Kwamamaza

Minisitiri Kanimba yahishuye umumaro u Rwanda rufite mu muryango wa ECCAS

Yanditswe kuya 10-11-2016 saa 05:27' na Jean Pierre Tuyisenge


Kuva mu 2008, U Rwanda rwari rwarikuye mu muryango w’ubukungu w’Ibihugu byo muri Afurika yo Hagati ECCAS, ariko rwaje kubona ko hari inyungu zo kongera kubamo ndetse Amasezerano yo kongera kurwakira yashyizweho umukono na Idriss Deby Perezida wa Tchad wari uyoboye inama yabereye i Ndjamena ku ya 25 Gicurasi 2015 .

Minisitiri w’Ubucuruzi, Inganda n’Ibikorwa by’Umuryango wa Afurika y’Iburasirazuba, François Kanimba, yavuze ko u Rwanda rufite inyungu nyinshi rukura mu kuba rwarinjiye muri iyi miryango ahanini ishingiye ku bucuruzi abanyarwanda bazakorerayo.

Minisitiri Kanimba yavuze ko u Rwanda rwahoze muri uyu muryango rukaza kuvamo, ariko nyuma yo kubona ko hari izindi nyungu rwakuramo ndetse bikarugirira akamaro gashingiye ku masoko n’ubuhahirane rwagirana n’ibihugu biwurimo rwafashe umwanzuro wo gusubiramo.

Mu kiganiro abayobozi bakuru b’uwo muryango bagiranye n’itangazamakuru mu ruzinduko bagiriraga mu Rwanda muri gahunda yabo yo kuzenguruka mu bihugu bigize uyu muryango, harebwa aho bigeze bishyira mu bikorwa gahunda byihaye, Minisitiri Kanimba yavuze ko hari umusaruro munini witezwe.

Ati “Twaje gusanga muri biriya bihugu dufiteyo isoko, cyane cyane ku musaruro uturuka mu buhinzi n’ubworozi, biriya bihugu usanga ahanini ari ibihugu bifite amabuye y’agaciro na peteroli, aho usanga mu bintu by’ubuhinzi bakiri kure cyane ku buryo usanga ibintu bibatunga bituruka kure, nk’iburayi na Afurika y’Epfo, ku buryo abacuruzi bacu twajyanye hari basanze ibintu byose dufite mu Rwanda babikeneye kandi n’ibiciro bikaba biri hejuru.”

Yavuze kandi ko bimwe muri ibi bicuruzwa bishobora kujya bigenda mu ndege ya RwandAir ndetse bikaba amahirwe mu gihe baba bakuyeho imisoro ku bicuruzwa byose bijyayo nkuko amasezerano y’uwo muryango abiteganya.

Amabwiriza yashyizweho n’uyu muryango avuga ko mu rwego rwo kwihutisha ubuhahirane hagati y’ibi bihugu, harimo gukurwaho gukuraho imisoro ku bicuruzwa biturutse mu bihugu bigize uwo muryango.

Hemejwe kandi ko hazanasoreshwa 0.4% ku bicuruzwa bituruka mu bihugu bitawurimo, maze ½ cyayo kikazatera inkunga ibihugu byo mu muryango bishobora kuba byarahungabanye bitewe no gukuraho umusoro wajyaga winjira.

Ikindi cyemejwe ni uko ibihugu bigize uwo muryango bigomba gukora urutonde rw’ibicuruzwa biva muri ibyo bihugu kugira ngo bikurirweho imisoro mu gihe byaba byinjiye mu bigize uwo muryango.

U Rwanda rutangaza ko rukura inyungu ifatika mu miryango rurimo nk’Umuryango wa Afurika y’Iburengerazuba ( EAC), Umuryango w’ubuhahirane w’ibihugu bya Afurika yo hagati n’iburasirazuba (COMESA), na ECCAS cyane cyane bishingiye ku buhahirane n’ubucuruzi butagira imipaka.

ECCAS yashinzwe mu mwaka wa 1983, ukaba ari umuryango ugizwe n’ibihugu icyenda birimo, Angola, Cameron, Centrafrique, Congo Brazzaville, Gabon, Guinee Equatorial, Tchad, Sao Tome & Principe n’u Rwanda.

Itsinda ry'Abayobozi ba ECCAS ziri mu ruzinduko mu Rwanda
Minisitiri Kanimba hamwe n'Umuyobozi wungirije wa ECCAS, Mfaoula Marie Therese Chantal
Minisitiri w'Ubucuruzi, Inganda n'Ibikorwa by'Umuryango wa Afurika y'Iburasirazuba, François Kanimba
Umuyobozi wungirije Umunyamabanga Mukuru wa ECCAS, Mfaoula Marie Therese Chantal

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved