ikiguzi cy’ibyo wagurishije kandi vuba.”

Mu gusobanura iki gitekerezo cyakiriwe neza n’abitabiriye iyi nama, ubuyobozi bwa KCB bwavuze ko umuhinzi ujyanye umusaruro ku mucuruzi cyangwa ikigo aho guhabwa igihe runaka cyo kuzasubirayo kwishyurwa, ashobora kwegera banki ikayamuha, nayo ikazajya kwishyuza umuguzi ya minsi yatanze ishize.

Umuyobozi ushinzwe ibirebana n’ubuhinzi muri KCB Rwanda, Mpirwa Alex, yavuze ko bikiri kuganirwaho ngo barebe ko byakorwa, bikaba bigamije guteza abahinzi imbere.

Yakomeje avuga ko icyo bagamije ni ukwihutisha serivisi z’imari ku bakora ubuhinzi kuko bemera ko bushyigikiwe n’ikoranabuhanga bwarushaho gutera imbere, n’ubukungu bw’igihugu bukazamuka.

Umuyobozi wa Africa Improved Food, Prosper Ndayiragije, yavuze ko ibiganiro ku birebana no guteza imbere ubuhinzi ari ingenzi cyane kuko byatumye bunguka byinshi, bikaba bigamije guteza abahinzi imbere.

Ati “Ubusanzwe gutera inkunga ubuhinzi bifatwa nk’ikintu kigoye na banki nyinshi kubera ko hari ingorane zikunze kubamo kandi batateguye nk’imihindagurikire y’ikirere, kwibaza niba bazabasha kwishyura n’ibindi. Ibi biganiro byahurije hamwe abacuruzi n’abahinzi, binagaragaza ibibazo impande zombi zihura nabyo ndetse n’ibisubizo bikenewe.”

KCB Rwanda yatangije ibi biganiro yise ‘Expert Talks’ mu rwego rwo gushyiraho urubuga ruhuriramo inararibonye mu byiciro bitandukanye kugira ngo basangize abandi ubumenyi bwabo hibandwa ku cyiciro runaka cy’abakiliya b’iyi banki ndetse n’abaturage bose muri rusange.

Abitabiriye ibiganiriro ku buhinzi bagize batanze ibitekerezo
Umuyobozi w'Ishami rishinzwe abakiliya muri KCB Rwanda, Liliose Nyiwankindi
Gahutu Emmanuel wari uhagarariye Ikigo cy'Imisoro n'Amahoro
Inama yitabiriwe n'inararibonye mu buhinzi n'ibibushamikiyeho
Umuyobozi wa AIF mu Rwanda, Prosper Ndayiragije, yagaragaje ko ibi biganiro byashyize ahagaragara ibibazo abahinzi n'abaguzi babo bafite
Umuyobozi wa Ennovative Capital, Kefa Nyakundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza