Kwamamaza

Inama ku bahora bitana bamwana bashinjanya ubugumba

Yanditswe kuya 28-10-2016 saa 15:51' na Hakizimana Thamimu


Imwe mu miryango y’abashakanye badahita bagira amahirwe yo kubyara usanga bitana bamwana umwe abyegeka kuri mugenzi we, nyamara yaba umugabo cyangwa umugore ngo ashobora kugira ikibazo kimutera ubugumba.

Uku kutavuga rumwe hagati y’abashakanye ku bijyane n’ubugumba bishobora kuba intandaro y’amakimbirane aganisha ku butane, cyane ko hari n’abifatira umwanzuro wo gutana cyangwa gucana inyuma kandi batigeze begera muganga ngo abagire inama bakurikiza.

Bamwe mu baturage batandukanye bo mu Mujyi wa Kigali baganiriye na IGIHE, bemeza ko ikibazo cy’ubugumba mu Mujyi wa Kigali ari kimwe mu bituma zimwe mu ngo zicana inyuma cyangwa zitana.

Hari bamwe bavuga ko hari abagabo bakunda gutana n’abagore babo babashinja kutabyara kandi batazi neza ko nabo bashobora kuba ari bo bafite icyo kibazo.

Muhire Asumani utuye mu Murenge wa Gitega, mu Karere ka Nyarugenge yagize ati “ Hari abatana n’abagore babo kubera ko bamaranye igihe batabyara ku buryo hari n’ababa bari kubashinja ko kutabyara kwabo babitewe n’uko bakuyemo inda nyinshi bakiri abakobwa.”

Uwase Charlotte we yagize ati “ Ikibazo abagore tugira ni uko abagabo benshi iyo babonye bamaranye igihe kinini n’abagore babo batarabona urubyaro bahita bumva ko ikibazo kiri ku bagore ku buryo rimwe na rimwe bahita batangira kubaca inyuma.”

Yashimangiye ko ubugumba mu bashakanye ari imwe mu ntandaro y’amakimbirane aganisha ku butane bukunze kugaragara mu ngo zitandukanye ngo kuko na we afite abagore b’inshuti ze bagera kuri bane batanye n’abo bashakanye kubera ko bari bamaranye igihe babana ariko nta mwana.

Muganga ati ’ubugumba ni 50% ku kandi’

Umuyobozi w’ibitaro bya kaminuza bya Kigali, CHUK, Dr Théobald Hategekimana, avuga ko abantu bafite ibibazo byo kutabyara buri gihe cyose bagomba kwegera abaganga bakabagira inama kuko hari n’ibijyanye n’imiti bahabwa cyangwa se ubundi buryo bashobora gukoresha kugira ngo babafashe kubyara, kurusha uko bahora bitana bamwana, cyane ko usanga 50% yo kutabyara mu muryango ituruka ku bagore indi igaturuka ku bagabo.

Yagize ati “ Ubugumba bushobora guterwa n’impamvu nyinshi zirimo iz’ubumuga umuntu avukana, indwara zandurira mu mibonano mpuzabitsina nka Mburugu, Imitezi, kuba umukobwa yakurirwamo inda nabi n’abantu batabyigiye kubera gukoresha ibikoresho bitabugenewe n’ibindi.”

Yakomeje agira inama abagore n’abagabo bamaze kubana kujya bihutira kujya kwa muganga mu gihe bamaranye imyaka ibiri batarabyara kuko hari uburyo babafasha bakabyara.

Yagize ati “ Inama nagira abantu babana bakabona bamaze imyaka ibiri umugore atarasama, ni uko bajya bihutira kujya kwa muganga kuko bashobora no kubyara nyuma y’iyo myaka biturutse ku bundi bufasha bw’abaganga babaha bakabyara bitewe n’uko babaha imiti babanje kureba uwo ubwo burwayi buriho hagati yabo.”

Abenshi mu batandukana bitewe n’ubugumba, batandukana bitanyuze mu mategeko (basaba gatanya) bitewe n’uko mu mpamvu zishingirwaho batanga gatanya iy’ubugumba itabamo.

Mu itegeko rishya rigenga abantu n’umuryango nº 32/2016 ryo ku wa 28/08/2016 riherutse gusohoka mu Igazeti ya Leta nº37 yo ku wa 12/09/2016, rigena gutandukana kw’abashakanye, bagaragaza ko impamvu zatuma abashakanye batandukana byemewe n’amategeko, harimo kuba umwe muri bo yarahawe igihano cy’ icyaha gisebeje cyane, ubusambanyi, guhoza undi ku nkeke, kwanga gutanga ibitunga urugo, guta urugo igihe cy’amezi cumi n’abiri nibura, kumara nibura imyaka itatu abashakanye batabana ku bushake bwabo, ihohoterwa rishingiye ku gitsina ndetse no kutabana mu gihe kirenze amezi cumi n’abiri akurikirana uhereye igihe habereye ishyingirwa nta mpamvu zifite ishingiro.

Dr Hategekimana uyobora CHUK avuga ko abashakanye bakabura urubyaro bajya begera abaganga aho kwitana ba mwana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved