Amerika n’u Burayi: Icyizere cyo kubaho ku barwaye SIDA bafata imiti cyarazamutse, mu Rwanda bite?

Yanditswe na Evariste Nsengimana
Kuya 28 Nzeri 2017 saa 11:41
Yasuwe :
0 0

Ubushakashatsi bwakorewe mu Burayi na Amerika muri Gicurasi 2017, bwagaragaje ko icyizere cyo kubaho ku bantu bafite ubwandu bw’agakoko gatera Sida n’abayirwaye bafata imiti igabanya ubukana bwayo cyazamutse kugera ku myaka 10.

Ababukoze batangaje ko byatewe n’imiti itandukanye mishya igabanya ubukana yagiye ivumburwa harimo nk’uwitwa ‘antiretroviral therapy’ watangiye gukoreshwa mu myaka ya 1990, binashingirwaho bemeza ko umuntu uwufata ashobora kuramba, kuko uhangara Virus ya Sida ukanongera abasirikare b’umubiri ku murwayi.

Umushakashatsi wo muri Kaminuza ya Bristol y’Abongereza, Adam Trickey, akaba n’umwe mu bayoboye ubwo bushakashatsi yabwiye Telegraph ko bwakozwe hagamije kurebwa ibyagezweho, cyane cyane mu kwisuzumisha, kwirinda no kuvura Sida.

Abashakashatsi basesenguye ibyavuye mu bihugu 18 by’Amerika n’u Burayi, ku barwayi 88,504 batangiye gufata iyo miti mu 2008- 2010, basanga abantu bapfaga nyuma y’imyaka itatu batangiye kuyinywa ari bake cyane ugereranije no mu 1996-2007, basonanura ko byatewe no gukoresha imiti igezweho igabanya ubukana bw’agakoko gatera Sida.

Bemeje ko 1996, umurwayi wayo watangiraga gufata imiti afite imyaka 20, icyizere cyo kubaho cyiyongeragaho imyaka icyenda ku bagore na 10 ku bagabo bo muri Amerika ya Ruguru no mu bihugu by’u Burayi, ariko ko uwayitangiye guhera mu 2008 kuri ubu ashobora kugira icyizere cyo kubaho kigera ku myaka 78.

Aba bashakashatsi bakomeje basobanura ko atari ku bantu bose icyizere cyo kubaho cyiyongeyereye, bitewe n’uko hari abayirwaye banywa ibiyobyabwenge, inzoga n’ibindi bishobora gutuma umubiri ubura ubudahangarwa bagapfa vuba.

Mu Rwanda nta bushakashatsi burakorwa

Umuyobozi ushinzwe kurwanya icyorezo cya SIDA mu Kigo cy’igihugu cyita ku buzima (RBC), Dr Mpundu Ribakare, yabwiye IGIHE ko nta bushakashatsi u Rwanda rurakora bugaragaza uko icyizere cy’ubuzima gihagaze kuva gahunda yo gutanga imiti igabanya ubukana itangijwe ariko hari icyizere ko gihagaze neza.

Yagize ati “Nta bushakashatsi burakorwa ku cyizere cy’ubuzima. Nta mibare y’uko gihagaze dufite ariko biraboneka ko impfu zagabanutse. Hari ubushakshatsi bukorwa n’ikigo cy’igihugu cy’ibarurishamibare buri myaka itanu, dusanga abantu bafite ubwandu ari 3%. Ibyo bitwereka ko babandi bagenda barwara ntibapfa, kuko iyo bapfa biragabanuka cyangwa hakazamo abandi benshi bashya imibare ikazamuka. Icyo kitwereka ko ku barwayi, icyizere cy’ubuzima cyiyongera.”

Yakomeje avuga ko u Rwanda nta kibazo cy’imiti igabanya ubukana rufite ko gusa hakenewe gukomeza gushyira imbaraga mu kugabanya ubwandu bushya bw’agakoko gatera Sida kuko ari umutwaro ku Gihugu.

Dr. Mpundu yavuze ko kugeza ubu, abantu barenga 82% bafite ubwandu bw’agakoko gatera Sida bipimishije bafata imiti igabanya ubukana, gusa ngo haracyari imbogamizi z’abantu batipimisha ngo bamenye uko bahagaze, ari naho ahera abagira inama yo kwipimisha bakamenya uko bahagaze kugira ngo abarwaye batangire imiti kare.

Kugeza ubu ku rwego rw’isi, habarurwa abagera kuri miliyoni 36.7 bafite ubwandu bwa Virusi itera SIDA, barimo miliyoni 1.8 z’abana.

Ababana n’ubwandu bw’agakoko gatera SIDA biyongera cyane mu mijyi mu Rwanda, kuko bari ku kigero cya 5.6%, mu gihe mu cyaro ari 2.6%. Mu baryamana bahuje ibitsina, ubwandu buri kuri 3.3%, mu gihe 11,1% bo ari abashakanye batandukanye. Nibura abantu 25% mu bakora imibonano mpuzabitsina bakoresha agakingirizo, mu babana n’ubwandu bwa SIDA, 33.1% gusa ni bo bagakoresha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza