Umwiherero wanzuye kurushaho gushyira imbere ‘Made in Rwanda’ mu mitangire y’amasoko

Yanditswe na Rabbi Malo Umucunguzi
Kuya 5 Werurwe 2017 saa 10:30
Yasuwe :
0 0

Minisiteri y’imari n’igenamigambi yatangaje ko hari gushyirwa imbaraga mu guteza imbere ibikorerwa mu gihugu, harimo no kuvugurura itegeko rigenga amasoko ya leta ngo ibikorerwa mu Rwanda bihabwe umwanya uhagije ku masoko.

Ubwo Umukuru w’Igihugu yasuraga igice cyagenewe inganda mu Mujyi wa Kigali, kuwa 7 Gashyantare 2017, yagaragaje ko ababajwe n’ishoramari riri gukorwa, ariko ugasanga hari ibyo bakora ntibihabwa agaciro gakwiye, ahubwo hakagurwa cyane ibitumizwa mu mahanga binahenze kurushaho.

Icyo gihe yagize ati “Abantu bashinzwe imitangire y’amasoko ndaza kurwana namwe rwose, gutanga amasoko bigirana ikibazo na Made in Rwanda ntabwo mbyemera. Namwe ntimwari mukwiye kubyemera.”

Mu kiganiro n’abanyamakuru kuwa Gatanu w’iki cyumweru kivuga ku byagarutsweho mu mwiherero w’abayobozi bakuru, Umunyamabanga wa Leta ushinzwe igenamigambi muri Minisiteri y’Imari n’igenamigambi, Dr. Uzziel Ndagijimana, yavuze ko Minisiteri y’imari n’igenamigambi yatanze amabwiriza mu nzego za leta zose, zisobanura uburyo itegeko ririho uyu munsi ryakoreshwa kugira ngo ibikorerwa mu Rwanda bihabwe amahirwe kurushaho mu bijyanye n’amasoko ya leta.

Yagize ati “Burya harimo nka 10% rituma ukorera mu gihugu iyo apiganwa n’ukorera hanze, we kuri we aba afite akarusho ka 10%. Ni ukuvuga ngo ukorera mu gihugu ashobora kurenzaho nka 9% ku giciro cye kandi akaba ariwe utsindira isoko kubera ko afite rya 10% ry’inyongera y’amahirwe kuko akorera mu gihugu.”

Dr Ndagijimana yavuze ko hariho n’urwego rugenga amasoko ya leta, rufite ububasha bwo kwemerera urwego rubisabye kuba rwagura ibikorerwa mu Rwanda bitanyuze mu ipiganwa, igihe babisabye kandi bagatanga n’ibisobanuro.

Ikindi cyakozwe kandi kizanakomeza ngo ni ukorohereza abashoramari bakorera mu gihugu harimo gukuriraho imisoro ibyinjira mu gihugu nk’imashini n’ibicuruzwa bitarangije gutunganywa, kugira ngo byifashishwe mu nganda zo mu gihugu.
Yakomeje agira ati “Biratuma rero igiciro cy’ibikorerwa mu Rwanda kimanuka. Ikindi muzi ko guhera mu kwezi kwa mbere k’uyu mwaka, igiciro cy’amashanyarazi cyaramanutse kandi cyamanutse cyane ku nganda. Kugira ngo abashoramari bakorera mu gihugu boroherwe, ariko n’ibicuruzwa bibashe kugura make ugereranyije n’ibivuye hanze.”

Yagize ati “Ikindi harimo kwihutisha kubaka biriya bice byagenewe inganda, kugira ngo ibikorwaremezo byose bigeremo, ushaka kubaka uruganda bimworohere ndetse muri Special Economic Zone ya Kigali, ho uretse ibikorwa remezo, hanubakwa n’inzu z’inganda ku buryo uwaza, yazana imashini ye agahita atangira gukora adafashe umwanya muremure wo kubanza kubaka, ibyo nabyo birimo birakorwa.”

Dr Ndagijimana yavuze ko abanyenganda nabo bakwiye gushyira imbaraga mu kumenyekanisha ibyo bakora, kuko ngo hari nk’ibikorerwa mu Rwanda abantu benshi ntibabimenye, cyangwa bakabigura ku masoko batazi ko ikorerwa mu Rwanda.

Yatanze urugero ku ma murikagurisha abiri yabaye muri Gashyantare n’Ugushyingo 2016, hagamijwe kugaragaza ibikorerwa mu gihugu, icyo gihe ngo abayitabiriye benshi baratunguwe bati ‘ntitwari tuzi ko mu Rwanda dufite ibikorwa bingana kuriya’.

Yanavuze ko hakomeje guhugura abantu bakora ibintu bitandukanye ahanini bikomoka ku mpu nk’inkweto n’ubudozi, no kubashyira hamwe ngo bahuze imbaraga zishobora guhaza isoko u Rwanda rufite.

Abanyarwanda bari mu kazi mu ruganda rw'imyenda

Indi nkuru wasoma:Perezida Kagame yiyemeje gukurikirana imitangire y’amasoko idaha umwanya ‘Made in Rwanda’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza