Umwihariko wa konti zo kwizigamira zitangwa na BPR

Yanditswe na Rabbi Malo Umucunguzi
Kuya 13 Kamena 2019 saa 05:14
Yasuwe :
0 0

Ubushakashatsi buheruka ku buryo Abanyarwanda bagerwaho na serivisi z’imari, mu 2016 bwerekanye ko 89% bagerwaho n’izi serivisi, umubare warengaga intego ya 80% yari yarahigiwe mu 2017.

Nta gushidikanya ko iyi mibare ubu imaze kuzamuka cyane, ariko igiteye inkeke ni uko 27% gusa by’Abanyarwanda ari bo bonyine bakorana na banki. Mu myaka itatu ishize, 72% by’Abanyarwanda bizigamaga bakoresheje uburyo nk’ibimina n’amatsinda yo kugurizanya.

Guverinoma y’u Rwanda imaze igihe ishora imari inakora ubukangurambaga mu kwegereza Abanyarwanda serivisi z’imari, hanashingwa ibigo by’imari iciriritse nk’Umurenge Sacco.

Banki y’Abaturage y’u Rwanda Plc. imaze kugira ubuzobere mu gufasha Abanyarwanda kwizigamira no kubona inguzanyo, aho yabonye Izuba mu 1975 ubwo abaturage ba Nkamba mu Ntara y’Iburasirazuba, bishyiraga hamwe ngo bafashanye kugera kuri serivisi z’imari zatuma babasha guteza imbere imibereho yabo.

Izamuka ry’ubwizigame bwabo ryatumye mu 1986 hashingwa "Union des Banques Populaires du Rwanda (UBPR) yabyaye banki ikomeye ihiga izindi mu kugaba amashami hirya no hino.

Na nyuma y’imyaka isaga 40, BPR ikomeje kuba ubukombe mu kwegereza abaturage serivisi z’imari, ari nako ishishikariza abaturage kurushaho kwizigamira bakongera n’amahirwe mu buryo bakoranamo na banki.

Mu 2017 nibwo mu rwego rwo kurushaho gufasha Guverinoma y’u Rwanda kugeza serivisi z’imari ku baturage, BPR Plc yakoze ubukangurambaga bw’amezi atatu bugamije kwigisha abanyarwanda umuco wo kuzigama, aho abakiriya bizigamiye muri iyi banki babonaga amahirwe yo guhabwa ibihembo bitandukanye. Ubwo bukangurambaga bwiswe “Hirwa Ugwize Na BPR.”

Ni ubukangurambaga bwasabaga umuntu kubitsa guhera ku bihumbi 100 Frw kuzamura muri banki mu gihe cy’amezi atatu akayagumishaho, ubundi umunyamahirwe agatsindira ibihembo byiyongera ku nyungu abakiliya babona ku mafaranga babikije muri BPR.

Ibyo byose bijyana n’urwunge rwa konti zo kwizigama umuntu ashobora gufunguza muri BPR, akazigamira ahazaza ndetse akiyongerera amahirwe yo guhabwa inguzanyo zimufasha guteza imbere ibikorwa bye, cyangwa kugera ku ndoto ze.

- Konti yo kuzigama ya Gwiza

Ni konti y’umuntu ku giti cye, aho kwizigamira kuri iyi konti bitangizwa nibura amafaranga 5,000. Igipimo cy’inyungu zibariwe ku mwaka ni 8%.

Inyungu zibarirwa buri kwezi ku mafaranga make ari kuri konti zikishyurwa rimwe ku mwaka. Umukiriya ashobora kubikuza kugeza kuri 40% by’amafaranga abitse rimwe mu gihembwe.

- Konti yo kuzigama ya Hirwa

Iyi ni konti yo kuzigama yo igenewe amatsinda. Kwizigamira kuri iyi konti bitangizwa nibura amafaranga 20,000, igipimo cy’inyungu zibariwe ku mwaka ni 4%. Inyungu zibarirwa buri kwezi ku mafaranga make ari kuri konti zikishyurwa rimwe ku mwaka.

Umukiriya ashobora kubikuza kugeza kuri 40% by’amafaranga rimwe mu kwezi.

- Konti yo kuzigama ya Giricumbi

Iyi ni konti yo kuzigama igenewe umuntu uba mu mahanga. Kwizigamira kuri iyi konti bitangizwa nibura 100,000 Frw, igipimo cy’inyungu zibariwe ku mwaka ni 3%.

Inyungu zibarirwa buri kwezi ku mafaranga make ari kuri konti zikishyurwa rimwe ku mwaka. Igihe cyo kuzigama gihera ku mwaka umwe kuzamura.

Iyi konti kandi ifasha abakiliya baba mu mahanga gusaba inguzanyo yo kugira icumbi.

- Konti yo kuzigama y’Abana

Iyi ni konti igenewe abana bari munsi y’imyaka 18, aho kwizigamira kuri iyi konti bitangizwa nibura amafaranga 10,000. Igipimo cy’inyungu zibariwe ku mwaka ni 8%.

Inyungu zibarirwa buri kwezi ku mafaranga make ari kuri konti zikishyurwa rimwe ku mwaka. Nta mafaranga fatizo yo kwizigama buri kwezi kandi kubikuza bikowa rimwe mu gihembwe ku mafaranga ari hejuru ya Frw 10,000.

Konti ifungurwa ku mazina y’umwana, umuhagarariye akabisinyira.

BPR yujuje icyicaro gikuru kigezweho, aho yiteguye kwimukira ikarushaho gutanga serivisi zijyanye n'igihe
BPR imaze imyaka isaga 40 itanga serivisi z'imari, yakoreraga muri iyi nyubako iri haruguru ya Mille Collines mu Mujyi rwagati
BPR ikomeje kwagura amashimi. Mu minsi ishize yafunguye ishami rishya mu nyubako izwi nka KBC

Amafoto: Moïse Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza