Abahinzi bo mu Rwanda barasabwa gushyigikira ubwishingizi  mu buhinzi

Abahinzi bo mu Rwanda barasabwa gushyigikira ubwishingizi mu buhinzi


Yanditswe kuya 12-10-2012 - Saa 01:34' na Noël Turikumwe

Minisiteri y’Ubuhinzi n’Ubworozi, ku wa kane tarki 11 Ukwakira, yatangije igikorwa cyo gufasha abahinzi kumenya gushyira ibikorwa byabo mu bwishingizi, biteganyiriza impanuka zishobora guturuka ku ihindagurika ry’ikirere, izuba ryinshi cyangwa imvura ikabije.

Minisiteri y’Ubuhinzi n’Ubworozi (MINAGRI), izafashwa na “Syngeta Foundation” isanzwe ikorana n’abahinzi bo muri Kenya kongera umusaruro no kubafasha mu byo gushingana ubuhinzi.

Minisitiri w’Ubuhinzi n’Ubworozi, Kalibata Agnès, yasobanuye ko uburyo bw’ubwishingizi buje nyuma yo kubona ko abahinzi bo mu Rwanda bagira ibibazo bituruka ku kirere. Iyo gahunda ikazatuma abahinzi bagirirwa icyizere n’amabanki mu kubaha inguzanyo mu buhinzi.

Umuyobozi wa Syngenta Foundation,Marco Ferroni, yavuze ko ubu mu Rwanda bakorana n’abahinzi baba muri gahunda ya Tubura, igamije gutanga inyongeramusaruro no gufasha abaturage kubona umusaruro mwiza.

Yavuze kandi ko bazakwirakwiza ibyuma byikoresha (automated) bipima uko ikirere cyagenze mu gihembwe cy’ihinga, bakamenya niba imyaka yararumbijwe n’ikirere n’icyo abahinzi bazishyurwa.

Ku kibazo cy’ingano y’amafaranga abahinzi bazajya bishyura mu gushingana imyaka yabo, nta mubare ufatika ugaragazwa.

Abahagarariye Syngenta foundation, bavuga ko biterwa n’uko agace ukora ubuhinzi akoreramo, kibasirwa n’ikiza yashinganishijeho ubuhinzi bwe.

Uburyo amafaranga y’ubwishingizi azajya atangwa, bavuze ko niba abantu batse ubwishingizi ku kibazo cy’izuba ryinshi, umuhinzi uri mu gace gakunze kwibasirwa n’izuba cyane ariwe uzatanga amafaranga menshi.

Niyonshuti Bernardine yari ahagarariye abahinzi bo mu karere ka Huye, Umurenge wa Rusatira, bari muri gahunda ya Tubura, bakaba baratangiye gushingana ubuhinzi bwabo.

Niyonshuti yavuze ko kuzigamira ubuhinzi bwabo byabafashije, anavuga ko bitabatwara amafaranga menshi.

Niyonshuti yagize ati ”tumaze umwaka turi mu bwishingizi, kandi amafaranga dutanga si menshi, umuntu atanga igihumbi ku mwaka, imyaka yakwangirika, bakamusubiza ayo yaguze amafumbire n’abahinzi yakoresheje ahinga umurima we”.

Nyamara n’ubwo ubu bwishingizi buje, imibare igaragaza ko usibye ubwishingizi ku ndwara, ubundi bwishingizi bukiri hasi ku kigereanyo cya 3%.

Minisitiri Kalibata yavuze ko bazasobanurira abaturage bihagije mu kumvikanisha ibyiza byo kujya mu bwishingizi.

Minisitiri yavuze ko iyo Ibiza byibasiye agace runaka, ingamba zifatwa zitarobanura gusa abashinganishije ubuhinzi.

Iyi gahunda nshya ntabwo izakora ku bihingwa byose, ku ntangiriro ubwishingizi buzareba ku bishyimbo n’ibigori. Gusa bavuze ko nyuma bazajya bongeramo n’ibindi bihingwa.

Syngenta nayo igaragara nk’itarasobanukira abahagarariye ibigo byari byitabiriye itangizwa ry’igikorwa.

Abo muri BNR bibajije niba ije nk’ikigo cy’ubwishingizi, abo muri serivisi y’ubumenyi bw’ikirere babaza uko bazajya bakorana, cyangwa niba abahinzi bazajya bagendera ku bipimo bya Syngenta byonyine.

Syngenta izajya ikorana n’ibigo by’ubwishingizi bikorera mu Rwanda ikabihuza n’abahinzi bakorana.

Minisitiri Kalibata yavuze ko hazafatwa umwanya wo kwicarana n’ibigo byose birebwa n’uyu mushinga, bagasobanukirwa birenzeho.

Syngenta isanzwe ikorana n’abahinzi ikabageza ku bwishingizi. Imze gushyira mu bwishingizi abahinzi 73.000 muri Kenya. Rwanda abafite ubwishingizi mu buhinzi ni 25 gusa.

Uyu mushinga wo gushingana ubuhinzi, uturutse muri Kenya, ku izina rya “Kilimo Salama” bakaba bari kuwushakira irindi zina mu Kinyarwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO