Abafasha b’abaganga baturuka mu karere bazana mu Rwanda ubumenyi bugerwa ku mashyi

Yanditswe na Kanamugire Emmanuel
Kuya 26 Ugushyingo 2016 saa 11:20
Yasuwe : XX
0

Mu igenzura rikorwa n’Urugaga rw’Abaganga mu Rwanda buri mwaka, rwasanze abafasha b’abaganga baturuka mu bihugu byo mu karere birimo Uganda na Repubulika Iharanira Demokarasi ya Congo baza mu Rwanda baba bafite ubumenyi budahagije.

Ni nyuma y’uko mu cyumweru gishize Urugaga rw’Abaganga mu Rwanda , Rwanda Allied Health Professional Council (RAHPC) rwateguye ikizamini gisanzwe gitangwa buri mwaka hagamijwe kureba ubumenyi abakora umurimo w’Ubuvuzi mu Rwanda bafite.

Icyo kizamini gifatwa nk’isuzuma ry’ibanze ku bakora muri Laboratwari, abavura indwara z’amaso, abareba iby’imirire, abavura amenyo, abatera ibinya n’abavura indwarwa z’uruhu.

Kt Press yanditse iyi nkuru ivuga ko amanota yavuye muri icyo kizamini yagaragaje mu buryo butaziguye ko abaturuka mu bihugu byo mu karere baza gukora mu Rwabnda bafite ubumenyi buke.

RAHPC ibishingira ku kuba mu bantu 557 bashoje icyiciro cya kabiri cya kaminuza bakoze icyo kizamini 165 bonyine ari bo babashije ku gitsinda na ho abagera kuri 392 bose baratsinzwe.

Uganda, Congo, n’u Burundi byagaragajwe nk’ibihugu bitanga abafasha b’abaganga bafite ubumenyi buke ugereranyije n’abo u Rwanda rukeneye.

RAHPC ivuga ko mu bantu 156 bakoze icyo kizamini bakora muri Laboratwari, abagera kuri batandatu bonyine nibo babashije kugitsinda. Abandi bakora muri icyo gice 17 baturuka muri kaminuza nkuru ya Congo baratsinzwe.

Muri rusange ngo muri 216 bakora muri Laboratwari bahawe icyo kizamini abagera kuri 54 bonyine nibo babashije gutsinda.

Umuyobozi ushinzwe kwandika abanyamuryango mu rugaga rw’abaganga Jean Baptiste Ndahiriwe, yavuze ko gutsindwa kwabo bisobanura neza, imyigishirize idafite ireme mu bihugu byabo.

Ati “ Dutekereza ko hari uburezi budafite ireme mu bihugu byabo.”

Umwe mu bakora muri Laboratwari ukomoka muri Congo watsinzwe iki kizamini yavuze ko we ikibazo atakibona mu burezi budafite ireme kuko we ngo afite ibintu bibiri avuga ko bibagiraho ingaruka.

Yagize ati “ Icyambere ,bidufata imyaka itanu dutegereje impamyabumenyi kugira ngo twemererwe gushaka akazi, muri icyo gihe dusubira guhinga bigatuma twibagirwa ibyo twari twarize.”

Ikindi yavuze ni uko kuba barize mu rurimi rw’Igifaransa muri Congo bibagora gukora ibizamini by’abize mu Cyongereza mu Rwanda.

Urugaga rw’abaganga rushishikajwe no kugendera ku mahame agenga abakozi mu by’ubuzima haba ku rwego mpuzamahanga cyangwa urw’akarere hagamijwe kurengera ubuzima bw’abaturage, nkuko byagarutsweho na Ndahiriwe.

Itegeko no 30/2001 of 12/116/2001 rishyiraho urugaga rw’abaganga , rivuga ko uru rwego ari rwo rufite mu nshingano gufatira imyanzuro abaganga bagaragaweho imikorere idahwitse. Ruha uburenganzira abarwayi bwo kugaragaza ibyo batishimiye.

Rufite kandi inshingano zo guhana abakora muri serivisi z’ubuvuzi bagaragaweho imikorere mibi.

Urugaga rw’abaganga bavura amenyo mu Rwanda rutangaza ko nibura abakozi bari hagati ya 30 na 40 banengwa buri mwaka biturutse ku mikorere yabo idahwitse.

Hagati aho abatsinzwe icyo kizamini bagaragaje kutishimira amanota babonye bavuga ko hari icyakorwa kugira ngo benshi barusheho gutsinda.

Bifuza ko inshingano zo gutegura ikizamini Urugaga rw’Abaganga rukwiye kuzirekera inzego za Leta zirimo Minisiteri y’Ubuzima cyangwa iy’Uburezi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza