Kiliziya Gatolika yasabwe kugaragaza ingamba ifite zo gufasha Abanyarwanda kuboneza urubyaro

Yanditswe na Evariste Nsengimana
Kuya 20 Gashyantare 2018 saa 04:48
Yasuwe :
1 0

Kiliziya Gatolika mu Rwanda yasabwe kugaragaza uburyo buhamye ifite mu gukangurira Abanyarwanda no kubafasha kubona uburyo bwo kuboneza urubyaro, mu rwego rwo guhangana n’abatwara inda zitateguwe kimwe n’ababyara abo badafitiye ubushobozi bwo kurera no kwitaho.

Muri Kanama 2016, Kiliziya Gatolika mu Rwanda yafashe icyemezo cyo guhagarika gutanga serivisi zo kuboneza urubyaro hifashishijwe uburyo butari ubwa kamere burimo inshinge n’ibinini mu bitaro n’ibigo nderabuzima byayo byose mu gihugu.

Icyo gihe Umushumba wa Diyoseze ya Butare akaba n’Umuvugizi wa Kiliziya Gatolika mu Rwanda, Musenyeri Filipo Rukamba, yabwiye IGIHE ko iki cyemezo cyafashwe nyuma yo kubiganira no kubyemeranya na leta, kuko ku bigo nderabuzima hari aho abaturage bavugaga ko iriya miti ibagiraho izindi ngaruka aho kubafasha.

Kuri uyu wa 20 Gashyantare 2018, ubwo Abasenateri bagize Komisiyo y’Imibereho Myiza y’Abaturage, Uburenganzira bwa Muntu n’Ibibazo by’Abaturage bagiranaga ibiganiro n’itsinda ry’abatekinisiye bashinzwe ibikorwa byo kuboneza urubyaro; bagaragaje ko kuba uburyo bwo kuboneza urubyaro butitabirwa ku kigero gihagije bigira ingaruka zikomeye ku gihugu.

Muri izo ngaruka harimo abana batwara inda zitateganyijwe, ubwiyongere bw’abaturage no kuba abaturage bananirwa kuzuza inshingano zo kurera abana benshi babyaye.

Mu 2016, Minisiteri y’Ubuzima yatangaje abana b’abakobwa bari hagati y’imyaka 16 na 19 barenga 17000 batewe inda zitateguwe ndetse binabagiraho ingaruka zitandukanye zirimo no kuva mu ishuri.

Senateri Ntawukuriryayo Jean Damascène yavuze ko mu bihugu byinshi birimo u Butaliyani, u Bubiligi, u Bwongereza n’ahandi; usanga Kiliziya zaho zitihunza cyangwa ngo zigongane na Leta mu gushyira mu bikorwa gahunda zo kuboneza urubyaro, abaza icyo iyo mu Rwanda ibura.

Ati “Nkunda kubaza ngo Kiliziya y’u Rwanda cyangwa Kiliziya ya Afurika ni kiliziya yihariye cyangwa ni kiliziya wasanga hose? […] Abapantekote baturuka mu bihugu bya Scandinavia, cyane cyane muri Suède, nta mu Bishop waho urarwana na Leta ku bijyanye no kuboneza urubyaro.”

Ntawukuriryayo yakomeje atanga ingero nk’ahakorwa ubukangurambaga ku bijyanye no kuboneza urubyaro, ugasanga umuntu arahagurutse yamagana uburyo bumwe nk’agakingirizo, avuga ko bigayitse bisa nko kwihisha ikibazo kandi kizwi.

Asobanura uruhare n’ingamba za Kiliziya Gatolika muri gahunda zo kuboneza urubyaro, Umuyobozi ushinzwe Serivisi z’Ubuzima za Kiliziya muri Caritas Rwanda, Dr. Prince Bosco Kanani, yasobanuye ko Politiki ya Leta yemera uburyo kamere bwo kuboneza urubyaro na Kiliziya iyemera.

Ati “Ikindi navuga ni uko Kiliziya itarwanya gahunda ya Leta yo kuboneza urubyaro. Ntabwo aribyo ahubwo irayemera, igashaka n’ubufatanye, ikibazo mu Rwanda dufite nayo irakizi [...] yemera no gufatanya na Leta gushyira mu bikorwa gahunda yo kuboneza urubyaro ariko ikagendera ku mahame yayo. Ni ukuzuzanya nk’abafatanyabikorwa.”

Yakomeje asobanura ko mu bigo nderabuzima n’ibitaro bya Kiliziya bisaga 118, iyo higishwa gahunda zo kuboneza urubyaro zose zigishwa.

Ati “Hari ikintu abantu benshi batari bazi, iyo twigisha kuboneza urubyaro muri Kiliziya Gatolika, uburyo bwose burigishwa. Abantu benshi ntibanabizi, bazi gusa ngo tuvuga uburyo bwa kamere [...] icyo tugomba gufasha umuturage, ni ukumusobanurira akihitiramo. Ntabwo tumuhitiramo, nyuma yo kwigishwa neza ubwo buryo bwose, ahitamo ubumunogeye.”

Ngo iyo umuturage amaze guhitamo ubwo ashaka kuko mu mavuriro ya Kiliziya batanga ubwa kamere gusa, yoherezwa ku mavuriro ya Leta atanga ubundi buryo kandi akanakurikiranwa niba yahawe serivisi yifuza.

Usibye uburyo bwa kamere, kuboneza urubyaro bishobora gukorwa hifashishijwe agakingirizo, kwifungisha by’igihe kigufi cyangwa kirekire ku mugore, kwifungisha ku mugabo, ibinini, urushinge n’udupira. Mu buryo kamere harimo kubara amatariki y’uburumbuke bw’umugore, konsa igihe kirekire n’urunigi.

Raporo ya gatanu y’Ikigo cy’Igihugu cy’Ibarurishamibare ku miturire n’ubuzima (RDHS 5) iragaragaza ko ingamba Guverinoma yafashe zo kuboneza urubyaro zagabanyije cyane uburumbuke bw’abagore mu Rwanda.

Muri iyo raporo ikorwa buri myaka itanu, ubushakashatsi bwakorewe ku bagore 13,497, igaragaza ko mu mwaka wa 2005 umugore umwe mu Rwanda yari afite ubushobozi bwo kubyara abana 6.1, mu gihe mu mwaka wa 2014/2015 afite abana 4,2.

Iyi raporo yerekana ko mu 2005 abashakanye bakoreshaga bumwe mu buryo bwo kuboneza urubyaro bugezweho bari 10% n’aho mu 2015 bakaba ari 48%. Ni mu gihe abakoresheje bumwe mu buryo kamere bari 7% mu mwaka wa 2005, ubu bakaba ari 6%.

Senateri Ntawukuriryayo Jean Damascène yavuze ko Kiliziya Gatolika ikwiye kugaragaza aho ihagaze ku bijyanye no kuboneza urubyaro
Umuyobozi ushinzwe Serivisi z’Ubuzima za Kiliziya muri Caritas Rwanda, Dr. Prince Bosco Kanani, yasobanuye ko Politiki ya Leta yemera uburyo kamere bwo kuboneza urubyaro kandi na Kiliziya ibushyigikiye
Perezida wa Komisiyo y’Imibereho Myiza y’abaturage, Uburenganzira bwa muntu n’ibibazo by’abaturage muri Sena y’u Rwanda, Senateri Gallican Niyongana, atanga ibitekerezo
Senateri Laurent Nkusi atanga ibitekerezo ku ngingo yo kuboneza urubyaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza