Kwamamaza

Leta ihangayikishijwe n’izamuka ridasanzwe ry’ibiciro ku masoko

Yanditswe kuya 15-11-2016 saa 11:00' na Ntakirutimana Deus


Leta y’u Rwanda iratangaza ko ikibazo cy’ibura ry’imvura mu bice bitandukanye by’u Rwanda ndetse no mu bihugu byo mu karere ryatumye ibiribwa biba bike ku isoko, ku buryo ikiguzi cyabyo cyagiye cyiyongera ku buryo budasanzwe.

Mu mpera z’Ukwakira 2016, IGIHE yatambagiye amasoko atandukanye muri Kigali ireba ibijyanye n’ibiciro by’ibiribwa. By’umwihariko mu isoko rya Nyarugenge n’isoko rya Nyabugogo (Kwa Mutangana). Yasanze ikiro cy’ibirayi ari amafaranga 300-350, umuceri 800-1000, igitoki ari 300, ibishyimbo ari 600 -800, ifu y’imyumbati 500 - 800, na ho icy’ibijumba ari 250.

Ibyo biciro siko byari bimeze mbere nkuko bigaragazwa n’Ikigo cy’Igihugu gishinzwe Ibarurishamibare (NISR). Icyo kigo giherutse gutangaza ko ibiciro ku masoko yo mu Rwanda byiyongereye ku gipimo cya 7, 8%, ni ukuvuga hagati ya Nyakanga 2015 na Nyakanga uyu mwaka.

Ibyo biciro bikomeje kwiyongera umunsi ku wundi nk’uko bigaragazwa n’itangazo NISR yashyize ahagaragara tariki ya 10 Nzeri 2016. Rigaragaza ko ibiciro mu mijyi byiyongereyeho 6,4% muri Kanama 2016 ugereranyije na Kanama 2015. Hakurikijwe uduce mu mujyi byazamutse ku gipimo cya 6,4% mu gihe mu cyaro byazamutse ku kigero cya 8,1%.

Icyo gihe Ikigo cy’Igihugu gishinzwe Ibarurishamibare cyatangaje ko bimwe mu byatumye ibiciro bizamukaho 6,4% mu kwezi kwa Kanama mu mijyi ari uko ibiciro by’ibiribwa n’ibinyobwa bidasembuye byazamutseho 12,0%, ibiciro by’inzu, amazi, amashanyarazi, gazi n’ibindi bicanwa bizamukaho 3,0% n’ibiciro by’ibijyanye n’ubwikorezi bizamukaho 8,6%.

Ugereranyije ukwezi kwa karindwi n’ukwa munani uyu mwaka, usanga ibiciro byarazamutseho 0.5%. Iri zamuka na ryo ngo ryatewe n’ibiciro by’ibiribwa n’ibinyobwa bidasembuye byazamutseho 0,9% n’ibiciro by’amazu, amazi, amashanyarazi, gazi n’ibindi bicanwa byazamutseho 0,5% muri aya mezi.

Impungenge ni zose kuri Leta

Abaturage hirya no hino bagiye bataka inzara, bamwe bakavuga ko batabarwa n’ibiribwa bise amazina arimo ‘Shirumuteto’ [imyumbati bavana muri Tanzania bakayiryamo ubugari birengagije icyanga cyayo].

Izamuka ry’ibyo biciro ni ikibazo gikomeye gikomeje gutera impungenge leta y’u Rwanda ndetse byatumye ifata ingamba zikaze, nkuko byagarutsweho na Minisitiri w’Ubucuruzi, Inganda n’Umuryango wa Afurika y’iburasirazuba (MINEACOM), François Kanimba mu kiganiro yagiranye n’abanyamakuru ku wa Mbere tariki ya 14 Ugushyingo 2016.

Yagize ati “Nagira ngo mbabwize ukuri ni ikibazo ubu kidukomereye. Ariko ntabwo gikomereye u Rwanda gusa, mu by’ukuri ni akarere kose. Gishingiye ahanini ku izuba ryinshi ryavuye ridasanzwe muri aka karere ibihugu byose byagize ibibazo by’amapfa, bituma haba rwose guhungabana ku musaruro wari utegerejwe mu rwego rw’ubuhinzi utarabonetse.”

Kanimba yakomeje avuga ko nta bitangaza bishobora gukorwa iyo umusaruro w’ubuhinzi ubaye muke ugereranyije n’ibiribwa abaturage bakeneye, kuko bituma ibiciro bizamuka.

Ikibazo kiri no mu bihugu by’ibituranyi

U Rwanda ngo hari igihe rwageraga rukagira umusaruro muke ku bihingwa bimwe na bimwe rugatabarwa n’ibihugu ruturanye nabyo ariko ubu hagaragara ikibazo kubera ko nabyo byahuye n’ayo mapfa.

Kanimba yatanze urugero ku birayi byaturukaga muri Uganda. Ati “Buriya ibirayi kera hagati y’ukwezi ka karindwi n’ukwa 10 no mu myaka yashize, byabaga ari bike mu Rwanda, ariko hakaba ibirayi byinshi bituruka muri Uganda bikaza bikunganira umusaruro muke uri mu gihugu, ibiciro ntimubone bihindagurika, ariko uyu mwaka, muri Uganda naho ibirayi byabaye bike cyane, ku buryo ntabyaje mu Rwanda.”

Ikindi cyateye iryo zamuka ni agaciro k’ifaranga ry’u Rwanda kaguye hagati ya 6-7% mu myaka ibiri ishize urigereranyijwe n’idolari rya Amerika, bikagira ingaruko ku byo u Rwanda rutumiza hanze.

Kanimba ati “Twagize ingorane zishingiye ku guhungabana kw’amasoko mpuzamahanga , ari amabuye y’agaciro, ari ikawa ari icyayi, urebye ibiciro by’ibyo bicuruzwa n’ubu byaragabanutse ku masoko mpuzamahanga ku buryo twatakaje amafaranga menshi ugereranyije n’ayo twajyaga tubona aturuka mu kohereza mu mahanga ibyo bicuruzwa.” Ibyo bibazo ngo byagize ingaruka ku kwiyongera kw’ibiciro by’ibiribwa mu Rwanda no mu karere.

Leta y’u Rwanda yarahagurutse

Mu rwego rwo guhangana n’ikibazo cy’amapfa cyagiye cyibasira bimwe mu bice by’u Rwanda birimo uturere tw’intara y’iburasirazuba, Leta y’u Rwanda yagiye iha ibiribwa imiryango yagaragazaga ko ikomerewe n’icyo kibazo.

Ku bijyanye no gukemura icyo kibazo mu buryo burambye, hagiye hakorwa ingomero zifata amazi azajya yifashishwa mu gihe cy’impeshyi n’igihe izuba ryabaye ryinshi. Izo ngomero hari izarangije kubakwa, ariko hari n’iziteganyijwe mu bice bitandukanye by’u Rwanda zifasha abaturage kuhira n’imusozi.

Minisitiri w’Ubucuruzi, Inganda n’Umuryango wa Afurika y’iburasirazuba (MINEACOM), François Kanimba

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved