Nkombo: Nta soko, bakora urugendo rw’amasaha ane bajya guhaha hakurya ya Kivu

Yanditswe na Mathias Hitimana
Kuya 11 Mutarama 2017 saa 08:40
Yasuwe : XX
0

Abatuye mu birwa bigize Umurenge wa Nkombo mu Kiyaga cya Kivu, Akarere ka Rusizi, baravuga ko hari abo bitwara amasaha abarirwa muri ane bagiye guhaha hakurya y’ikiyaga kubera kutagira isoko.

Umwe muri abo baturage, Mukabange Francoise, aganira na IGIHE yagize ati “ agasoko dufite n’akabadamu gusa, ni ako guhaha ibyo kurya gusa, telefone ntiwayibona ino, umwenda mwiza wo kwambara siwawubona ino. tugera hano hepfo ku mazi tugafata moteri(ubwato) kwambuka utanze maganabiri, ugafata moto ugatanga icyatanu (1500) ikakuzamura mu mujyi waba udafashe moto ukazamuka n’amaguru bigafata amasaha ane.”

Uretse abajya guhaha, hari n’abandi bagaragaza ko byibuze babonye isoko byabafasha no gutangiza imishinga y’ubucuruzi, bakoresheje amafaranga bakura mu burobyi.

Bamporiki Emmanuel ubibona atyo, yagizeati “Ino umuntu abona ibihumbi 300 akorera mu mazi kandi wabona yabona umugisha wo kuba yakorera mu isoko, hafi ya twese 80 ku ijana ibitekerezo byaheze mu mazi kuko ari nta hantu twakorera, tukaba twifuza isoko kuko abenshi bari inyuma kubera nta soko ritwegereye.”

Umuyobozi w’Akarere ka Rusizi, Harerimana Frederic, yemera koko ko abaturage be bo muri Nkombo bahangayitse, ariko akavuga ko mu gihe Umurenge ufite ikibanza, abaturage baba bagikoresha, Akarere kakazacyubaka habonetse ubushobozi.

Yagize ati “Ibyo abaturage bifuza ni byo duhuriza hamwe tukarebamo ibikomeye kurusha ibindi tugahuza n’ingengo y’imari, tukabishyira mu bikorwa byo kubaka amasoko aciriritse hirya no hino mu mirenge itandukanye, bivuze ko na Nkombo irimo. Ikibazo tuzagenda tugicyemura uko tubonye ubushobozi. Niba hari ubutaka, abaturage bagomba kuba hari ibikorwa bakoreraho hanyuma natwe tugasigara dushaka ubushobozi ariko nibura iby’ibanze bikaba byatangiye.”

Ibirwa bigize Umurenge wa Nkombo bituwe n’abaturage barenga gato 18000, bakoresha udusoko duciriritse ducururizwamo ibyo kurya gusa, cyane cyane isambaza.

Abaturage bo Mu murenge wa Nkombo baratakamba ngo bahabwe isoko

sitio@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza