Ngoma : Indimi z’amahanga, imbogamizi ku bucuruzi

Ngoma : Indimi z’amahanga, imbogamizi ku bucuruzi


Yanditswe kuya 6-01-2013 - Saa 16:41' na Faustin Nkurunziza

Abacuruzi bo mu karere ka Ngoma mu murenge wa Kibungo, bavuga ko kutamenya indimi z’amahanga, Icyongereza n’Igiswahili zikunze gukoreshwa mu Muryango wa Afurika y’Iburasirazuba (EAC), ari imbogamizi zibakomereye cyane.

Nk’uko bitangazwa na bamwe mu bacuruzi, bavuga ko kujya kurangura ibicuruzwa nko muri Tanzania, Kenya na Uganda batazi Igiswahili n’Icyongereza, bibagora.

Musabyimana Elia umucuruzi mu murenge wa Kibungo, avuga ko kuba u Rwanda ruri mu muryango wa EAC ari ishema, kuko ibicuruzwa biboneka ku mafaranga make, ndetse n’umusoro ukaba waragabanyijwe ku bicuruzwa bikorerwa mu bihugu bwurimo. Ikindi kandi, no kubona ibyangobwa byo kujya muri byo bihugu bikaba bitagoye.

Musabyimana avuga ko ubu byoroshye kujya kurangurira mu bihugu nka Kenya na Uganda, aho avuga ko n’ubucuruzi bwaho bwateye imbere.

Musabyimana avuga ko n’ubwo ubucuruzi bukomeza kugenda butera imbere muri aka karere ; hakiri ikibazo cyo kutamenya ururimi ku bacuruzi bamwe na bamwe. Avuga ko umucuruzi atakora ubucuruzi bwe neza atamenye indimi zikoreshwa ku isoko.

Yagize ati " Hari nk’igihe umucuruzi akenera icumbi no kuvugana n’abandi, bikaba ikibazo iyo atazi indimi zaho kuko usanga y’ifashisha abazizi.”

Iyo ngo bagiye kurangurira nko mu bindi bihugu bagomba kwifashisha Abanyarwanda baba muri ibyo bihugu mu kubasemurira, bakabishyura amafaranga atari make.

Bavuga ko mu rwego rw’imihahiranire ku ibihugu byo muri EAC, hagakwiye kubaho abashora amafaranga yabo mu kwigisha indimi.

Ikindi n’uko zikenewe ku isoko ryo muri uy’umuryango. Kuko byabafasha kurushaho kujijuka no kumvikana n’abandi baturage bo muri ibyo bihugu.

Uyu mucuruzi asanga indimi zikoreshwa mu bucuruzi zikwiye kwigwa, cyane cyane nk’Igiswahili, Icyongereza ndetse n’Ikigande. Cyakora avuga ko hari abacuruzi bamwe na bamwe bagerageza kwiga kuvuga ururimi rw’ikigande, kuko rwo rutagoye cyane nk’izindi.

Umuyobozi w’akarere ka Ngoma Nambaje Aphrodise ubwo yarahiraga kuyobora aka karere ku wa 31 Gicurasi 2012, yavuze ko mu byo azibandaho harimo no guteza imbere indimi kugira ngo abaturage babashe guhahirana n’ibindi bihugu no kongera ubumenyi muri rusange bw’abaturage bo mu karere ka Ngoma.


Foto/Faustin

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO