Kwamamaza

Minisitiri Gashumba asanga imyumvire yo hasi iri mu bituma imirire mibi idacika

Yanditswe kuya 31-10-2016 saa 15:29' na Mukaneza M.Ange


Minisitiri w’Ubuzima, Dr Gashumba Diane yatangaje ko kuba hari uduce tumwe na tumwe tugaragaramo imirire mibi no kugwingira kw’abana bari munsi y’imyaka itanu bidaturuka cyane ku kubura kw’ibiribwa ahubwo ahanini usanga ari imyumvire y’ababyeyi ikiri hasi.

Ibi yabitangaje kuri uyu wa 31 Ukwakira 2016, ubwo hatangizwaga igikorwa cyo kwereka abanyamahanga baturutse mu bihugu umunani byo muri Afurika, n’ibindi byo ku yindi migabane birimo u Butaliyani, u Bwongereza na Pakistan, bimwe mu bikorwa u Rwanda rwashyizemo imbaraga mu rwego rwo kurandura ikibazo cy’imirire mibi.

Iki gikorwa cyiswe Learning Route Exchange Program cyateguwe ku bufatanye n’ihuriro ry’Imiryango igamije kurwanya imirire mibi SUN Alliance Rwanda ku bufatanye na Sosiyete sivile.

Minisitiri Gashumba yavuze ko hari impamvu nyinshi zikomeje gutuma imibare y’abana bagwingiye ikiri hejuru zirimo imyumvire y’ababyeyi ikiri hasi n’isuku nke.

Ati” Usanga abaturage ntabwo bafite imyumvire ihagije mu byo bagomba kugaburira abana uko bingana, ibigomba kuba bikubiyemo. Hari ikibazo na none cy’isuku igomba kwitabwaho kuko n’iyo wagaburira umwana ibiryo bimeze bite, byinshi, bihagije ariko hatarimo isuku, ni hahandi ntacyo bimaze kuko umwana azokamwa n’impiswi hanyuma ibyo yariye ntabwo bizamuyoboka.”

Yakomeje avuga ko bari gufatanya n’ubuyobozi bw’inzego z’ibanze kugira ngo bashyire imbaraga mu kwita ku baturage no kubegera babafasha guhindura imyumvire kugira ngo imirire myiza igerweho nk’umusingi w’iterambere rirambye.

Umuyobozi wa SUN Alliance Rwanda, Butera John R. Mugabe, na we yavuze ko abana bagwingiye atari abafite inzara kuko ngo hari n’abafite ibiribwa ariko ugasanga abana babo batarakuze neza.

Ati” Nubwo harimo n’ikibazo cy’ubukene, ariko muzi ko hafi 80% by’abanyarwanda bihagije mu biribwa, 20% ni bo bafite cya kibazo; ariko ugasanga ikibazo cyo kugwingira ntigihwana na 20% ya ba bandi bakennye. Ugasanga rero ari ikibazo kirenze kuba ubukene ahubwo gifata no ku myumvire y’abaturage.”

Yakomeje avuga ko nka SUN Alliance ibarizwa mu miryango 79 yihaye intego yo kurwanya ikibazo cy’imirire mibi, aho bari gukora ibishoboka byose bafatanyije na leta kugira ngo kiriya kibazo kiranduke burundu ku buryo mu 2030, umubare w’abana bagwingiye uzaba wavuye kuri 38% ukagera nibura kuri 20%.

Butera kandi yavuze ko mu gihe kijya kungana n’icyumweru, amatsinda yaturutse muri Ethiopia, Kenya, Malawi, Sierra Leone, Nigeria, Tanzania , Uganda na Zimbabwe bazasura uduce twa Nyanza na Gisagara aho bazarebera hamwe imikorere y’amakusanyirizo y’amata, nk’uburyo bwo kurandura imirire mibi no kwiteza imbere.

Intumwa y’Umuryango SUN Movement uharanira kurwanya imirire mibi, Alam Khatt, yavuze ko intego bihaye ari uko umubare w’abana bafite ikibazo cyo kugwingira uva kuri miliyoni 159 ukagera kuri miliyoni 65 mu 2025, binyuze mu gushyira imbaraga mu bikorerwa umwana mu minsi 1000 ya mbere umwana akivuka.

Imibare y’Ikigo cy’Igihugu cy’Ibarurishamibare (NISR), igaragaza ko abana 38% bafite munsi y’imyaka itanu bagwingiye, 9% bafite ibiro bidahwanye n’imyaka yabo, mu gihe abandi 3% bafite ikibazo cy’inzara.

Intara iza ku mwanya wa mbere mu kugira abana bagwingiye n’iy’u Burengerazuba ifite 45%, Amajyepfo 41%, Amajyaruguru 39%, u Burasirazuba 35% naho Umujyi wa Kigali ukagira 23%.

Minisitiri Dr Gashumba avuga ko imyumvire y’ababyeyi ikiri hasi ariyo ituma abana babo bagwingira
Butera John R. Mugabe, Umuyobozi Mukuru wa SUN Alliance
Intumwa y’Umuryango SUN Movement uharanira kurwanya imirire mibi, Alam Khatt
Umuyobozi wa SFH, Manasseh Wandera Gihana

Amafoto:Luqman Mahoro
[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved