Abarwayi basaga 6000 bakeneye imiti ya Hepatite C

Yanditswe na Jean Pierre Tuyisenge
Kuya 12 Werurwe 2018 saa 09:36
Yasuwe :
0 0

Minisiteri y’Ubuzima iratangaza ko yasanze abantu bagera ku 6000 bakeneye imiti ya Hepatite C nyuma y’uko hatangijwe gahunda yo gusuzuma no gutanga imiti yayo ku buntu.

Hashize iminsi itari mike, Guverinoma y’u Rwanda itangije gahunda yo gusuzuma no gutanga imiti ku buntu ku bafite ubwandu bwa Virusi ya Hepatite B na C.

Mu kiganiro Dr Nsanzimana Sabin ushinzwe kurwanya indwara zandurira mu mibonano mpuzabitsina mu Kigo cy’Igihugu cy’Ubuzima (RBC) yagiranye na RBA, yavuze ko nyuma y’ubukangurambaga bwo kwisuzumisha no kwivuza iyo ndwara; basanze hari umubare munini w’abakeneye imiti.

Yagize ati “Gupima ntibyavugaga ko umuntu wese ugaragaweho n’iyo virusi ahita ahabwa iyo miti, kuko hari ikindi kigero kigaragaza niba umuntu ajya ku miti cyangwa atayijyaho, niyo mpamvu byatwaye igihe kugira ngo tumenye abazakenera imiti n’abatazayikenera, twari dufite abagera ku bihumbi bitandatu bayikeneye.”

Abarwayi ba Hepatite bo bavuga ko icyo cyemezo cyaje kuramira ubuzima bwa benshi batari bafite ubushobozi bwo kwigurira imiti, nk’uko bitangazwa na Rutikanga Yohani Umubatiza umuyobozi w’ishyirahamwe rirwanya indwara z’umwijima mu Rwanda, unahamya ko iyo miti ivura neza iyo ndwara.

Yagize ati “Icya mbere kwari ukwisuzumisha bigoye ndetse n’amafaranga ahenze kuri iyo miti, nagira ngo mbambwire ko iyi miti iri gutangwa hano mu Rwanda, iri no mu Misiri, irakiza kuri 95%, turashimira Leta yacu.”

Guhenda kw’iyo miti bisobanurwa neza na Dr Nsanzimana, uvuga ko muri Leta Zunze Ubumwe za Amerika ahakorewe iyo miti, waguraga asaga miliyoni 60 z’amafaranga y’u Rwanda.

Yagize ati “U Rwanda rero rwaje kugera ku biciro byumvikanyweho n’abakora uwo muti, ubu byari bigeze kuri miliyoni y’amafaranga y’u Rwanda kuri Hepatite C, impamvu rero iyi miti iri gutangwa ku buntu muri ubu bukangurambaga, ni ukugira ngo dukumire za kanseri z’umwijima zari kuzaba kuri abo bantu 6000 kuko kubavura byari kuzahenda kurushaho.”

Ubushakashatsi bugaragaza ko itabi n’inzoga birengeje urugero ari imwe mu mpamvu za hafi zitera indwara y’umwijima mu gihe abantu barengeje imyaka 50, abagera ku 10% muri bo bagendana uburwayi bwa Hepatite batabizi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza