Ikigo gikora imiti irimo n’iya kanseri kigiye gutangira gukorera mu Rwanda

Yanditswe na IGIHE
Kuya 17 Kanama 2017 saa 06:12
Yasuwe :
0 0

Ikigo mpuzamahanga gikora ibijyanye n’imiti itandukanye irimo n’iya kanseri, L.E.A.F. Pharmaceuticals, cyatangije ishami ryacyo mu Rwanda rigamije kuzamura igihugu ku rwego ruzatuma kiza ku isonga mu bikora imiti ivura iyi ndwara muri Afurika bitarenze 2019.

L.E.A.F. (Lifting and Empowering All Families), itsinda rigamije kuzamura imiryango no kuyongerera ubushobozi rikorera mu gace ka Valley Forge muri Leta ya Pennsylvania.

Ifite inshingano zo kuvumbura, guteza imbere no gucuruza imiti yujuje ubuziranenge ivura indwara za kanseri n’izindi z’ibyorezo yatangaje ibyo gutangiza ishami ryayo mu Rwanda rifite icyicaro mu Mujyi wa Kigali.

L.E.A.F. Rwanda izibanda ku guteza imbere igihugu mu buryo bugamije kugishyira ku rwego rw’icyitegererezo mu gukora ubushakashatsi mu by’ikoranabuhanga n’iterambere birushyira ku rwego rwa mbere mu gukora imiti ku mugabane wa Afurika.

Iyi Sosiyete izakorana n’abahanga mu by’ikoranabuhanga n’abashakashatsi mu by’ikorwa ry’imiti bo muri Afurika no hanze yayo hagamijwe gukora imiti izafasha mu guhangana n’ibyorezo bikomeje kwibasira umubare munini w’abatuye umugabane.

Umuyobozi wa L.E.A.F. Pharmaceuticals, Dr. Clet Niyikiza uba muri Amerika, yatangaje ko hazabaho imikoranire hagati y’impande zombi hagamijwe kongera imbaraga z’uru rwego muri Afurika.

Yagize ati “Usubije amaso inyuma mu mateka, usanga byarakunze kugorana cyane kubona uko imiti igezwa ku baturage ba Afurika byihuse. Intego nyamukuru ya L.E.A.F. Rwanda ni ukubaka uburyo buzihutisha iyi miti ku bayikeneye.

L.E.A.F. Pharmaceuticals yatangiye gukora muri Kanama 2014, ishami ryayo mu Rwanda rizaba ryashyize ahagaragara imiti igezweho ivura kanseri izatangwa muri Afurika guhera mu 2019.

Mu Ukwakira 2016, Dr. Niyikiza n’itsinda rye muri L.E.A.F., bahawe igihembo cyo guhanga ibishya mu kwita ku buzima mu 2016, bitewe n’uruhare rwabo mu guhangana na kanseri.

Dr Niyikiza, umubyeyi w’abana batatu, afite impamyabushobozi y’ikirenga mu Mibare yavanye muri Kaminuza ya Bloomington iherereye muri Leta ya Indiana muri Amerika.

Yatangiye ibyo gukora imiti muri Mutarama 1991 akorana na Syntex Corporation mu Mujyi wa Palo Alto muri Leta ya California. Guhera mu 2005 yari umwe mu bagize ihuriro rya Amerika ryashinzwe na Perezida George H. W. Bush rigamije guteza imbere ibijyanye n’ubushakashatsi mu bya kanseri, uko yakwirindwa n’uko yavurwa. Ubu ari mu bagize itsinda rishinzwe ubujyanama mu biro bya Perezida mu Rwanda.

Niyikiza kandi ni umwe mu bagize Umuryango w’Abanyamerika ugamije gukora ubushakashatsi kuri kanseri.

Inama y’Abaminisitiri yo kuwa 26 Gicurasi 2017 yahaye L.E.A.F Pharmaceuticals ubutaka bungana na hegitari 2.5 bwo kubakaho muri Kigali Innovation City (KIC).
Iki kigo cyatangiye gukora muri Kanama 2014, kivuga ko kizaba cyashyize hanze imiti igezweho ivura kanseri muri Afurika guhera mu 2019.

Umunyarwanda Dr. Clet Niyikiza uyobora L.E.A.F. Pharmaceuticals, yegukanye igihembo akesha guhangana na kanseri mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza