U Rwanda na RDC byatangije umushinga wo koroshya ubucuruzi bwambukiranya imipaka

Yanditswe na Kanamugire Emmanuel
Kuya 22 Ukwakira 2016 saa 10:59
Yasuwe : XX
0

Minisitiri w’Ubucuruzi, Inganda n’Umuryango w’Afurika y’Iburasirazuba hamwe na Minisitiri w’Ubucuruzi wo muri Repubulika Iharanira Demokarasi ya Congo batangiye umushinga uhuriyeweho n’ibihugu byombi, ugamije kuzamura ubucuruzi bwambukiranya imipaka hubakwa ibikorwaremezo.

Ni igikorwa cyabereye mu mujyi wa Bukavu muri Repebulika Iharanira Demokarasi ya Congo kuri uyu wa Gatanu tariki ya 21 Ukwakira 2016.

Minisitiri w’Ubucuruzi muri Repubulika Iharanira Demukarasi ya Congo, Néfertiti Ngudianza Bayokisa Kisula yavuze ko uyu mushinga uzoroshya ubucuruzi ndetse ugabanye n’ubukene.

Ati “Uyu mushinga uzagabanya ibyahendaga mu gukora ubucuruzi, kugabanya ubukene ndetse uzamure guhangana.”

Minsitiri w’Ubucuruzi, Ingana n’Umuryango wa Afurika y’Iburasirazuba, François Kanimba yavuze ko uyu mushinga urimo ibikorwa bijyanye no kwagura ibibuga by’indege byegereye imipaka.

Yagize ati “ Kugira ngo ubucuruzi bwambukiranya umupaka bugende neza hari amasoko akenewe, imihanda n’ibiraro.Murebe nk’iki kiraro dufite ahangaha rimaze igihe cyaruzuye ariko nta modoka zigicaho kubera ko hakurya yacyo nta muhanda uhari, turizera ko mu gihe kitari kinini cyane iki kiraro kizakoreshwa.”

“Muri uyu mushinga ni ho hakubiyemo ibikorwa byo kwagura ibibuga by’indege biri hafi y’imipaka. Nk’ikibuga cyacu cya Kamembe kiri gutunganywa n’icya Bukavu na cyo muri uyu mushinga harimo ibizagikorwaho kugira ngo kirusheho kuba cyafasha mu rwego rwo guteza imbere ubucuruzi. Harimo no guteza imbere abakora ubucuruzi bwambukiranya imipaka, bashyirwa mu makoperative.”

Uyu mushinga wo koroshya ubucuruzi bwambukiranya imipaka “Great Lakes Trade Facilitation Project” uzamara imyaka 5, uzatwara miliyoni 60 z’amadorali y’Amerika, ukaba waratewe inkunga na Banki y’Isi. Ku ruhande rw’u Rwanda harimo miliyoni 26 na ho ku rwa RDC hakaba 34.

Minisitiri w'Ubucuruzi n'Inganda, Francois Kanimba, mugenzi we wa RDC hamwe n'abandi bayobozi ku mpande zombi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza