U Bwongereza bwijeje u Rwanda ubufatanye mu bucuruzi

Yanditswe na Rabbi Malo Umucunguzi
Kuya 15 Gashyantare 2017 saa 10:22
Yasuwe :
0 0

Minisitiri Ushinzwe Uburasirazuba bwo hagati na Afurika muri Minisiteri y’Ububanyi n’amahanga mu Bwongereza, Tobias Ellwood, yijeje ubufatanye mu iterambere ry’u Rwanda, anabishingira ku kuba mu minsi mike hazatangira ingendo ziva mu Rwanda zikagera mu Bwongereza na RwandAir.

Ellwood yari mu Rwanda kuri uyu wa Gatatu, urugendo yahagiriye aturutse muri Repubulika iharanira Demokarasi ya Congo, aho yagiranye ibiganiro na Minisitiri w’Ububanyi n’amahanga w’u Rwanda, Louise Mushikiwabo.

Aganira n’itangazamakuru, Ministiri Ellwood yavuze ko we na Minisitiri w’Ububanyi n’Amhanga w’u Rwanda, Louise Mushikiwabo, bibanze ku butwererane hagati y’ibihugu byombi ndetse no mu karere u Rwanda ruherereyemo.

Ati “Muzi neza ko u Bwongereza bumaze igihe bunyura mu bintu byinshi nyuma gato yo kuva mu Muryango w’Ubumwe bw’ibihugu by’i Burayi. Ubu tubona ko ari amahirwe yo kurushaho gukorana n’ibihugu tumaze igihe dufitanye umubano ukomeye, kandi murabizi ko dufite gahunda ikomeye y’ubufatanye mu nkunga.”

Yakomeje agira ati “Ndetse nshingiye ku byo nabonye ubushize n’ibyo mbona ubu, mbona ko hari byinshi bikomeje gukorwa. Imihanda ya kaburimbo irubakwa, ibikorwaremezo n’ibindi, mbese iterambere riri kwihuta cyane. Turashaka rero ko tuva ku rwego rw’ubufatanye mu nkunga ahubwo tukajya mu rwego rw’ubufatanye mu bucuruzi.”

Tobias Ellwood, yanasuye Urwibutso rwa Jenoside rwas Kigali ruri ku Gisozi

Ubu bucuruzi Ellwood yagarutseho, yavuze ko u Rwanda ruri mu nzira yo kugura Airbus nshya izajya ikorera ingendo zihoraho mu Bwongereza, ku buryo umuntu azajya ahaguruka mu Rwanda akagera mu Bwongereza nta handi ahagaze.

Uyu muyobozi yanasuye urwibutso rwa Jenoside yakorewe Abatutsi rwa Kigali ku Gisozi, asobanurirwa byrwimbitse amateka yayo, anavuga ko ibihugu bigomba gukomeza gukora ibishoboka ngo ibyabaye mu Rwanda mu 1994 bitazasubira ukundi.

U Bwongereza busanzwe bufatanya n’u Rwanda mu mishinga itandukanye irimo uburezi, ubuhinzi n’ubworozi, ubuzima n’imibereho myiza y’abaturage binyuze mu kigega DFID.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza