CMA yungutse gahunda izatyariza ubumenyi abakora mu isoko ry’imari n’imigabane

Yanditswe na IGIHE
Kuya 26 Mata 2019 saa 10:06
Yasuwe :
0 0

U Rwanda rwungutse gahunda nshya izafasha abari mu rwego rw’imari kwiyungura ubumenyi no kuzamura ubushobozi bw’imikorere ku isoko ry’imari n’imigabane mu gihugu.

Iyi gahunda yatangijwe n’Ikigo gishinzwe Isoko ry’Imari n’Imigabane (CMA) gifatanyije n’icyo mu Bwongereza gitanga Ubumenyi mu by’Imari, Chartered Institute for Securities & Investment, CISI n’icy’Ubugenzuzi ku isoko ry’imari n’imigabane muri Afurika kiri i Nairobi, FSDA (Financial Sector Deepening Africa).

Itangizwa ry’iyi gahunda yamuritswe ku wa 25 Mata 2019, rije nyuma y’amasezerano y’ubufatanye yashyizweho umukono mu 2016 hagati ya CMA na CISI.

Mu myaka yashize CMA yifashishaga abanyamahanga bafite ubushobozi mbere yo kunguka abigishijwe n’ikigo gifite ububasha n’ubushobozi.

Ayo masezerano yafunguriye Abanyarwanda imiryango yo kwiga amasomo ajyanye n’iby’isoko ry’imari n’imigabane mu rugendo rwo kuba abanyamwuga no kuzamura urwego rw’imari mu gihugu.

Kuva yasinywa, Abanyarwanda 25 bahawe amahugurwa y’isomo rya mbere muri CISI rivuga ku ‘Iriburiro ku isoko ry’imari n’imigabane n’ishoramari (Introduction to Securities and Investment.)

Gahunda nshya yatangijwe izafasha CMA gutangira impamyabushobozi mu by’isoko ry’imari n’imigabane mu Rwanda.

U Rwanda rwabaye urwa munani muri Afurika rutangijwemo iyo gahunda izwi nka ‘CISI Market Certification Programme], iha ubumenyi bwisumbuye abakora mu isoko ry’imari n’imigabane n’abanyotewe kurigana.

Umuyobozi wa CMA, Eric Bundugu, yavuze ko isoko ry’Imari n’imigabane risaba abarikoramo kugira ubumenyi bwihariye kuko ari urugingo rw’iterambere ry’ubukungu.

Yavuze ko “U Rwanda ntirushaka gusigara inyuma, ni yo mpamvu twatangije iyi gahunda ngo natwe tugire ubumenyi bwisumbuyeho.’’

Aya masomo azatangwa n’Ikigo gitanga Ubujyanama mu by’Icungamutungo cya Cornerstone and Luthian.

Abazahugurwa bazajya bakora ibizamini byo kuri internet byateguwe na Kaminuza y’u Rwanda, Ishami ry’Imari n’Amabanki, CBE.

Iyi gahunda mpuzamahanga izongera ubushobozi abakora mu isoko ry’imari n’imigabane ndetse abikorera ku giti cyabo n’abanyeshuri bashaka kuyigana ntibahejwe kuko yongera ubushobozi bwo gutanga serivisi zinogeye abashoramari.

Umuyobozi wungirije w’Inama Ngishwanama ya CMA, akaba anashinzwe Iterambere ry’Ubukungu muri Minisiteri y’Imari n’Igenamigambi, Rwigamba Eric, yavuze ko imikoranire na CISI igamije kongerera ubushobozi abari mu rwego rw’imari.

Ati “Iyo hari isoko ry’imari n’imigabane rikora neza, abashoramari bariyongera. Imwe mu nzira yo kubona amafaranga yo guteza imbere ibikorwa na gahunda bya Leta hagamijwe iterambere ry’igihugu, ni uguha imbaraga isoko ry’imari n’imigabane.”

U Rwanda rwihaye intego yo kuzamura ubukungu bwarwo bukava ku rwego rw’ibihugu bikennye rukagera mu biyingayinga ibikize mu 2035 no kugera mu bikize mu cyerekezo cya 2050.

Umunyamabanga wa Leta muri Minisiteri y’Imari n’Igenamigambi ushinzwe Igenamigambi, Dr. Uwera Claudine, yavuze ko isoko ry’imigabane ryitezweho no guhindura imyumvire ku nyungu zo kurishoramo amafaranga.

Yavuze ko kongerera ubushobozi abakora mu isoko ry’imari n’imigabane ari iturufu ku kuzamuka kw’abaryitabira no kugera ku bukungu bw’igihugu budaheza.

Ati “Kongera ubunararibonye ku isoko ry’imari n’imigabane mu Rwanda biziye igihe, ubwo turi mu cyiciro cya mbere cyo gushyira mu bikorwa ibikubiye mu byiyemejwe CMA.’’

Umuco wo kuzigama uri muri gahunda y’Igihugu yo kwihutisha iterambere (NST1), 2017-2014 n’icyerekezo cya 2050, cyo kubaka u Rwanda nk’igicumbi cy’ubukungu riganisha ku iterambere ry’ishoramari.

Umuyobozi wa CMA, Eric Bundugu, yavuze ko isoko ry’imari n’imigabane risaba abarikoramo kugira ubumenyi bwihariye kuko rifite uruhare rukomeye mu iterambere ry'ubukungu bw'igihugu
Umuyobozi wungirije w’Inama Ngishwanama ya CMA, akaba anashinzwe Iterambere ry’Ubukungu muri Minisiteri y’Imari n’Igenamigambi, Rwigamba Eric, yavuze ko imikoranire na CISI igamije kongerera ubushobozi abari mu rwego rw’isoko n'imigabane
Umuyobozi mu Kigo cya Cornerstone and Luthian, Simeon Khataka, ubwo yagezaga ubutumwa ku bitabiriye iki gikorwa
Umunyamabanga wa Leta muri Minisiteri y’Imari n’Igenamigambi ushinzwe Igenamigambi, Dr. Uwera Claudine, yavuze ko isoko ry’imigabane ryitezweho guhindura imyumvire ku nyungu zo kurishoramo amafaranga
Umujyanama Mukuru mu Kigo cyo mu Bwongereza gitanga Ubumenyi mu by’Imari, Chartered Institute for Securities & Investment, CISI, yashimye itangizwa rya gahunda yayo mu Rwanda n’umusanzu wa FSD Africa mu kuyigenzura
Iki gikorwa cyitabiriwe n'abayobozi mu nzego zitandukanye mu by'imari

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza