Ibihugu bya EAC mu bufatanye bushya mu gukumira indwara z’ibyorezo

Yanditswe na Rabbi Malo Umucunguzi
Kuya 2 Mutarama 2018 saa 11:45
Yasuwe :
0 0

Ibihugu bigize Umuryango wa Afurika y’Iburasirazuba (EAC), biri mu rugamba rwo gufatanya nk’ibihugu bigize umuryango n’abafatanyabikorwa mpuzamahanga, muri gahunda z’ingenzi zizatuma abatuye ibyo bihugu bagira ubuzima bufite ireme.

Nk’uko ikinyamakuru Dailynews cyo muri Tanzania cyabitangaje, mu kurwanya no kwirinda indwara, akarere kari gukorana kuri gahunda yo guhanahana amakuru ku ndwara zandura n’izitandura, ishyirwaho rya laboratwari y’icyitegererezo y’akarere hakanongererwa ubushobozi n’iz’imbere mu bihugu.

Umuyobozi ushinzwe itumanaho mu Muryango wa Afurika y’Iburasirazuba, Owora Othieno, yavuze ko hari n’izindi ngamba ziteganywa mu kongerera imbaraga ubushobozi bw’ibihugu mu bwirinzi, ubuvuzi n’uburyo bwo kurenga burundu indwara zandura n’izitandura.

Mu kongera ubwo bushobozi, yavuze ko Ishami rishinzwe kurwanya no gukumira indwara riri gukora ku mishinga ibiri irimo uwo kuzamura urwego rwa za laboratwari mu karere (EAPHLNP) n’undi wo kubaka uburyo bwo gukurikirana indwara (EAIDSNet).

EAPHLNP iterwa inkunga na Banki y’Isi iri gushyirwa mu bikorwa n’ibihugu bigize EAC, ugamije gushyiraho laboratwari z’ubuvuzi ziri ku rwego rukomeye zizajya zifasha mu buvuzi bw’igituntu n’izindi ndwara zandura.

Uwo mushinga ukorana na laboratwari 25 muri EAC zatoranyijwe n’ibihugu, ziri ahantu zakira abantu benshi bakeneye kwitabwaho nk’abimukira n’impunzi, ahari indwara z’ibyorezo cyangwa abantu batishoboye.

Othieno yanavuze ko EAPHLNP izatuma utwo duce tubona ubuvuzi buhamye, hagamijwe gukumira ikwirakwizwa ry’indwara cyane cyane mu duce two ku mipaka, bitewe n’uko amakuru ku ndwara azajya amenyekana vuba, abaturage bakaburirwa vuba hagakorwa n’ubushakashatsi.

EAIDSNet yo ihuza za Minisiteri z’ubuzima muri EAC, ku bufatanye n’ibigo bishinzwe ubushakashatsi n’ubumenyi mu by’ubuzima.

EAIDSNet yashyizweho mu guhangana n’icyorezo cya Malaria cyari gikomeye gukwirakwira ahagana mu 1990, ariko bitewe n’ubushobozi buke mu kuyisuzuma, biza kugaragara ko bigoye gushyiraho uburyo bwo kuyirwanya kimwe n’izindi ndwara zandura.

Kuva yajyaho mu 2000, ibihugu bigize EAC ku nkunga ya Rockefeller Foundation, byashyizeho EAIDSNet hagamijwe guhanahana amakuru ku ndwara zishobora kwambukiranya imipaka hagamijwe kuzirwanya no kuzikumira.

Umuyobozi ushinzwe itumanaho mu Muryango wa Afurika y’Iburasirazuba, Owora Othieno

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza