IGIHE.com > Ubuzima
Amakuru y’ingenzi ku buzima  yaranze umwaka wa 2012

Amakuru y’ingenzi ku buzima yaranze umwaka wa 2012


Yanditswe kuya 28-12-2012 - Saa 10:11' na Umurerwa Emma-Marie

Dr. Luis Gomes yashimye Perezida Kagame ibyagezweho mu nzego z’ubuzima

Tariki ya 13 Kamena, Perezida Kagame yakiriye mu biro bye, muri Village Urugwiro Dr. Luis Gomes Sambo uhagarariye Ishami ry’Umuryango w’Abibumbye ryita ku buzima mu Karere ka Afurika (World Health Organisation Regional) baganira kuri serivisi z’ubuzima n’uburyo zakomeza gutezwa imbere.

Dr Luis Gomes Sambo, yabwiye abanyamakuru ko bishimiye ibyo u Rwanda rwabashije kugeraho mu kurwanya indwara zitandukanye no kuzikumira. Yavuze ko mu myaka 10 ishize u Rwanda rwateye intambwe ishimishije mu bihugu bya Afurika mu kunoza serivisi zitandukanye z’ubuzima.

Minisitiri w’ubuzima, Dr Agnes Binagwaho yavuze ko uyu muyobozi yanaganiriye na Perezida Kagame ku bijyanye n’indwara z’ibyorezo n’izidakira zigaragara muri Afurika, banareba uburyo Abanyafurika ubwabo bafatanya mu gukemura ibibazo by’ubuzima.

Turabaha uburyo bw’ubuzima bwiza ngo mureke gusaza -Perezida Kagame

Ibi Umukuru w’Igihugu yabivugiye mu Karere ka Burera, Umurenge wa Butaro nyuma yo gufungura ibitaro bikuru bya Butaro, tariki ya 24 Mutarama 2011.
Perezida Kagame aherekejwe n’Umufasha we Madamu Jeannette Kagame, abagize Guverinoma ndetse n’abandi bayobozi, basuye Akarere ka Burera mu rwego rwo gufungura Ibitaro Bikuru bya Butaro ndetse no gusura no kuganira n’abaturage b’ako Karere.

Ibitaro bya Butaro byubatswe ku bufatanye hagati ya Leta y’u Rwanda n’umuryango Partners in Health (Inshuti Mu Buzima) na Clinton Foundation.

Ni ibitaro byo ku rwego mpuzamahanga, bifite ibikoresho byo mu rwego rwo hejuru, bikaba binakoresha ikoranabuhanga rihambaye, nk’uko byatangajwe na Dr Paul Farmer washinze umuryango wa Partners in Health.

Umuyobozi wa Partners in Health kandi yatangaje ko ibi bitaro byahaye akazi abaturage bo muri ako Karere bagera ku bihumbi 2,500; bikaba byarabagiriye akamaro dore ko byanazamuye imibereho yabo bamwe muri bo bakabasha kwikura muri nyakatsi badategereje inkunga ya Leta.

Ibi bitaro kandi byubakanwe ubuhanga buhanitse, mu kubyubaka hakoreshwa ibikoresho biboneka muri Burera byiganjemo amabuye y’amakoro akomoka ku iruka ry’ibirunga, hanakoreshejwe ibikoresho byitwa Sika bishashe mu byumba by’ibyo bitaro ku buryo ikwirakwizwa ry’indwara ku barwariye kuri ibyo bitaro ridashoboka ku kigereranyo cya 99%.

Bifite kandi ikoranabuhanga mu kubungabunga umutekano ndetse n’ubusugire bw’ababigana n’ababivurirwamo, bikaba binafite ibitanda bigera ku 150 bishobora no kongerwa.

Inzego z’ubuzima zirasabwa kwiminjiramo agafu

Nyuma y’aho bigaragariye ko serivisi z’ubuzima ari zimwe mu zitungwa agatoki mu mikorere mibi, Minisitiri w’intebe Dr. Habumuremyi Pierre Damien arabasaba kwiminjiramo agafu.

Ibi Minisitiri w’intebe yabisabye mu nama yagiranye n’abayobozi b’ibitaro ndetse n’amavuriro tariki 3 Gashyantare 2011, aho bigaga ku mitangire ya serivisi z’ ubuzima.

Minisitiri w’intebe yabwiye abayobozi b’ibitaro ko abaturage bakomeje kwinubira serivisi z’ubuzima kandi ari zo zifite ingaruka zikomeye; yagize ati “Akazi kanyu gafite uruhare runini, ikintu gikora ku buzima bw’abantu, iyo habayemo akabazo gahita kamenyekana.”

Icyo bamwe bavuga ku itegeko ryo gukuramo inda

Inkuru yanditswe tariki ya 7 Werurwe, yavugaga ko mu Rwanda Inteko Ishinga Amategeko umutwe w’abadepite uherutse gutora Itegeko rigenga ikurwamo ry’inda.

Nyuma y’itorwa ry’iri tegeko Abanyarwanda b’ingeri zitandukanye ntibabyakiriye kimwe.

Bamwe bavuga ko bitari bikwiye ko iryo tegeko ritorwa, bitwaje ko ngo ari ugushyigikira ibikorwa by’ubusambanyi, guta umuco ndetse bamwe ntibanatinye kuvuga ko ari ugukomeza guha urwaho bamwe mu bagore cyangwa abakobwa uburenganzira bwo kwica, kandi ari kimwe mu byaha Imana yanga urunuka.

Ku rundi ruhande hari ababyakiriye neza bavuga ko iri tegeko rigiye kubohora bamwe mu batwita inda ku buryo bubatunguye, aha ni ukuvuga ba bandi bafatwa ku ngufu ndetse n’abandi bisanga batwite ababateye izo nda batiteguye kubafasha, ari na byo binatera bamwe igikomere mu buzima ku buryo n’uwo mwana wavuka yakurira mu bibazo byo kubura urukundo rwa kibyeyi cyangwa se ugasanga ajugunywa n’uwamubyaye.

Gukuramo inda ni uburenganzira bw’umugore nk’uko bigaragazwa n’amategeko arengera umugore yashyizweho n’umuryango w’abibumbye urengera uburenganzira bwa muntu bityo ntawukwiye kubumwima mu gihe bibaye ngombwa.

Wari uziko ushobora kuganira buri wa mbere na Minisitiri w’Ubuzima?

Tariki ya 10 Mutarama Minisitiri w’Ubuzima Agnes Binangwaho, yatangije uburyo bwo kuganira n’abantu b’ingeri zose hirya no hino ku Isi kuri gahunda z’ubuzima.

Mu muhango wo gutangiza ku mugaragaro iyo gahunda Minisitiri w’ubuzima yagize ati "Nk’uko mubizi, maze igihe gito ntangije ibiganiro by’iyakure bicishwa ku murongo wa Internet witwa Twitter, kugira ngo dufashe Abanyarwanda, abakozi dukorana n’abafatanyabikorwa, kungurana ibitekerezo ku bibazo biri mu rwego rw’ubuzima. Kungurana ibitekerezo kuri internet bikorwa buri wa mbare nyuma ya saa sita incuro ebyiri mu kwezi, icyo kiganiro cyitwa “Buri wa mbere munyarwanda, ganira na Minisitiri w’ubuzima.” (#MinisterMondays).”

Diaspora Nyarwanda mu nzira yo gufasha urwego rw’ubuzima

Nyuma y’inama yahuje uhagarariye u Rwanda mu gihugu cy’Afurika y’Epfo, Diaspora Nyarwanda ku rwego rw’Isi, Umuryango Mpuzamahanga w’Abimukira (IOM) n’urwego rw’ubuzima mu Rwanda, i Johannesburg, yemeje ko Abanyarwanda bo muri Diaspora bagiye gushyira ingufu mu bufatanye bugamije gusangiza ubumenyi bafite urwego rw’ubuzima.

Iyi nama yari ifite intego yo guhuza Abanyarwanda baba mu mahanga, by’umwihariko abo mu rwego rw’ubuzima, hagamijwe kurebera hamwe uko bajya bagaruka gutanga ubumenyi bafite mu rwego rw’ubuzima mu Rwanda.

Dr Musabeyezu Emmanuel wari uhagarariye ikigo cy’igihugu cyita ku buzima (Rwanda Biomedical Center) yagaragarije abari bitabiriye iyi nama, bimwe mu bibazo bikigaragara mu rwego rw’ubuzima mu Rwanda aho yibanze cyane ku kibazo cy’inzobere mu buvuzi zikiri nke.

Uburasirazuba ku isonga mu kugira umubare munini w’ababyeyi bapfa babyara

Intara y’Uburasirazuba ni yo iza ku mwanya wa mbere ku rwego rw’igihugu mu kugira umubare munini w’ababyeyi bapfa babyara.

Ibi byatangajwe mu nama yari yahuje Guverineri w’intara y’Uburasirazuba, Odette Uwamariya, hamwe n’abayobozi batandukanye bo muri iyi ntara.

Umushinga “Rwanda Family Health Project” ugiye kongerera ingufu Minisiteri y’Ubuzima

Tariki ya 29 Kanama, i Kigali habereye umuhango wo gutangiza ku mugaragaro umushinga ”Rwanda Family health Project”, umushinga uzita ku buzima bw’Umuryango Nyarwanda.

Nk’uko Charles Pill, Umuyobozi Mukuru w’Ishami rya USAID mu Rwanda yabitangaje, Rwanda Family Health Project ni umushinga w’Abanyamerika, watekerejwe n’Ikigo cya Leta Zunze Ubumwe za Amerika gitsura amajyambere mpuzamahanga (USAID), kugira ngo wunganire u Rwanda, cyane cyane muri gahunda irebana n’iby’ubuzima muri rusange.

Umushinga “Rwanda Family Health Project” ufite intego zitandukanye, ari zo kuvugurura ireme rya serivisi z’ubuzima zihabwa umuryango cyane cyane ku rwego rw’akarere, kongerera ubumemyi abantu bakora muri gahunda z’ubuzima bw’abantu, kongera ibyangombwa nkenerwa mu korohereza abakeneye serivisi z’ubuzima, ndetse no gushyira imbaraga mu gukurikirana uko izo serivisi zitangwa.

Rwanda Family Health Project, izibanda cyane kuri gahunda yo kuringanyiza imbyaro, ubuzima bw’imyororokere, icyorezo cya SIDA, ubuzima bw’umubyeyi n’ubw’umwana, kurwanya Malariya no kuyivura, imirire, isuku no kuvura indwara y’igituntu.

Uyu mushinga umaze kugera mu turere 18 tw’igihugu, ukaba uzamara imyaka itanu. Utundi turere 12 dusigaye na two bakaba barimo kudushakira abandi bafatanyabikorwa muri gahunda y’ubuzima.

Umuyobozi wa OMS muri Afurika Arashima ibikorwa bya minisiteri y’Ubuzima
Tariki ya 11 Kamena, Umuyobozi w’Ishami rya Loni ryita ku Buzima muri Afurika yasuye u Rwanda, yatangaje ko iterambere Minisiteri y’Ubuzima imaze kugeraho rishimishije, kandi ko bitera akanyabugabo n’ibindi bihugu byo muri Afurika.

Ibigo Nderabuzima byahawe moto zizabifasha kuzamura ibipimo by’Ubuzima

Tariki 21 Gashyantare 2012 Minisiteri y’Ubuzima yahaye ibigo nderabuzima bitandukanye n’imiryango itanu itegamiye kuri Leta itanga umusanzu mu bikorwa by’ubuzima, amapikipiki 237 mu rwego rwo kuzamura ibipimo by’Ubuzima.

Dr Kayumba Pierre Claver, Umuyobozi w’agateganyo w’Ikigo cy’Igihugu gishinzwe Ubuzima (RBC) yavuze ko izo moto 237 zatanzwe mu rwego rwo kurwanya igituntu, ariko zikaba zizanatanga umusanzu mu kuzamura ibipimo by’Ubuzima.

Mazane: bashyikirijwe ubwato bw’imbangukiragutabara

Ubwo bamwe mu babyeyi bo ku Kirwa cya Mazane kiri mu kiyaga cya Rweru, bahuraga n’ikibazo cyo kwambuka amazi bajya kwivuriza ku kigo nderabuzima cya Nzangwa, giherereye mu birometero nka 12 uvuye i Mazane, abaturage bahawe ubwato bwa moteri buzajya bubafasha kwambuka bajya ku ivuriro.

Ubwato bahawe bufite agaciro k’amafaranga 5,250,000frw bwatanzwe ku nkunga y’Ikigo cy’iterambere cy’u Bubiligi (BTC) mu gice gishinzwe gutera inkunga ibikorwa by’ubuzima.

Ubu bwato kandi buje bukurikira ibindi bikorwa by’iterambere byatanzwe n’Akarere ka Bugesera, ku nkunga ya BTC n’abandi bafatanya bikorwa.

Minisitiri w’Ubuzima yasabye abaganga kujya basekera abarwayi

“Kwakira abarwayi ubabwira neza ndetse unabasekera ni umuti wa mbere.” Ibyo byavuzwe na Minisitiri w’ubuzima Dr. Agnes Binagwaho ubwo yasuraga Ikigo Nderabuzima cya Gitega mu Mujyi wa Kigali, tariki 8 Kanama 2012.

Mu ijambo rya Minisitiri Binagwaho yashimangiye ku buryo abaganga n’abandi bakozi bo ku bitaro bakira abarwayi, ababwira ko bwa mbere bagomba kujya bakirana umuntu inseko, kuko abarwayi ari abakiriya bagomba kubaha serivisi nziza.

Tuvuge oya ku biyobyabwenge, ahubwo duhitemo ubuzima

“Tuvuge oya ku biyobyabwenge ahubwo duhitemo ubuzima.” Aya ni amagambo yagarutsweho ku munsi mpuzamahanga ngaruka mwaka wizihizwa tariki ya 26 Kamena, wo kurwanya ibiyobyabwenge wizihirijwe ku rwego rw’igihugu ku kibuga cya Camp Kigali, mu Karere ka Nyarugenge, mu Mujyi wa Kigali.

Ageza ijambo ku mbaga y’abantu batari bake biganjemo urubyiruko rw’abanyeshuri bo mu mashuri yisumbuye, abatwara amamoto, n’abakozi ba Minisiteri y’Ubuzima inzego za Polisi n’iza Gisirikare, Tumukunde Hope Umuyobozi w’Umujyi wa Kigali wungirije ushinzwe imibereho myiza, yavuze ko ikibazo cy’ibiyobyabwenge kigenda gifata indi ntera, akaba ari yo mpamvu gihangayikishije Leta y’u Rwanda n’amahanga muri rusange.

Hagenimana Céléstin yavuze ko agikoresha ibiyobyabwenge nta cyizere cyo kubaho yari afite, kandi nta n’umwanya yari agifite mu muryango nyarwanda, kuko yihimbaga amazina ashingiye ku gutakaza umutwe akiyita Commando, Gatuza n’andi, kandi akaba yarumvaga ko nta muntu woga cyangwa ufite isuku agomba kugisha inama, ahubwo abameze batyo akabafata nk’abanzi be.

Ubwisungane mu kwivuza bumwe mu bihugu byo muri EAC

Abayobozi batandukanye bashinzwe iby’ubuvuzi mu bihugu bigize Umuryango w’Afurika y’Uburasirazuba uko ari bitanu, baje mu Rwanda mu biganiro bigamije kurebera hamwe uko ubwishingizi mu buvuzi bwahabwa imbaraga, bukaba bwahuzwa muri ibyo bihugu kugira ngo imibereho y’abaturage batuye uyu muryango irusheho gutera imbere.

Umuyobozi ushinzwe ishami ry’ubwisungane mu kwivuza, yemeza ko hari igihe mu Rwanda hakirwa abarwayi usanga baba baturutse mu bihugu by’abaturanyi, ariko kubera ko nta bwisungane bafite ugasanga bigorana kubavura cyangwa se bakavurwa bagomba kwishyura amafaranga menshi adashoboka ku muntu ufite ubwishingizi mu buvuzi.

Amabwiriza ya MINISANTE yashyize mu gihirahiro abifuza gushinga amavuriro yigenga

Abanyamuryango b’ishyirahamwe ry’amavuriro yigenga mu Rwanda bahangayikishijwe n’uburyo Minisiteri y’Ubuzima idafasha abashaka gushinga amavuriro yigenga.

Bavuga ko ibananiza mu gutanga ibyangombwa bitewe n’amabwiriza batanga mu magambo gusa, ibi bikaba bibaviramo no guhomba kuko hari ibyo basabwa gutunganya bisaba amafaranga n’ibikoresho.

Nk’uko byatangarijwe IGIHE na Niwemwungeri Marie Therese Perezida w’ishyirahamwe ry’amavuriro yigenga, yavuze ko Minisiteri y’ubuzima ishyira amananiza mu kubona ibyangombwa.

Bashyira mu majwi uwitwa Gahungu Emmanuel, umuyobozi ushinzwe amavuriro yigenga muri MINISANTE. Uyu mugabo bamuvugaho kuba adindiza amadosiye asaba gutangiza amavuriro.

Amwe mu madosiye y’abantu basabye, hari iy’uwitwa Yamuragiye Jacqueline utuye mu Karere ka Nyarugenge avuga ko ku itariki ya 19 Kamena 2009 yandikiye MINISANTE asaba icyangombwa cyo gufungura Dispensaire abura igisubizo, akomeza kubikurikirana ariko ngo yagiye azitirwa n’umukozi ubishinzwe muri Minisiteri y’Ubuzima.

Minisiteri y’Ubuzima yatangiye ubufatanye n’ibitaro byo mu Buhinde

Tariki ya 7 Kamena mu cyumba cy’inama cya Minisiteri y’Ubuzima, iyi Minisiteri yatangije ubufatanye n’ibitaro byo mu Buhinde byitwa MIOT Hospital Internatinal of India.

Nk’uko byatangajwe na Dr. Ngirabega Jean de Dieu, ngo muri ubu bufatanye ibi bitaro byo mu Buhinde bizajya bitanga amahugurwa ku baganga b’Abanyarwanda ku bijyanye no kubaga, binatange ibikorwa by’ubuvuzi ku barwayi bo mu Rwanda.

Uwari uhagarariye iyo kipe y’abaganga Dr. Prithvi Mohandas yatangaje ko bimwe mu bikorwa bazakorana n’u Rwanda byatangiye, ko batangiye imirimo maze bagasuzuma abarwayi bagera kuri 222, harimo 169 bafite ikibazo cy’indwara zo kubagwa ndetse n’abana 53 bafite ibibazo by’umutima.

Buri mwaka inda ibihumbi 60 ni zo zikurwamo mu Rwanda

Ubushakashatsi bwakozwe na Minisiteri y’Ubuzima n’Ikigo cy’Abanyamerika Guttmacher Institute ku bufatanye na Kaminuza Nkuru y’u Rwanda, burerekana ko muri iki gihugu inda ibihumbi 60 ari zo zikurwamo buri mwaka.

Ubu bushakashatsi bugaragaza ko abagore 25 ku 1000 bafite hagati y’imyaka 15 na 44 bakuramo inda buri mwaka. Hafi y’inda zose zivamo ni iziba zasamwe zitifuzwa, 1/3 cy’abagore bahura n’ibibazo bikomoka ku gukuramo inda nbibabona ubuvuzi bukwiye.

Muri ubu bushakashatsi, byaragaragaye ko benshi mu bakuramo inda bagana abaganga batabifitiye ubushobozi, cyane cyane abavuzi gakondo bakoresha uburyo butizewe, haba mu isuku ndetse n’ ibikoresho nkenerwa.

Herekanwe kandi ko impamvu nyamukuru ituma abantu bagana abavuzi gakondo ari uko gukuramo inda bitemewe mu Rwanda, ibi bikaba ari na yo ntandaro y’impfu nyinshi z’ababyeyi n’abana.

Mitiweli irimo amavuriro umwenda usaga Miliyari 3,4

Mu bisobanuro byatanzwe na Minisitiri w’Ubuzima ku wa 24 Ukwakira ubwo yitabaga Komisiyo y’Inteko Ishinga Amategeko ishinzwe gukurikirana imikoreshereze y’umutungo n’imari by’igihugu (PAC), byagaragajwe ko Mitiweli irimo ibitaro umwenda usaga Miliyari 2,3 na ho ku bigo nderabuzima usaga Miliyari 1,1, bitewe n’uko Uturere tutubahiriza amasezerano nk’uko itegeko ribiteganya.

Minisiteri y’Ubuzima yasubije ibibazo bisaga icumi bikubiye mu mapaji agera kuri 14 yari yabajijwe n’Urwego rw’Ubugenzuzi Bukuru bw’Imari ya Leta ku isesengura ry’ibibazo ryakozwe na PAC kuri raporo y’igenzura yakozwe ku bwisungane mu kwivuza.

Kuba amafaranga adatangwa mu kigega cy’ingoboka cy’igihugu cy’ubwisungane mu kwivuza hatungwa urutoki uturere mu kutubahiriza amasezerano yo gutanga aya mafaranga nk’uko itegeko ribiteganya.

Minisitiri w’ubuzima Dr. Anges Binagwaho, yasobanuye ko Uturere tumwe na tumwe twateganyaga ayo mafaranga mu ngengo y’imari, ariko ngo byagera mu gihe cyo kuyishyira mu bikorwa amafaranga ntaboneke.

Ibitaro bya Muhima bifata bugwate ababuze ubwishyu

Minisitiri w’Ubuzima Dr Binagwaho Agnes, aratangaza ko agiye gukurikirana ikibazo cy’abyeyi babyarira ku bitaro bya Muhima bananirwa kwishyura amafaranga y’ibitaro kubera ubushobozi buke bagafungwa.

Ubwo yagiraga ikiganiro n’abanyamakuru ku wa 7 Ugushyingo, Minisitiri w’Ubuzima Dr Binagwaho Agnes, yabajijwe ikibazo cy’ababyeyi babyarira mu bitaro bya Muhima bafungwa babuze icyo bishyura, ariko avuga ko atari akizi.

Gusa nyuma yo guhamagara kuri ibi bitaro yasanze icyo kibazo gihari, ati “mufite ukuri koko, hari ababyeyi bananirwa kwishyura fagitire yabo bagafatwa bugwate. Ngiye kubikurikirana ubwanjye, njye kureba niba koko hari abagihari. Bagomba guhita barekurwa ako kanya.”

Iki kibazo kikaba kimaze iminsi kivugwa ku bitaro bya Muhima, kitavutse vuba.
Ubwo Umunyamakuru wa IGIHE yasuraga ibitaro bya Muhima tariki ya 8 Ugushyingo, Umuyobozi w’ibyo bitaro Dr Mulindwa Patrick yatangaje ko abo bantu bahari koko ariko baza mu byiciro bitandukanye.

Yagize ati "abaza hano harimo abazanwa na Polisi bari ku nda cyangwa se babyariye ku muhanda, abandi bakaza bizanye ariko nta Mitiweli bafite; abenshi usanga nta byangombwa banafite. Iyo babuze ubwishyu turabacumbikira tugategereza imiryango yabo ko izabishyurira."

Akomeza avuga ko kuba Minisitiri w’Ubuzima abasaba kuzajya bahamagara Polisi ikaza kubajyana, ibyo bitaborohera kuko abenshi ari yo iba yabazanye, bakagira ikibazo cyo kubasubiza Polisi babuze ubwishyu bw’ibitaro.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO