RRA yahaye abacuruzi 22 ibyemezo byo kwinjiza ibicuruzwa bitagenzuwe

Yanditswe na Evariste Nsengimana
Kuya 28 Nzeri 2017 saa 08:13
Yasuwe :
0 0

Ikigo cy’Igihugu gishinzwe Imisoro n’Amahoro (RRA), kuri uyu wa 28 Nzeri 2017, cyasinyanye amasezerano n’abacuruzi 22, kibaha ibyemezo bibemerera kwinjiza ibicuruzwa mu gihugu bidakorewe igenzura iryo ariryo ryose mu rwego rwo kubafasha no kuborohereza ubucuruzi.

Komiseri wungirije muri RRA ushinzwe Gasutamo, Musoni William, yasobanuye ko mu guhitamo abo bacuruzi boroherezwa habanza kugenzurwa ubuziranenge bw’ibyo bakora, ingano y’amafaranga bakoresha binjiza ibicuruzwa byibuze miliyoni 200 Frw, ubunyangamugayo mu gihe bamaze bakora nko mu myaka ibiri n’ibindi, ariko na bo bagomba kuba barabisabye ku rwego rw’igihugu n’urw’Umuryango w’Afurika y’Iburasirazuba (EAC).

Ibicuruzwa by’abo bacuruzi binyura ku mupaka bitagenzuwe bikazagenzurwa nyuma.

Musoni ati “Nta kindi ni ukugira ngo ibintu byabo bijye byihuta. Uko dusanzwe tugenzura ibyinjizwa mu gihugu, bo tuzajya tuborohereza. Ni ukwihuta, nta gukora igenzura ahubwo tuzajya turikora nyuma.”

Minisitiri w’Ubucuruzi n’Inganda, Vincent Munyeshyaka, yavuze ko korohereza aba bacuruzi kwinjiza ibicuruzwa byabo bitagenzuwe ntibizafasha kwihutisha ubucuruzi ubwabo gusa, ahubwo bizanagira ingaruka nziza ku bucuruzi bw’u Rwanda.

Yagize ati “Icyo bimaze ku bukungu bw’igihugu ni uko ubucuruzi bwihuta aribyo bizanamo no kuzamura ubukungu kuko aba ari ibiza cyane cyane gukora mu nganda. Ubwo rero binagabanya ikiguzi bibatwara kugira ngo babigeze hano cyangwa babyohereze. Icyo kivuze rero ni uko ubukungu bw’igihugu buzamuka ariko nanone bikareba n’ubw’ibihugu byose bigize EAC.”

Yakomeje avuga ko kugeza ubu hamaze gusinyirwa abacuruzi basaga 46 kandi ko uko boroherezwa mu Rwanda ari nako boroherezwa no mu bindi bihugu bigize EAC.

Munyeshyaka yashimangiye ko korohereza abo bacuruzi bizafasha u Rwanda mu guteza imbere gahunda y’ibikorerwa mu gihugu.

Umuyobozi ukuriye abunganira abacuruzi binjiza ibicuruzwa mu gihugu, Seka Fred, yavuze ko koroherezwa kw’abacuruzi mu kwinjiza ibicuruzwa bikanafasha kwihutisha ubwikorezi, ati “N’ibyo dukora muri za gasutamo […]. Ubundi nko kuva ku cyambu cya Dar Es Salaam twakoreshaga iminsi itanu ariko ndizera ko bigiye kugabanuka ubu bizafata nk’itatu.”

Yakomeje asaba abandi bacuruzi batarahabwa ibi byemezo kuzamura ubunyangamugayo kuko ari bwo bugenderwaho bitangwa kugira ngo nabo bazabihabwe kugira ngo ubucuruzi bworoherezwe Abanyarwanda benshi.

RRA ishyikiriza abacuruzi ibyemezo byo kwinjiza ibicuruzwa bitagenzuwe
Abacuruzi bahabwa ibyangombwa byo kwinjiza ibicuruzwa bitagenzuwe nyuma yo kugaragaza ko ari inyangamugayo
Minisitiri w’Ubucuruzi n’Inganda, Vincent Munyeshyaka
Komiseri wungirije muri RRA ushinzwe Gasutamo, Musoni William, yasobanuye ko mu guhitamo abo bacuruzi hagenzurwa ubuziranenge bw’ibyo bakora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza