Inzobere z’abaganga b’Abahinde zatangiye gusuzuma no kuvura kanseri n’umutima mu Rwanda

Yanditswe na Evariste Nsengimana
Kuya 8 Ugushyingo 2017 saa 09:58
Yasuwe :
0 0

Inzobere z’abaganga mu kuvura indwara za kanseri n’umutima zo mu bitaro bya Apollo mu Buhinde, bimwe mu bikomye muri Aziya, zatangiye gukorera ku Ivuriro La Confiance riherereye Kimironko mu Mujyi wa Kigali.

Ni igikorwa iri vuriro rihagarariye ibitaro bya Apollo ryatangije kuri uyu wa Gatatu, kikazamara iminsi ibiri, izi nzobere zisuzuma zikanavura abarwayi badakeneye kubagwa, ababikeneye bakoherezwa mu Buhinde.

Ntahimana Marie-Jeanne wari waje kuvuza umwana we umaze igihe arwaye umutima, yavuze ko akivuka yahoraga yikanga ndetse n’ibiro bitiyongera bimutera impungenge, amujyama kwa muganga .

Ati “Muri icyo gihe nari ntaramenya ikibazo afite, mujyana ku kigo nderabuzima, banyohereza CHUK, bamunyuza mu cyuma bambwira ko afite ikibazo cy’umutima.”

Nyuma yo gusuzumwa n’umwe muri izo nzobere, Dr. Anuradha Sridhar, uvura akanabaga abana barwaye umutima, yasanze akeneye kubagwa.

Umubeyi w’uwo mwana yishimiye kuba izo nzobere zaje gukorera mu Rwanda zikamwizeza ko yavurwa agakira nubwo asigarana ikibazo cy’amadolari ibihumbi bitandatu (asaga miliyoni eshanu z’amafaranga y’u Rwanda) asabwa kugira ngo azajyanwe kuvurirwa mu Buhinde.

Indwara zituruka ku mutima ziri mu zihitana abantu benshi ku Isi. Mu 2012, abagera kuri miliyoni 17,5 bahitanwe nayo, abenshi baturuka mu bihugu bikiri mu nzira y’amajyambere. Ikunze kwibasira abana bari munsi y’imyaka itanu n’abari hejuru ya 50; igaterwa ahanini n’umuvuduko w’amaraso w’igihe kirekire.

Ubushakashatsi bwakozwe n’Ikigo cy’Igihugu cy’Ubuvuzi (RBC) mu 2016, bwagaragaje ko mu bantu basaga ibihumbi 120 barwaye indwara y’umutima, hivuza gusa abasaga ibihumbi bitanu.

Dr. Anuradha Sridhar yavuze ko indwara z’umutima ku bana zihangayikishije kuko mu bana 1000 bavuka, 68 bavukana ibibazo by’umutima kandi hagati ya 20 na 25% byabo zikabica bataragira umwaka iyo batavuwe kare; by’umwihariko avuga ko muri Afurika hari ubushobozi buke bwo kubavura.

Yagize ati “Iyo urebye mu bihugu byinshi byo ku mugabane wa Afurika, kimwe n’u Rwanda ntibifite uburyo buhagije bwo kuvura izo ndwara ku bana. Ndatekereza kandi ko n’abaturage bakeneye gusobanurirwa byimbitse. Kubabwira no gusuzumisha abana nabyo ntibirumvikana ku kigero cyo hejuru. Twaje mu Rwanda kugira ngo babimenye, banasuzumwe indwara z’umutima. Turasaba abantu kuza gusuzumisha abana. ”

Umwana urwaye umutima agira ibimenyetso bitandukanye birimo guhumeka insigane, gucika intege, kurya ibidahagije rimwe na rimwe ibyo yariye akabiruka n’ibindi.

Dr. Ciza Herménégilde, Umuganga w’ ivuriro La Confiance, yasabye ababyeyi kwita ku buvuzi bw’abana kugeza bakize.

Ati “Kuvuza umwana bihera ku bigo nderabuzima, bakajya ku bitaro by’akarere. Aho hose aba amuvuza. Muri icyo gihe, hari ababihagarika kuko usanga ubushobozi butabakundira, gusa hari n’abakomeza bakareba inzobere zitandukanye no mu bitaro bikuru. Twabasaba ko batacika intege bakagerageza kubavuza.”

Inzobere z’Abahinde ziri mu Rwanda zavuze ko mu kuvura indwara z’umutima, cyane cyane ukeneye kubagwa mu buryo bworoheje bimusaba amadolari ari hagati y’ibihumbi bitatu n’icumi.

Umuyobozi mukuru w’Ivuriro La Confiance, Jobin Jerome, yavuze ko abantu barenga 80 biyandikishije ngo bazabonane n’izo nzobere kandi ko kwandika bigikomeje kuko igikorwa bagiteguye kugira ngo borohereze abarwaye izo ndwara bakeneraga kujya kwivuza mu Buhinde.

Yongeye ko mu mezi atandatu ari imbere, kuri La Confiance hazaba harazanwe imashini ihambaye mu kubaga umutima, izaba igeze bwa mbere mu Rwanda ( Cath Lab), ikazafasha mu kuvura abakoherejwe mu Buhinde.

Ushaka kwiyandikisha ahamagara cyangwa akohereza ubutumwa kuri WhatsApp kuri nimero 0788295286 na 0730006000 cyangwa akajya aho ivuriro rikorera Kimironko mu gikari cya KCB Rwanda.

Umuganga w'inzobere mu kuvura abana indwara z'umutima, Dr. Anuradha Sridhar ari gusuzumira ku ku ivuriro La Confiance riri Kimironko
Inzobere z’abaganga b’Abahinde mu kazi ko gusuzuma no kuvura kanseri n’umutima
Dr. Anuradha Sridhar ahamagarira ababyeyi gusuzumisha abana indwara z'umutima
Umuyobozi mukuru w’Ivuriro La Confiance, Jobin Jerome
Ntahimana Marie-Jeanne wari waje kuvuza umwana

Inkuru bifitanye isano: Abazahajwe n’indwara za kanseri n’umutima bagiye gufashwa n’inzobere z’abahinde


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza