Amayobera atanu yakomeje kwibazwa ku cyorezo cya Sida kuva mu 1980

Yanditswe na Philbert Girinema
Kuya 1 Ukuboza 2016 saa 05:53
81 44

Umuryango urwanya virusi itera Sida wo mu Bwongereza, Terrence Higgins Trust, washyize ahagaragara amwe mu mayobera n’imyumvire itariyo yakomeje kwibazwa na benshi ku cyorezo cya Sida kuva cyamenyekana cyane mu 1980.

Ubushakashatsi bwakorewe ku bantu 2000 ubwo hitegurwaga umunsi mpuzamahanga wahariwe kurwanya icyorezo cya Sida uba kuwa 1 Ukuboza, bwagaragaje ko iyo myizere n’imyumvire itariyo igihari nubwo hakozwe byinshi mu rwego rw’ubuvuzi no kwigisha.

- Virusi itera Sida ishobora kwandurira mu gusomana

Mu bantu 20% by’ababajijwe hakorwa ubu bushakashatsi, byagaragayeko bagifite iyi myemerere. Gusa ukuri ni uko virusi itera Sida idashobora kwanduzwa no guhura k’uruhu abantu bakoranyeho cyangwa mu macandwe.

- Gukoresha uburoso bumwe bw’amenyo n’umuntu ufite VIH bishobora kuyanduza

Abari munsi ya kimwe cya gatatu cy’abakozweho ubushakashatsi bemera ko bishoboka ariko ntabwo ari byo kuko virusi itera Sida idashobora gukomeza kubaho yavuye mu mubiri w’umuntu.

-  Byanze bikunze abafite virusi itera Sida bagomba kuyitera abana babo

Kwitabwaho neza ku bafite agakoko gatera Sida, bigabanya umubare wa virusi mu maraso ku kigero kidasanzwe. Ibi bisobanuye ko ufite virusi itera Sida witabwaho n’abaganga bakamukurikirana n’igihe atwite ashobora kubyara abana bazima badafite ubwandu. Icyakora abagera kuri 29% babajijwe mu bushakashatsi bagaragaje ko ibi batabizi.

- Iyo umuntu afite Virusi itera Sida apfa akiri muto

Iterambere ry’ubufasha buhabwa abafite virusi itera Sida, bugeze ku rwego rushimishije kugeza n’aho bashobora kubaho bakayisazana. Kuri iyi ngingo, kimwe cya kabiri cy’ababajijwe nibo bonyine bari babizi.

- Ntibishoboka ko wakorana imibonano mpuzabitsina n’ufite virusi itera Sida ngo ntiwandure

Uyu mwaka hari inyigo yemeje ko umuntu ufite ubwandu ariko ufata imiti neza adashobora kwanduza virusi itera Sida niyo yakora imibonano mpuzabitsina. Abantu 39% nibo bari bafite ubumenyi kuri ibi gusa.

Umuyobozi wa Terrence Higgins Trust, Ian Green, yavuze ko basanze nubwo hari iterambere mu buvuzi, hakiri abantu bataramenya uko virusi itera Sida yandura n’uburyo wabana na yo kandi ukaramba.

Yongeyeho ko ibi aribyo bikurura akato no kwicwa na virusi itera Sida ku bwo kutamenya uburyo uwayanduye yakitabwaho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE