Ibihuha bikomeje kudindiza gahunda zo kuboneza urubyaro

Yanditswe na Akayezu Jean de Dieu
Kuya 13 Gashyantare 2019 saa 09:51
Yasuwe :
0 0

Ubwiyongere bukabije bw’abaturage butajyana n’umuvuduko w’ubukungu bw’ibihugu, ababyara bari munsi y’imyaka 18, ni bimwe mu bibazo bihangayikishije cyane ibihugu biri mu nzira y’amajyambere birimo n’u Rwanda.

Mu gihugu hose abana ibihumbi 17 bari hagati y’imyaka 15 na 19 batewe inda zitateguwe mu mwaka wa 2016.

Guverinoma y’u Rwanda yihaye intego ko Abanyarwanda bangana na 60% mu mwaka wa 2024 bazaba bafite uburyo bugezweho bwo kubafasha kuboneza urubyaro.

Nubwo umubare w’abagana serivisi zo kuboneza urubyaro ugenda wiyongera aho bageze kuri 48%, iyi gahunda igenda ihura n’imbogamizi zitandukanye harimo n’ibihuha biyivugwaho.

Urugero ni aho hari abaturage benshi bakunze kuvuga ko kwitabira gahunda zo kuboneza urubyaro babyumva neza ko ari iby’ingenzi ariko bakagaragaza impungenge z’uko uburyo bukoreshwa bushobora kubagiraho ingaruka.

Hari agapira bashyira muri nyababyeyi kamara hagati y’imyaka 10 na 12, hari agapira bashyira mu kiziga cy’ukuboko k’umubyeyi kamara hagati y’imyaka 3 na 5.

Hari kandi uburyo bwa burundu bwo gufunga umuyobora ntanga ku mugore cyangwa bakawukata (ibi no ku mugabo birakorwa), hari kandi uburyo bw’inshinge bumara amezi atatu ugasubira kwiteza izindi, hari n’ibinini bikoreshwa iyo ugiye gukora imibonano mpuzabitsina udashaka gusama (Ibi ubinywa buri uko ugiye gukora imibonano cyangwa nyuma gato y’uko uyikora).

Ubundi buryo bukoreshwa ari nabwo bworoshye ni ugukoresha agakingirizo.

Abagore bo bavuga ko iyo bakoresheje ubu buryo bita ubwa kizungu bibateza umubyibuho, bava amaraso adahagarara muri kwa kwezi k’umugore, bitera kwibagirwa n’ibindi byinshi bituma abantu bacika intege ku bijyanye no kwitabira izi gahunda.

Mu kiganiro yagiranye na IGIHE, Impuguke mu buvuzi rusange akaba n’umwe mu bigeze kuba mu Nteko Ishinga Amategeko, Mporanyi Théobald, yavuze ko mu Rwanda hari abaganga babyigiye ku buryo badashobora guha imiti abaturage kandi bazi ko yabagiraho ingaruka.

Ati “Abo duhura na bo iyo ubyumva hirya no hino baragenda bakabishyiraho ibihuha, bamwe bavuga ngo iyo umugabo bamukoreye buriya buryo ntiyongera kubaka urugo rwe ariko ntaho bihuriye”.

“Byose ni ibihuha kandi abenshi bibaca intege, tubona ko imiti ihari na buriya buryo bwose buri kwa muganga, ababishoboye babihuguriwe barahari. Tukibaza impamvu abantu batabyitabira, ariko akenshi iyo ubibasobanuriye bavuga ko nta makuru bari bafite.”

Ese koko iki ni ikibazo?

Nta tegeko rigenga kuboneza urubyaro ndetse nta n’ingingo iboneka mu gitabo cy’amategeko ishobora guhana umuntu wabyaye abana benshi cyangwa abo adashoboye kurera.

Raporo ya gatanu y’Ikigo cy’Igihugu cy’Ibarurishamibare ku Miturire n’Ubuzima (RDHS 5) yerekanye ko ubushakashatsi bwakorewe ku bagore 13,497, bugaragaza ko mu 2005 umugore umwe yabarirwaga impuzandengo y’abana 6.1, mu 2014/2015 yageze kuri 4,2. Intego ni uko baba 2, 3%.

Mporanyi avuga ko kuboneza urubyaro ari ingenzi kuko bizatuma igihugu kigera ku ntego cyihaye zirimo n’icyerekezo 2020, kugabanya abana bagwingira, ubucucike mu mashuri mwarimu bityo mwarimu abashe kwigisha abana afitiye ubushobozi hagerwe no ku ireme ry’uburezi.

Yagize ati “Iyo tuvuga kuboneza urubyaro burya ni ikibazo kireba umuryango, umuntu ufite abana benshi mu rugo iyo batarya ngo bahage akenshi hazamo intonganya n’amahane, abagabo benshi bata ingo zabo kuko babona mu rugo nta kigenda.”

“Iyo aje kabiri gatatu hari umubaza ngo turarya iki? Abana bamwe barizwa n’uko batariye, abandi batatangiwe mituweli akenshi hari igihe ahunga akagenda.”

Umuyobozi Mukuru w’Umuryango ugamije guteza imbere ubuzima, Dr Kagaba Aflodis yasabye abanyamakuru gufata iya mbere mu gukangurira abaturage kwitabira izi gahunda zo kuboneza urubyaro ndetse no kurwanya ibihuha bikururwa n’abadafite amakuru kuri ubu buryo bukoreshwa.

U Rwanda rufatanyije n’abandi bafatanyabikorwa, umubare w’Abanyarwanda bitabira kuboneza urubyaro, bagenda biyongera aho kugeza ubu icyuho cy’abatagerwaho na serivisi zo kuboneza urubyaro cyavuye kuri 40% mu 1992 kigera kuri 19% mu 2015 ndetse abakoresha ubwa kizungu bavuye ku 10% mu 2005 bagera kuri 48% mu 2015.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza