Bizagenda bite mu kuboneza urubyaro nyuma y’aho Kiliziya Gatolika ikuriyemo akarenge?

Yanditswe na Kanamugire Emmanuel
Kuya 12 Ukwakira 2016 saa 08:46
Yasuwe : XX
0

Hashize imyaka itandatu hasohotse amabwiriza y’Abepisikopi ba Kiliziya Gatolika mu Rwanda avuga ko ibigo by’ubuvuzi bigengwa na Kiliziya Gatolika bitanga serivisi zo kuboneza urubyaro hakoreshejwe uburyo bwa kamere gusa.

Ibi byari bisobanuye ko uburyo butari ubwa kamere nk’ibinini, inshinge, udukingirizo no kwifungisha haba ku bagabo cyangwa abagore butazongera gutangwa mu bitaro, amavuriro n’ibigo nderabuzima byose bigengwa na Kiliziya Gatolika mu gihugu.

Mu kiganiro Umwepisikopi wa Diyoseze Gatolika ya Butare akaba na Perezida w’Inama y’Abepiskopi Gatolika mu Rwanda, Philippe Rukamba aherutse kugirana na IGIHE muri Kanama, yatangaje ko muri Diyosezi ye aribwo ariya mabwiriza batangiye kuyashyira mu bikorwa ariko mu zindi Diyosezi nka Kigali na Gikongoro akaba yaramenyerewe.

Byatumye benshi bibaza uko bizagenda ku baturage bakeneraga serivisi zo kuboneza urubyaro zitari uburyo bwa kamere mu mavuriro ya Kiliziya nyuma y’aho ikuriyemo akayo karenge.

Minisante yahinduye umuvuno

Itangazo rigaragara ku rubuga rw’ikigo cy’igihugu cy’ubuzima, RBC, risobanura ko inzego za Ministeri y’Ubuzima na Kiliziya Gatolika zikomeje ubufatanye muri gahunda zo kuboneza urubyaro nk’imwe mu nzira zo gufasha ibihugu kugera ku iterambere rirambye.

Iri tangazo ryashyizweho umukono n’inzego zombi, rivuga ko nyuma y’icyemezo cya Kiliziya Minisiteri y’Ubuzima yashyizeho ibigo byunganira ibigo nderabuzima hafi y’amavuriro agengwa na Kiliziya Gatolika, kugira ngo abaturage bashobore kubona hafi izo serivisi zo kuboneza urubyaro zitaboneka muri ayo mavuriro n’ibigo nderabuzima bya Kiliziya.

Ubufatanye bwa Kiliziya Gatolika na Minisiteri y’Ubuzima buzakomeza gushingira ku gushishikariza Abanyarwanda kwitabira gahunda zo kuboneza urubyaro ku bushake no gutanga amakuru ku buryo bwose bwo kuboneza urubyaro bwaba ubwa kamere cyangwa ubukoresha imiti.

Kiliziya Gatolika kandi yiyemeje ko abahisemo uburyo butaboneka ku mavuriro yayo bazajya bagirwa inama yo kugana ku bigo byunganira ibigo nderabuzima, cyangwa andi mavuriro n’ahandi ubwo buryo bushobora gutangirwa.

Mu mavuriro ya Kiliziya Gatolika hazajya hatangwa inama z’uko uburyo bwa kamere burimo urunigi, kwigisha abagore uko bamenya igihe cyabo cyo gusama no konsa igihe kirekire bwakwifashishwa mu kuboneza urubyaro.

Kuki Kiliziya Gatolika yahagaritse bumwe mu buryo bwo kuboneza urubyaro?

Musenyeri Rukamba asobanura ko impamvu iki cyemezo cyafashwe, ari uko ku bigo nderabuzima hari aho abaturage bavugaga ko iriya miti ibagiraho izindi ngaruka aho kubafasha.

Yagize ati “Tubona ari ibintu abantu bagomba kwitondera cyane cyane ko gukoresha inshinge bigira ingaruka nyinshi. Ni ibintu abantu batari bakwiye kwirukira nta muganga cyangwa nta wundi ukureba hafi, kandi no mu buryo busanzwe twumva umugabo n’umugore bakwimenya, bakubahana kuko ari byo bihuye n’umuco wacu wa Kiliziya, bagakoresha ibijyanye no konsa igihe kirekire.”

Yakomeje avuga ko hari abantu benshi bajya bababwira ko buriya buryo bwo gukoresha inshinge butuma umubiri wabo utamera neza kandi bihindura uburyo bwo kubaho.

Umunyamabanga wa Leta ushinzwe Ubuzima rusange n'ubuvuzi bw'ibanze, Dr Patrick Ndimubanzi n'Umushumba wa Diyoseze ya Butare akaba n'Umuvugizi wa Kiliziya Gatolika, Rukamba Philippe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza