Indonesia irigira ku bitaro bya gisirikare by’u Rwanda gusiramura hakoreshejwe impeta

Yanditswe na Philbert Girinema
Kuya 9 Kamena 2015 saa 09:01
Yasuwe :
0 0

Intumwa zivuye muri Minisiteri y’ubuzima muri Indonesia zagiriye uruzinduko ku bitaro bya gisirikare i Kanombe zije kwigira ku Rwanda uburyo bwo gusiramura hakoreshejwe impeta buzwi nka PrePex

Uru ruzinduko ruhuriranye n’uko Minisiteri y’ubuzima muri Indonesia, Kaminuza ya GadjaMada n’Ikigo cya Bill Ctinton gifasha mu kwegereza abantu ubuvuzi (Clinton Health Access Initiative ), inzego z’igihugu n’intara zishinzwe ubuzima n’izishinzwe kurwanya SIDA zirebera hamwe uburyo hakorwa inyigo ku kwirinda SIDA hifashishijwe uburyo bwo gusiramura hakoreshejwe impeta buzwi nka PrePex.

Umuyobozi w’ibitaro bya gisirikare by’u Rwanda, Col. Dr. Ben Karenzi, yishimiye uruzinduko rw’izi ntumwa avuga ko Ibitaro bya gisirikare by’u Rwanda byishimiye gusangiza ubwo bumenyi izi ntuma kuko atari ubumenyi bwo kwiharira.

Izi ntumwa zirimo abakozi ba Minisiteri,inzego z’amadini n’abayobozi ku nzego zinyuranye ndetse n’abaforomo, babonanye kandi na Minisitiri w’ubuzima, Dr.Agnes Binagwaho, wababwiye ko u Rwanda ari igihugu cyemera ihangwa ry’udushya n’ubumenyi.

Yagize ati:“Turi guverinoma yemera ubumenyi n’ihangwa ry’udushya,ubu buryo bwa PrePex bwigiwe hano buranahakoreshwa.”

Yavuze ko gukoresha ubu buryo bukagira akamaro bisaba kubishyiraho umutima ku mpande zose bireba.

Yagize ati: “Tubishyizeho umutima. Nka guverinoma dukora nk’umuntu umwe kandi hari imikoranire myiza na minisiteri zinyuranye kandi ubutunzi bwacu ni abaturage bacu.”

Umuyobozi wa komisiyo yo kurwanya SIDA mu ntara ya Papua muri Indonesia, Dr. Constance Karma, yashimye ubu buryo avuga ko bizeye ko buzabafasha.

Yagize ati: “Twabonye ko ubu buryo bwa PrePex ari uburyo bworoshye gushyira mu bikorwa,tukaba duteganya guhita dutangira gukora inyigo yabwo.Twizeye ko bizagenda neza natwe tukazahugura abandi baganga mu Ntara ya Papua bagatangira kubukoresha.Twanyuzwe n’ubufatanye bwa Minisiteri y’ubuzima,imiryango yigenga n’abanyamadini tutaretse n’ingabo. Tubonye ukuntu bizafasha abantu birirwaga batonze imirongo bashaka kwisiramuza”.

Iri tsinda ryahuguwe ku gukoresha ubutryo bwa PrePex rizayishyira mu bikorwa ibyo ryakuye muri ayo mahugurwa nirigera muri Indonesia mu mezi make ari imbere.

Ubu buryo bukaba bufatwa nk’ubuzafasha mu gukumira icyorezo cya SIDA bwuzuzanya n’ubukangurambaga bwakorwaga harimo ikoreshwa ry’agakingirizo,inyigisho zinyuranye,kwipimisha n’ubundi.

Ni ku nshuro ya mbere uburyo bwa PrePex bugiye gukoreshwa hanze y’umugabane wa Afurika nk’uburyo bwo kwirinda icyorezo cya SIDA ku rwego rw’igihugu.


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza