Guverinoma irajwe ishinga no kongera umubare w’abaganga bazobereye ibyo kubaga

Yanditswe na Evariste Nsengimana
Kuya 21 Mata 2019 saa 09:55
Yasuwe :
0 0

Minisiteri y’Ubuzima (Minisante) itangaza ko abaganga b’inzobere mu kubaga badahagije ari kimwe mu biteza icyuho mu kwegereza ubuvuzi abanyarwanda ariko ko hari ingamba zashyizweho zitanga icyizere.

Ihuriro ry’abaganga babaga mu Rwanda rigaragaza ko abaganga b’inzobere mu kubaga bari mu gihugu bagera kuri 75 nyamara abakeneye kubagwa ari benshi.

Minisante itangaza ko impuzandengo y’abanyarwanda badahabwa ku gihe serivisi zo kubagwa ari 60%. Ishami ry’Umuryango w’Abibumbye ryita ku Buzima, OMS, rigaragaza ko ku Isi abadahabwa izo serivisi barenga 90%.

Mu nama Mpuzamahanga yahurije i Kigali abaganga babaga, abatera ikinya, abanyeshuri n’abandi bakora mu serivisi z’ubuzima basaga 400 kuri uyu wa 20 Mata, bagaragaje ko kuba hari abarwayi bakenera kubagwa ntibabibone biteza icyuho mu buvuzi budaheza.

Umuyobozi w’Ihuriro ry’abanyeshuri bateza imbere umwuga wo kubaga mu Rwanda ari nawo wateguye iyi nama, Muhumuza Arsène, yavuze ko igamije gufatira imyanzuro ibibazo biwugarije birimo kugabanya icyuho cy’abakenera kubagwa n’ababikorerwa, ababura ubushobozi bwo kubagwa n’ibindi.

Umuyobozi w’ihuriro ry’abaganga babaga mu Rwanda, Dr. Nyundo Martin, yavuze ko kugira ngo icyo cyuho kigabanuke u Rwanda rukeneye hafi inshuro eshanu z’abo rufite (75) nibura bakarenga 200.

Umunyamabanga wa Leta muri Minisante, ushinzwe ubuvuzi bw’ibanze, Dr. Ndimubanzi Patrick, yavuze ko iki kibazo Leta igenda igifatira ingamba zitanga icyizere zirimo kongera umubare w’abanyeshuri babyiga muri Kaminuza.

Ati “Turacyafite abantu babaga bacye cyane ariko ubu bari kwiga, uko imyaka ihita hari abo twohereza mu bitaro hirya no hino […] Twabanje ku bitaro bikuru nka CHUK ariko uko barangiza kwiga turi kubajyana ku by’uturere, tukanahashyira ibikoresho.”

Dr. Ndimubanzi yavuze na gahunda zitandukanye zo gusanga abarwayi ku mavuriro [Citizen Outreach Program], igikorwa bafatanya n’ingabo n’abandi baganga bigira uruhare mu kugabanya umubare w’abamara igihe bategereje kubagwa.

Binyuze muri iyi gahunda, guhera ku wa 17 Mata Ingabo z’u Rwanda zizavura abarenga ibihumbi 137 barwaye indwara zitandukanye zirimo n’izikeneye kubagwa mu gihe cy’amezi atatu.

Abafite aho bahuriye n'urwego rwo gutanga serivisi zo kubaga mu bitaro bari bitabiriye iyi nama
Umuyobozi wa Kaminuza y'u Rwanda, Prof Philip Cotton ari gutanga ikiganiro
Umunyamabanga wa Leta muri Minisante ushinzwe ubuvuzi bw’ibanze, Dr. Ndimubanzi Patrick, yavuze ko iki kibazo Leta igenda igifatira ingamba zitanga icyizere
Umuyobozi w’ihuriro ry’abaganga babaga mu Rwanda, Dr. Nyundo Martin
Umuyobozi w’Ihuriro ry’abanyeshuri bateza imbere umwuga wo kubaga mu Rwanda ari nawo wateguye iyi nama, Muhumuza Arsène ari guha ikaze abashyitsi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza