Kwamamaza

Leta yasinyanye imihigo n’ibigo 19 yo kongera ibyoherezwa mu mahanga

Yanditswe kuya 24-11-2016 saa 16:42' na Cyprien Niyomwungeri


Leta y’u Rwanda ibinyujije muri Minisiteri y’Ubucuruzi, Inganda n’Ibikorwa by’Umuryango wa Afurika y’Iburasirazuba, Mineacom, yasinyanye amasezerano ari mu rwego rw’imihigo n’abacuruzi bohereza ibicuruzwa mu mahanga, mu rwego rw’ubufatanye bwo kongera umusaruro igihugu cyohereza hanze.

Iyi mihigo yasinywe hagati ya Guverinoma y’u Rwanda n’ibigo by’ubucuruzi 19 kuri uyu wa Kane tariki 24 Ugushyingo 2016, mu nama yahuje Mineacom n’ibigo byohereza ibicuruzwa mu mahanga.

Minisitiri wa Mineacom, François Kanimba yasobanuye ko iyi mihigo ishingiye ku kwiyemeza ingano y’umusaruro inganda n’ibigo bizohereza hanze, ndetse n’ubufatanye bwa leta mu gukemura ibibazo bahura na byo buri munsi.

Avuga ko izabafasha guhangana mu kongera umusaruro bafatanyije na leta bityo bagatahiriza umugozi umwe mu guhangana n’icyuho hagati y’ibyoherezwa mu mahanga n’ibivayo gikomeje gushegesha ubukungu bw’u Rwanda.

Yagize ati “Ni amasezerano asa n’imihigo twiyemeje gufatanya gukora, ntekereza ko ari uburyo bwiza bwo gukuraho ibyo kwitana ba mwana, aho bamwe bavuga ko bahura n’ibibazo leta ntibegere nayo ikabashinja kutongera umusaruro w’ibyoherezwa mu mahanga.”

Kanimba yemeza ko ayo masezerano y’imihigo ari igisubizo mu gihe abayagiranye bakurikirana ishyirwa mu bikorwa ryayo, bakubahiriza buri munsi ibiyarimo.

Félicien Mutalikanwa ukuriye abanyenganda, yavuze ko iyi mihigo ari umusaruro w’ibiganiro bakomeje kugirana na Guverinoma kandi izatuma habaho ubufatanye bityo habeho n’uburyo bwo gukurikirana ahari ibibazo.

Yagize ati “Azatuma habaho gusuzuma aho abasinye bageze, kandi dufite icyizere ko tuzabigeraho, ibitazagerwaho na byo tuzaba tuzi impamvu yabyo. Ni urugendo rwo kubaka urwego rw’ibyoherezwa mu mahanga bifite uruhare mu kwigira nk’igihugu.”

Mineacom itangaza ko mu myaka ibiri ishize agaciro k’umusaruro woherezwa mu mahanga utazamutse. Nk’umwaka ushize kazamutseho 1% gusa naho uyunguyu imibare y’amezi icyenda ashize yerekana ko kazamutseho 10% mu gihe u Rwanda rwifuza 28%.

Ivuga ko igiteye inkeke ni uko ririya zamuka naryo rituruka mu bicuruzwa u Rwanda rutikorera, kuko ahanini ari ibituruka hanze rukongera rukabigurisha ahandi birimo amavuta n’ibindi.

Ku rundi ruhande ariko hari intambwe yo kwishimira kuko ubucuruzi bwambukiranya mu karere bukomeje gutera imbere ubutitsa. Nko muri RDC, ibiganiro hagati y’impande zombi bimaze kubyara umusaruro kuko muri uyu mwaka ibyo u Rwanda rwoherezayo bimaze kuzamuka hafi 50%.Muri Uganda ibyo u Rwanda rwoherezayo biva mu nganda bimaze kuzamukaho hafi 15%.

Abacuruzi kandi banasabwe kubyaza umusaruro ikigega gifasha abohereza ibicuruzwa mu mahanga (EGF), kirimo ibyiciro bitatu byo kongera umusaruro, kunoza isoko no kohereza ibicuruzwa.

Umwaka wa mbere iki kigega cyarimo miliyoni 500 za leta na BRD ishyiramo miliyoni 500, ku mwaka wa kabiri leta yashyizemo miliyari na BRD ikaba igomba gushyiramo angana gutyo. Muri iki cyumweru u Rwanda rwasinye amasezerano na banki yo mu Budage, Kfw yo angana na miliyari 7.5 zizashyirwa muri icyo kigega. Kugeza ubu kikaba kirimo miliyari hafi 10 zitegereje abazikoresha.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved