Minisante yatangije uburyo umuntu azajya yipima Virus itera Sida atagiye kwa muganga

Yanditswe na Evariste Nsengimana
Kuya 1 Ukuboza 2017 saa 02:19
Yasuwe :
1 0

Minisiteri y’Ubuzima yatangije uburyo bwitwa ‘OraQuick HIV Self-Test’, buzajya bufasha umuntu kwipima ubwe akamenya niba yaranduye cyangwa ataranduye Virusi itera Sida.

Ushaka kwipima azajya akoza agakoresho kabugenewe ku ishinya yo hasi inshuro imwe indi ku yo hejuru maze agashyire mu icupa mu gihe kitari munsi y’iminota 20 kandi itarenze 40, kamugaragarize niba afite cyangwa adafite ubwandu bw’agakoko gatera Sida.

Iyo ako gakoresho kamaze mu icupa igihe cyateganyijwe, kagaragaza imirongo ibiri ifite ibara ritukura, umwe uri iruhande rw’inyugutu ya ‘C’ n’indi ya ‘T’. Iyo ari tubiri, uwipimye aba afite ubwandu bwa Virusi itera Sida, kaba kamwe kari ku nyuguti ya C, igisubizo kiba kizima.

Aka gakoresho kamuritswe mu Rwanda kuri uyu wa 1 Ukuboza, Umunsi mpuzamahanga wo kurwanya Sida, kazajya kagurwa amafaranga 5000Frw ahacururizwa imiti hose.

Munyemana Edourd, yabwiye IGIHE ko wasangaga urubyiruko rugira impungenge n’isoni zo kwipimisha bigatuma batabyitabira ariko ko ubu buryo buzongera umubare w’abipimisha.

Minisitiri w’Ubuzima, Dr. Gashumba Diane, yavuze ko ubu buryo bugamije gufasha abantu kumenya uko bahagaze mu buryo buboroheye.

Yagize ati “Turatangiza igikorwa cyo kwipima ubwawe, utarinze kujya ku ivuriro. Ni ubundi buryo leta y’u Rwanda igiye gushyira mu bikorwa kugira ngo twongere umubare w’abantu bazi uko bahagaze kandi iyo umuntu azi uko ahagaze agafata imiti abaho neza.”

Minisante itangaza ko ibarura rya 2015 ryagaragaje ko mu banyarwanda batitabira kwipimisha Virusi itera Sida, urubyiruko ruza ku isonga. Umubare w’ab’igitsina gabo bari bataripimisha kuva babaho bari 24%, ab’igitsina gore ari 16%. Muri abo, urubyiruko ruri hagati y’imyaka 15 na 24 rwihariye ijanisha rya 67,2% na ho 13% by’abanduye Sida ntibari babizi.

OraQuick HIV Self-Test’ yizewe gute ?

Ubushakashatsi bwakorewe ku bantu 400 bazi uko bahagaze , ibyavuyemo byagereranijwe n’ibipimo byavuye muri laboratwari, byerekana ko 76 banduye naho 324 ari bazima; bahawe OraQuick HIV Self-Test nayo yerekana 100% babandi 76 ko banduye; 99,1% ni ukuvuga 321 muri 324 batanduye, agakoresho kemeje ko batanduye nk’uko ibyavuye muri Laboratoire byabivugaga, batatu muri 324 kerekana ko banduye naho 0,3% ntibabona ibisubizo.

Amabwiriza yihariye mu gukoresha OraQuick HIV Self-Test’

Umuntu asabwa kuba afite isaha ibara neza iminota; kutagira icyo arya cyangwa anywa mu gihe cy’iminota nibura 15 mbere y’uko yipima; agomba no kudakora isuku mu kanwa nibura mbere y’iminota 30 y’uko yipima.

Ufata imiti igabanya ubukana bwa Virus itera Sida agakoresha OraQuick HIV Self-Test, ishobora kumuha ibisubizo bitaribyo.

Uwipima ashobora kubona ibisubizo bidasobanutse, cyane cyane iyo kitamweretse umurongo iruhande rw’inyuguti ya C, cyangwa ahagenewe gusomerwa igisubizo hose hajemo ibara ritukura, bivuga ko kitanoze icyo gihe ibipimo bisubirwamo.

Uwipimye asabwa guhita agana ikigo nderabuzima kimwegereye cyangwa ahandi bayipimira kugira ngo bamuhe ibisubizo by’ukuri.

Urubyiruko rwerekana uko OraQuick HIV Self-Test’ ikoreshwa
Minisitiri w'Ubuzima Dr. Diane Gashumba asobanurirwa imikorere y'ubwo buryo
Minisitiri w'ubuzima Dr. Diane Gashumba

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza