Kwamamaza

Umujyi wa Kigali washwishurije abafite ibyapa byamamaza basabaga kwihanganirwa amezi 18

Yanditswe kuya 22-11-2016 saa 19:26' na Cyprien Niyomwungeri


Ubuyobozi bw’Umujyi wa Kigali bwakuriye inzira ku murima ihuriro Nyarwanda ry’abamamariza ku karubanda (ROAA), ryawusabaga kwihangana amezi 18 ku cyemezo wafashe cyo gukuraho ibyapa byamamaza mu mujyi wose.

Intego y’iki gikorwa ngo ni kunoza isuku, kubungabunga umutekano ndetse no kugira ngo ibyapa byamamaza bishakirwe umwanya mwiza mu Mujyi bibanje gukorerwa igishushanyo mbonera.

Iki cyemezo cyatangiye gushyirwa mu bikorwa n’ubuyobozi bw’Umujyi wa Kigali nyuma y’amabwiriza y’inama Njyanama y’umujyi wa Kigali N° 01/09 yo kuwa 15/09/2016 avugurura amabwiriza y’inama njyanama N° 05/12 yo kuwa 28/10/2012 agenga uburyo bwo kwamamaza yasohotse mu igazeti ya leta yo kuwa 17 Ukwakira 2016.

Ayo mabwiriza ateganya ko ibyapa bishinze cyangwa byometse byemewe mu Mujyi wa Kigali ari iby’ubwoko butatu ; ibyapa bya Elegitoroniki (Electronic/Digital), ibyapa byihindukiza (Tri-Vision) n’ibyapa biyobora abantu. Avuga ko ibindi byapa byose bitemewe.

Mu rwego rwo gushyira mu ngiro ayo mabwiriza umujyi wa Kigali wemeza ko mbere yakomeje kwirengagiza nkana n’abo yarebaga, kuwa 19 Ugushyingo 2016 itsinda ryaturutse muri njyanama y’umujyi wa Kigali ryamanuye ibyapa bitatu birimo icya Pan African Advertising na AFLink Business Consultants byamamazaga kompanyi y’indege ya KLM airlines, DSTV n’inzoga ya Tusker.

Ibi byakozwe nyuma y’ibaruwa umujyi wa Kigali wandikiye ROAA kuwa 14 Ugushyingo 2016, umenyesha ko ibyapa byose byamamaza bizamanuka keretse ibya elegitoroniki bibiri birimo icyo mu Giporoso n’icya Gishushu.

Ihuriro ROAA rivuga ko iki cyemezo cy’Umujyi wa Kigali kinyuranyije n’ubusabe bwari bwatanzwe mu biro bya Meya w’umujyi wa Kigali n’urugaga rw’abikorera (PSF) kuwa 15 Ugushyingo 2016, rusaba ko umujyi wa Kigali waba usubitse kumanura ibyapa byamamaza hakabanza kubaho kuganira na ba nyirabyo, baba abigenga n’abo muri leta.

Rivuga kandi ko umujyi wa Kigali wari ukwiye kwita ku cyemezo ubwabo bari yafashe cyo kubigabanya, aho kugeza ubu ibigera kuri 503 bimaze kumanurwa, bityo bakabagenera amezi 18 yo kunoza iyo gahunda neza.

Avuga kuri iki cyemezo cyo kumanura ibyapa, Umuyobozi wa ROAA,Vianney Kabera yavuze ko kizagira ingaruka zikomeye kuri ba nyirabyo n’abakiriya babikuragaho amakuru.

Yagize ati “Niba ibi byapa byose bivuyeho, ntabwo ari abakiriya bacu bazabura uko bamamaza ahubwo n’abanyamuryango bacu bazahomba kandi n’ikigo cy’Igihugu cy’imisoro n’amahoro bikigireho ingaruka.”

Nibura abanyamuryango batatu ba ROAA aribo Akagera Business Group, Pan African Advertising na AFLink, bafite ishoramari muri ibi bikorwa ringana na miliyoni 983.

Kabera avuga ko muri rusange ibi byapa nibabimanura, hari miliyoni 436 z’imisoro zizabura n’amagana y’abaturage bahabwaga akazi bakabure n’izindi ngaruka. Aha niho bahera basaba ko umujyi wa Kigali wabihanganira bakanoza imikorere.

Ati “Icyo dusaba ni uko umujyi wa Kigali utugirira ibambe ukaduha amezi 18 kugirango turangize amasezerano twari dufitanye n’abakiriya bacu, kandi bakatwemerera kuvugurura imikorere yacu dukurikije amabwiriza y’umujyi.”

Umujyi wa Kigali wateye utwatsi ubu busabe

Mu kiganiro Meya w’Umujyi wa Kigali, Mukaruliza Monique yagiranye na IGIHE, yavuze ko ibyo ROAA isaba bidashoboka kuko guhera kera birengagije nkana ariya mabwiriza bituma njyanama y’umujyi iyavugurura bityo akaba agomba kubahirizwa.

Avuga ko nta kindi gihe bahabwa kuko kuva mu Ukuboza umwaka ushize bahawe amezi atandatu ngo bubahirize ibyo basabira andi mezi 18 bikananirana.

Yagize ati “Twabahaye igihe gihagije kugirango bubahirize ibiteganywa, abari mu ihuriro bandikiwe n’uturere, bigaragara ko batubahirije amabwiriza ya njyanama. Twagiye tubongerera igihe ariko ntibabikora, kumva ko uyu munsi bongeye gusaba ikindi, baba birengagije amabwiriza yagiyeho.”

Ku bijyanye n’intambwe n’ubushake ihuriro ryari ryagaragaje rigakuraho bimwe mu byapa, Mukaruliza yavuze ko abasaba kongerwa igihe aria bantu barindwi bijeje umujyi ko bagiye kubikuraho bakagenda bagakuraho iby’abandi ibyabo bakabireka. Yemeza ko babahaye amezi 18 basaba bagakomeza gukora kandi iby’abandi byaravuyeho, nta butabera bwaba burimo.

Ati “Tugomba kubahiriza amabwiriza ya njyanama mashya. Ntabwo twayabongera kuko babonye igihe gihagije ahubwo bakagombye kuba barabikuyeho.”

ROAA ni ihuriro rigizwe n’ibigo bikora akazi ko kwamamaza bigera kuri 15 aribyo; Datapro Graphics, Pan African Advertising, Akagera Business Group, AfLink Advertising, Creativity Beyond, MRD outdoor, Grand Media, Alpha Media, Cides Media, UR multibusiness, Alliance Media, Irony Media, Select Kalaos na Brandactive.

Umuyobozi w'Umujyi wa Kigali, Monique Mukaruliza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved