Kwamamaza

Huye: Abiga ibya Farumasi batanze umusanzu mu kwirinda indwara zitandura

Yanditswe kuya 2-10-2016 saa 09:11' na Prudence Kwizera


Abanyeshuri biga ibijyanye na Farumasi muri Kaminuza y’u Rwanda bapimye abaturage ku buntu indwara zitandura, hagamijwe kubakangurira kuzirinda no kugira umuco wo kwisuzumisha hakiri kare ngo bamenye uko ubuzima bwabo buhagaze.

Ni nyuma y’uko abahanga mu by’ubuzima bagaragaje ko indwara zitandura nk’iz’umutima zishobora guhitana ubuzima bwa benshi mu myaka iri imbere mu gihe nta gikozwe.

Ubwo kuri uyu wa 30 Nzeri 2016, mu Rwanda hizihizwaga umunsi mpuzamahanga w’indwara z’umutima, abaturage bo mu Karere ka Huye bapimwe indwara zitandura ku buntu bahabwa n’inyigisho kuri zo.

Ikigamijwe ngo ni ugutanga umusanzu wabo mu kurinda abaturage kurwara indwara zitandura no kuzivuza hakiri kare.

Uhagarariye ihuriro ry’abavura indwara z’umutima mu Rwanda, Prof Joseph Mucumbitsi, avuga ko byakabaye byiza buri wese yisuzumushije akamenya uko ubuzima bwe buhagaze kuko indwara zitandura zugarije isi muri iki gihe, by’umwihariko mu karere u Rwanda ruherereyemo.

Prof Mucumbitsi ati “Isukari nyinshi mu maraso cyangwa diyabete ndetse n’indwara z’umutima, ushobora kubimarana igihe utazi ko urwaye. Umuvuduko mwinshi w’amaraso ni indwara mbi cyane kuko ntiteguza, ariko ikigamijwe ni ukubaha urugero kugira ngo bitabire kwisuzumisha kwa muganga no kwivuza hakiri kare igihe basanze barwaye.”

Abaturage bibukijwe ko indwara z’amaso, iz’amatwi, n’izo mu kanwa zishobora kuba intandaro yo kurwara indwara zitandura bityo ngo ni ngombwa kuzisuzumisha kakiri kare.

Indwara zitandura zikunze kugaragara muri iyi minsi ziganjemo Umutima, Impyiko, Ibihaha, Umwijima, n’izindi nka Diyabete, Kanseri na Asima.

Bimwe mu bitera izi ndwara zitandura harimo kunywa itabi n’inzoga nyinshi, kudakora imyitozo ngororamubiri, abaturage bakaba basabwa kubyitwararika mu rwego rwo kuzirinda.

Bamwe mu baturage bisuzumishije indwara zitandura, bavuga ko nyuma yo kumenya uko ubuzima bwabo buhagaze bagiye kwitwararika bagendeye ku nama bahawe n’abaganga.

Colette Nyirahabimana utuye mu Murenge wa Huye ati “Nasanze bari gusuzuma nanjye njyayo kuko n’ubundi njya numva umutima wanjye umeze nk’udakora neza, nkunda no kubira ibyuya igihe cyose. Inama bangiriye bambwiye ko ngomba kugabanya imirimo nkora ishoboka, idashoboka nkaba nyiretse nkaruhuka.”

Imibare y’Ishami ry’Umuryango w’Abibumbye ryita ku buzima (OMS), yerekana ko buri mwaka abantu bagera kuri miliyoni 38 ku isi bahitanwa n’indwara zitandura, kandi ngo abagera kuri miliyoni 16 bazirwaye bapfa mbere yo kuzuza imyaka 70.

Ibihugu bikiri mu nzira y’amajyambere ni byo byibasirwa cyane n’izi ndwara kuko 82% by’abapfa batarageza ku myaka 70 babarizwa muri ibyo bihugu.
Mu Rwanda, imibare itangwa na Minisiteri y’Ubuzima, igaragaza ko abagera kuri 25% bagana amavuriro atandukanye baba bivuza indwara zitandura.

Umunsi Mpuzamahanga w’indwara z’umutima usanzwe wizihizwa ku itariki 29 Nzeri, watangiye kwizihizwa mu Rwanda mu mwaka wa 2000. Insanganyamatsiko y’uyu mwaka igira iti”Twite ku buzima bwacu, twite ku mutima wacu kugira ngo tugire ubuzima bwiza.”

Abanyeshuri biga ubuvuzi na Farumasi muri Kaminuza y'u Rwanda batanze umusanzu wabo mu kurwanya indwara zitandura
Bagiriye inama abaturage z'uburyo bakwiye kwirinda izi ndwara

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved