Inkingo za Covid-19 zahageze, abayobozi b’ibitaro bati ’Turiteguye’

Yanditswe na Akayezu Jean de Dieu
Kuya 4 Werurwe 2021 saa 04:37
Yasuwe :
0 0

Minisiteri y’Ubuzima mu Rwanda yatangaje ko kuri uyu wa Gatanu ibikorwa byo gukingira COVID-19, hirya no hino mu gihugu biratangira ndetse abaturage bagiye gukingirwa, aho bizakorerwa n’uburyo inkingo zizabikwamo byamaze gutegurwa.

Igikorwa cyo kugeza inkingo hirya no hino mu gihugu cyatangiye mu gitondo cyo kuri uyu wa Kane tariki 3 Werurwe 2021, nyuma y’amasaha make inkingo zikabakaba 347,000 za COVID19 za mbere zigejejwe mu Rwanda.

Inkingo u Rwanda rwakiriye binyuze muri gahunda ya COVAX, zaje mu byiciro bibiri kandi mu bwoko bubiri harimo 102.960 za Pfizer n’izigera kuri 240.000 za AstraZeneca.

Mu gihe biteganyijwe ko kuri uyu wa Gatanu haratangira ibikorwa byo gukingira, abayobozi b’ibitaro by’Intara n’Uturere two hirya no hino mu gihugu bazindukiye i Kigali kwakira izi nkingo aho zirahita zigezwa ku bigo nderabuzima abantu bagatangira gukingirwa.

Abaturuka mu bice bya kure ndetse bigoye ko imodoka zihagera, hifashishijwe indege za gisirikare mu kugezayo izi nkingo aho zigezwa ahari ibibuga byazo hagahita hifashishwa imodoka mu kuzigeza mu bitaro mu gihe ibitaro byo muri Kigali no hafi yaho hifashishijwe imodoka.

Uturere 14 nitwo twajyanywemo izi nkingo hakoreshejwe indege mu gihe utundi hifashishijwe imodoka.

Muri rusange izi nkingo zajyanywe ku bitaro 50 n’ibigo nderabuzima 508 hirya no hino mu gihugu. Gahunda y’ikingira izatangira ku wa gatanu tariki 4 Werurwe 2021, ku bitaro n’ibigo nderabuzima bya Leta byose.

Minisiteri y’Ubuzima itangaza ko ku ikubitiro hirya no hino mu gihugu hazakingirwa abantu 171.480 ari nabo bafatwa nk’abafite ibyago byo kwandura Covid-19 kuruta abandi, harimo abakora mu nzego z’ubuzima ni ukuvuga abaganga, abaforomo, abajyanama b’ubuzima ndetse n’abakozi bita ku barwayi ba Coronavirus umunsi ku wundi.

Abandi bazakingirwa ku ikubitiro ni abantu bakuze guhera ku myaka 65 kuzamura, abafite ubumuga, abarwaye indwara zikomeye nka Diabete, iz’umutima ndetse n’iz’ubuhumekero.

Abazakingirwa barateguwe!

Kuva mu ntangiro za Mutarama 2021, ubwo inkuru y’uko u Rwanda rwitegura kwakira inkingo yatangiraga kuvugwa cyane, abantu benshi bakomeje kuvuga ibitandukanye kuri izi nkingo zigiye guhabwa abantu mu rwego rwo kubakingira COVID-19.

Ibyavuzwe kuri izi nkingo harimo n’ibihuha ari nayo mpamvu mu bijyanye no kwitegura kuzakira habanje no kubaho gusobanurira abaturage impamvu ari ngombwa gukingirwa, ibyiza byabyo ndetse n’andi makuru ya ngombwa kuri izi nkingo.

Abayobozi b’ibitaro nibo baje gufata inkingo ku bubiko bwazo muri RBC, bakaba nabo bahita bazigeza mu bigo nderabuzima aho inkingo zizatangirwa ku munsi w’ejo hakingirwa ibyiciro by’abarusha abandi ibyago byo kwandura no kuzahazwa na COVID19.

Amatsinda akurikirana igikorwa cy’ikingira yamaze gutegurwa mu bitaro byose by’uturere. Arimo abakozi bashinzwe gutanga inkingo, abashinzwe gukusanya amakuru y’abakingirwa, abashinzwe ibikoresho ndetse n’abakurikirana ingaruka zaterwa n’urukingo

IGIHE yaganiriye na bamwe mu bayobora ibitaro bari baje kwakira izi nkingo bazijyanye hirya no hino mu turere n’abakora mu rwego rw’ubuzima muri rusange, bagaragaza ko imyiteguro yo gukingira yarangiye ndetse abaturage bamaze gusobanurirwa ibijyanye n’izi nkingo byose.

Umuyobozi w’Ibitaro bya Kaminuza y’u Rwanda bya Kigali, CHUK, Dr Hategekimana Théobald yavuze ko hamaze gukorwa urutonde rw’abantu bazakingirwa ku ikubitiro ndetse bamaze gutegurwa ku buryo ku wa Gatanu baratangira gukingirwa.

Ati “Ingamba zarafashwe twateganyije n’umubare uzakingirwa mu cyiciro cya mbere, twe nk’abakozi, abaganga, abakora amasuku mbese abantu bose bo mu kigo hari n’ibindi byiciro twatekerejeho bose hamwe barenga 1000.”

Yakomeje agira ati “Twamaze kubategura, aho bazaruhererwa kugeza bamaze gukingirwa kugira ngo tuzarindire ibindi byiciro by’inkingo uko bizagenda biza mu Rwanda.”

Dr Hategekimana yavuze ko aho izi nkingo zirashyirwa hamaze gutegurwa ndetse ibizakenerwa byose bihari ku buryo nta kibazo na kimwe gishobora gutuma hagira urukingo na rumwe rwangirika rutageze kubo rwagenewe.

Ati “Icyo nabwira abantu ni uko urwo rukingo barwitabira kuko ni rwiza rufite ubuziranenge rukwije ibya ngombwa byose kugira ngo rushobore gufasha abaturage.”

Yakomeje agira ati “Bazirinde ibihuha, kuko ubwo rwatangiye kuza nanjye nifuzaga ko naba mu ba mbere barubona n’aka kanya barumpaye kuri njyewe nk’umuganga nzi neza icyo bimaze, narabonye abarwaye, nkabona abantu uko bagiye bapfa n’ingaruka zigera ku bayikize[…] nibaza ko njyewe urwo rukingo rwose ntareka kurufata , nibwo butumwa naha Abanyarwanda.”

Umuyobozi Mukuru w’Ibitaro bya Kaminuza bya Butare, Dr Sendegeya Augustin yavuze ko “Kubona habonetse urukingo rushobora kuramira abantu benshi kuri twe nk’abaganga ni ibyishimo. Tumaze igihe twitegura ko izi nkingo zihageze dutangira igikorwa, urutonde rw’abazakingirwa barahari, ahazakorerwa igikorwa harateguwe kandi n’abazakingira barahuguwe.”

Yakomeje agira ati “Bose twaraganiriye mu nzego zitandukanye kandi ibyo tubona ni uko nabo babyiteguye. Izi nkingo zirizewe kuko zagiye zemezwa n’inzego zitandukanye kandi no mu gihugu dufite inzego zireba ubuziranenge. Ibivugwa ni byinshi ariko twe nk’abakozi bo kwa muganga tuzi neza ko izi nkingo zizewe.”

Dr Sendegeya avuga ko n’ubwo inkingo zabonetse bidakuyeho izindi ngamba z’ubwirinzi.

Umuyobozi Mukuru w’Ibitaro bya Nyamata mu Karere ka Bugesera, Dr Rutagengwa Williams yavuze ko muri aka karere hakozwe urutonde rw’abagiye gukingirwa bakabakaba ibihumbi bitandatu [6000] kandi bose bamaze gutegurwa no gusobanurirwa ibijyanye n’izi nkingo bazahabwa.

Yakomeje agira ati “Birumvikana hari byinshi twaganiriza abantu ku bijyanye n’uru rukingo, abantu ntabwo baba bafite amakuru angana ariko ay’ibanze ajyanye n’uru rukingo twarabaganirije kandi n’abandi tuzakomeza kubasobanurira kuko dufite abantu biteguye bahuguwe kuzabikora.”

Hari icyo bivuze kuba u Rwanda rwahawe inkingo...

Izi nkingo u Rwanda rwakiriye n’izindi ruzakira, zatanzwe binyuze muri gahunda ya Covax. Bivuze ko ari ubuntu, kuko iyi gahunda yagiyeho ku bufatanye bw’Ishami ry’Umuryango w’Abibumbye ryita ku Buzima, OMS, Guverinoma y’u Bufaransa ndetse na Komisiyo y’Ibihugu by’Ubumwe bw’u Burayi.

Iyi gahunda izageza inkingo ku bihugu 145 bikennye n’ibiri mu nzira y’amajyambere hirya no hino ku Isi.

U Rwanda ruzahabwa inkingo 1.098.960 muri iyi gahunda. Izi nkingo ariko ntabwo zizaba zihagije, ari yo mpamvu hamaze gutegurwa ingengo y’imari ingana na miliyoni 124 $ izifashishwa muri gahunda yo kugura izindi.

U Rwanda ruteganya ko uyu mwaka wa 2021 uzarangira rukingiye 30 % by’abaturarwanda ndetse uwa 2022 ukarangira hakingiwe abandi 60%.

Dr Hategekimana yavuze ko “Biriya ni ibintu bigaragaza uko u Rwanda ruhagaze ku rwego rwo kwitegura kuko iyo bagiye gutanga ziriya nkingo ngira ngo barebye urwego ibihugu bigezeho byitegura.”

Yakomeje agira ati “Buriya n’ibindi bihugu bizarubona ariko iyo urubonye mu bya mbere aba ari amahirwe, bigaragaza ko uri ku rwego rushimishije rwo kwitegura ikintu icyo aricyo cyose gishobora kuza mu bijyanye n’ibyorezo cyangwa no kuvura izindi ndwara.”

Dr Sendegeya yagize ati “Iki ni igikorwa cyo gushimira ubuyobozi bw’igihugu cyacu.”

Dr Rutagengwa w’Ibitaro bya Nyamata, we asanga ari ishema ku gihugu n’urwego rw’ubuvuzi muri rusange.

Ati “Njyewe ndumva ari ishema, ngira ngo nk’abato mu gihugu cyacu bamenyereye kubona ibintu byiza byinshi, bimwe tukabona ari ibisanzwe. Ndatekereza ko hari abantu bashyizemo imbaraga zikomeye, dusoma amakuru tukabona ibihugu birimo ibikomeye bitarabona inkingo ariko igihugu cyacu cyarazibonye.”

Yakomeje agira ati “Ubwo rero hari abantu dukwiriye gukurira ingofero, hari abantu baba bari inyuma tutazi, ubuyobozi bw’igihugu bukora akazi gakomeye cyane. Ibyo kuri njye numva ari ishema kandi bituma nkomeza kugirira icyizere ubuyobozi bw’igihugu cyacu no kubwishimira.”

U Rwanda ni cyo gihugu cya mbere muri Afurika cyakiriye inkingo za Pfizer zitanzwe muri gahunda ya Covax kuko ibindi byose bimaze kugerwaho n’urukingo (ni ukuvuga Ghana na Côte d’Ivoire) byahawe urwa AstraZeneca.

Abaje gutwara inkingo bari kwiyandikisha n'umubare w'izo batwaye
Abashinzwe gutwara izi ndege bari gusanga hari abakozi bategereje guhita bafata inkingo bahita bazijyana mu bitaro
Hari abakozi ba RBC bari kubanza gusobanurira abaje gupakira izi nkingo uko zigomba gutwarwa neza ngo zitangirika
Ibi bikarito bya pulasitike nibyo inkingo ziri gutwarwamo
Ikoranabuhanga naryo ryimakajwe
Imodoka nyinshi zari zaje ahari ububiko bw'izi nkingo mu cyanya cyahariwe inganda kiri i Masoro
Imodoka zo ku bitaro bitandukanye nizo zaje gutwara inkingo mu Mujyi wa Kigali
Indege za gisirikare nizo zifashishijwe mu kugeza inkingo mu bice bya kure
Indege za gisirikare ziri gutwara inkingo mu bice bigoye kugerwamo n'imodoka
Inkingo zifite aho zibikwa habugenewe
Inkingo ziri kuvanwa mu bubiko bwa RBC zikajyanwa hirya no hino mu bitaro
Inkingo ziri kuvanwa mu ndege zihita zishyirwa mu modoka zizijyana ku bitaro
Inyuma ku bikarito bibitsemo izi nkingo harimo amabwiriza ajyanywe n'uko zikoreshwa
Izi ndege ziri kugeza inkingo ahari ibibuga by
Polisi y igihugu yaje guherekeza abatwaye inkingo kugira ngo bagereyo amahoro
Uburyo inkingo zibitswemo burahambaye

Amafoto ya IGIHE:Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .