U Rwanda na Uganda mu bufatanye bworoshya ubucuruzi bwambukiranya umupaka

Yanditswe na Kanamugire Emmanuel
Kuya 18 Ugushyingo 2016 saa 10:08
Yasuwe :
0 0

U Rwanda na Uganda byemeranyijwe ko bigiye gukora uko bishoboye bikoroshya urujya n’uruza ku mupaka wa Kagitumba hagamijwe guteza imbere ubucuruzi bwambukiranya imipaka n’ubuhahirane hagati y’ibihugu byombi.

Ibi byemejwe ejo ku wa Kane Tariki ya 17 Ugushyingo 2016, ubwo Minisitiri w’Ubucuruzi n’Inganda n’Ibikorwa by’Umuryango wa Afurika y’Iburasirazuba, François Kanimba n’Umunyamabanga wa Leta ushinzwe ibikorwa by’Umuryango wa Afurika y’Iburasirazuba mu gihugu cya Uganda Julius Wandera Maganda,bahuriraga ku mupaka wa Kagitumba uhuza ibyo bihugu byombi baganira ku cyakorwa kugira ngo ubuhahirane burusheho gushinga imizi.

Bamwe mu bakora ubucuruzi bwambukiranya umupaka wa Kagitumba bashimye ubufatanye bw’ibihugu byombi byashyizeho gasutamo imwe, bavuga ko byaborohereje ndetse bakaba batagisiragira kuri uwo mupaka.

Umuyobozi w’Amakoperative akora ubucuruzi bwambukiranya imipaka mu ntara y’Iburasirazuba, Karangwa Scovia, avuga ko bishimira ko kuri uwo mupaka hashyizwe gasutamo imwe ( One Boarder Post) bikaba bitagisaba umucuruzi gusiragira ariko avuga ko hakiri imbogamizi.

Ati “ Mbere twajyaga kurangura tugaca mu tuyira tutemewe, none ubu turagenda tukagarukira igihe dushakiye, gusa twasabaga ko amasaha yakongerwa umupaka ukajya uba ufunguye igihe kirekire.”

Ibi bibazo byose ni byo aba bayobozi bombi bavuzeko biri mu byabazanye. Julius Wandera Maganda yavuze ko inama iteganyijwe muri Kenya mu minsi iri imbere izarangira baramaze kubonera ibisubizo ibyo bibazo.

Yagize ati “ Impamvu turi aha ni ukugira ngo tubwire abaturage akamaro k’Umuryango wa Afurika y’Iburasirazuba ariko kandi tunakureho imbogamizi zose zibuza abaturiye ibi bihugu gukora ubucuruzi bwambukiranya imipaka, turi kubiganiraho kandi mu minsi mike ibigihari bizaba byamaze gukurwaho.”

Minisitiri Kanimba yavuze ko u Rwanda na Uganda bafitanye imikoranire myiza ariko yongeraho ko bagiye kurushaho kuganira bakareba icyakorwa kugira ngo iyi mikoranire irusheho gutera indi ntambwe.

Yagize ati “ Turi hano kugira ngo turebere hamwe icyo twakora nk’ibihugu byombi kugira ngo ubuhahirane burusheho gutera imbere. Turakomeza rero tubiganireho kandi n’ibitaratungana neza turizera ko bizakemuka vuba.”

Minisitiri Kanimba yagaragaje ko ubuhahirane buri hagati y’u Rwanda na Uganda bwateje imbere abaturage babyo ndetse bikaba byaranatumye buva ku madolari millioni 100 bwariho mu mwaka wa 2007 bukagera kuri miliyoni 265 mu mwaka wa 2015.

Ibi ngo byatewe no kuba haragiye hashyirwaho ingamba zoroshya urujya n’uruza ku mupaka, gukoresha indangamuntu ku bambuka, gukuraho umusoro ku bacuruza ibitarengeje amadolari 2000, gushyiraho gasutamo imwe n’ibindi.

Minisitiri w'Ubucuruzi, Inganda n'Ibikorwa by'Umuryango wa Afurika y'Iburasirazuba, Francois Kanimba n'abandi bayobozi
Minisitiri w'Ubucuruzi, Inganda n'Ibikorwa by'Umuryango wa Afurika y'Iburasirazuba, Francois Kanimba
Umunyamabanga wa Leta ushinzwe ibikorwa by'Umuryango wa Afurika y'Iburasirazuba muri Uganda, Julius Wandera Maganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza