SORAS na SAHAM byahindutse ikigo kimwe cy’ubwishingizi

Yanditswe na Ishimwe Israel
Kuya 1 Gashyantare 2019 saa 01:04
Yasuwe :
0 0

Sanlam yo muri Afurika y’Epfo yari iherutse kugura imigabane ya Soras, yongeyeho no kugura iya Saham byombi bibyara ikigo kimwe cy’ubwishingizi.

Sanlam ni Sosiyete y’Ubwishingizi yo muri Afurika y’Epfo yashinzwe mu 1918. Yari iherutse gushora imari ya miliyoni 24.3 z’amadolari mu igurwary’imigabane 63 % ya Soras.

Yaje kuyegukana burundu mu 2017 ubwo yaguraga imigabane yari isigaye, iba Sosiyete ya mbere y’Ubwishingizi mu Rwanda, ifite isoko ringana na 35% n’umutungo ubarirwa muri miliyoni $50.1, akabakaba miliyari 45 Frw.

Ku rundi ruhande mu 2014 SAHAM yo muri Maroc yinjiye ku isoko ry’u Rwanda, igura imigabane muri CORAR ihita inahindura izina yitwa SAHAM Assurance Rwanda Limited.

Kuri ubu, imigabane yose ya SAHAM Assurance Rwanda Limited yaguzwe na Sanlam yari isanganywe Soras; biza no kwemezwa ko ibi bigo byombi bihinduka ikigo kimwe cy’ubwishingizi.

Itangazo rihuza izi sosiyete ryashyizweho umukono ku wa 30 Mutarama 2019, ryasinyweho n’abayobozi b’Inama z’Ubutegetsi, Shumbusho Rurangirwa Vianney wa SORAS Assurances Générales Limited na Padiri Ganza Gasanana Jean Baptiste wa SAHAM Assurance Rwanda Limited.

Rigira riti “Abagize inama z’ubutegetsi za SORAS Assurances Générales Limited na SAHAM Assurance Rwanda Limited bishimiye kumenyesha abishingiwe n’izo sosiyete, abafatanyabikorwa na rubanda muri rusange ihuza riteganyijwe hagati ya sosiyete zombi.”

“Iki cyemezo kije gikurikira igikorwa giheruka cy’igurwa ry’imigabane cyabaye hagati ya SANLAM Group na SAHAM Group cyatumye sosiyete zihuzwa, zigenzurwa mu buryo busesuye na SANLAM.”

Sanlam Group iri mu bigo bikomeye muri Afurika muri serivisi z’ishoramari n’ubwishingizi. Yatangirijwe i Cape Town muri Afurika y’Epfo mu 1918 ariko mu 2014 igura imigabane 63% muri SORAS. Nyuma y’imyaka ine yaguze indi yose yari isigaye ihita iyegukana burundu.

Itangazo rivuga ko nyuma yo guhuza izi sosiyete, imitungo n’imyenda yose ya SAHAM Assurance Rwanda Limited irimo amasezerano y’ubwishingizi agifite agaciro n’inshingano ziyashamikiyeho bizegurirwa SORAS Assurances Générales Limited ari nayo sosiyete izasigara.

Rikomeza riti “Abasanzwe bishingiwe na SAHAM Assurance Rwanda Limited bazahita bahinduka abishingiwe na SORAS Assurances Générales Limited nta mpaka.”

Iri huzwa kandi ryanagize impinduka mu bwishingizi bw’ubuzima aho abishingiwe na SAHAM Assurance Vie Rwanda Limited bazahinduka aba SORAS Vie Limited nyuma yo kuzuza ibigenwa n’amategeko.

Itangazo rivuga ko rizareba ku mitungo n’imyenda yose ya SAHAM Assurance Vie Rwanda Limited yaba amasezerano y’ubwishingizi agifite agaciro n’inshingano ziyashamikiyeho bizegurirwa SORAS Vie Limited.

Ihuzwa ry’izi sosiyete ryitezweho uruhare mu guhanga udushya no gufasha abafatanyabikorwa bose kunogerwa na serivisi z’ubwishingizi bahabwa.

Banki Nkuru y’u Rwanda (BNR) yemeje ko nta kibazo kiri mu ihuzwa ry’izi sosiyete rizasozwa nyuma yo kubahiriza ibiteganywa n’a mategeko n’amabwiriza abigenga. Ihuzwa riteganyijwe kurangira bitarenze ku wa 31 Werurwe 2019, mu gihe ryatangiye kugira inkurikizi kuva ku wa 1 Mutarama 2019.

SORAS GROUP yari ikigo cy’Ubwishingizi cyigenga mu Rwanda cyashinzwe ku wa 2 Nyakanga 1984 gitangira imirimo ku wa 15 Ugushyingo 1984.

Ku wa 27 Nzeri 2010, cyabyaye ibigo bibiri birimo SORAS Assurances Generales Limited na SORAS VIE Limited. SORAS Vie Ltd itanga ubwishingizi bushingiye ku kugoboka umuryango, ubw’ubuzima bw’abakozi, inguzanyo, amashuri y’abana buhabwa umuntu ukora ariko utarengeje imyaka 60, ubw’izabukuru, gushyingura n’ubundi.

Umutungo mbumbe wacyo wavuye kuri miliyari zisaga umunani mu 2010, ugera ku zisaga 18 z’amafaranga y’u Rwanda mu 2017.

Sanlam yaguze n’indi migabane ya Saham mu bindi bihugu

Mu 2018, Sanlam yari isanzwe ifite imigabane ingana na 46.6% muri Saham, yashoye agera kuri miliyari y’amadolari igura 53.37% yari isigaye; ihita yegukana iki kigo burundu.

Iri gurwa rya Saham ryatumye amashami yari ifite hose muri Afurika ajya mu maboko y’aba bashoramari bo muri Afurika y’Epfo. Byahesheje Sanlam ubushobozi bwo gukorera mu bihugu 33 bya Afurika, mu mashami arenga 700 afite abakozi 3000 n’inyungu ku mwaka ya miliyari 1.6 y’amadorali.

Sanlam ni ikigo gikomeye muri Afurika mu bwishingizi kuko ubu ifite amashami mu bihugu 33

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza