Madagascar imaze amezi 10 ikoresha Drones mu butabazi bw’ibanze

Yanditswe na Ishimwe Israel
Kuya 21 Ugushyingo 2016 saa 11:04
Yasuwe : XX
91 51

Ibiro by’Igihugu bishinzwe kubungabunga Ibiza muri Madagascar, byaguze indege eshatu nto zitagira abapilote (Drones) zifashishwa cyane mu gushaka amakuru y’ibanze kandi yihuse ndetse no gutanga ubutabazi ahabaye ibiza.

Izi ndege zaguzwe amayero 27.000, ku nkunga y’Ishami ry’Umuryango w’Abibumbye ryita ku bana (UNICEF).

RFI dukesha iyi nkuru itangaza ko intego y’izi Drones zimaze amezi asaga icumi zikora ari ugufasha kugera mu duce twitaruye, ngo hatabarwe ubuzima bw’abantu, ndetse no gukora ubugenzuzi bwihuse nyuma y’ibiza nk’imyuzure n’inkubi z’umuyaga ikunze kwibasira icyo kirwa.

Izi ndege zifite camera zigezweho zizifasha gukusanya amakuru ndetse n’itsinda ry’inzobere risesengura amashusho yafashwe zatangiye kugeragezwa muri Mutarama uyu mwaka, aho zimaze koherezwa muri ibyo bikorwa inshuro zisaga 20.

Umunyamabanga Nshingwabikorwa w’Ikigo gishinzwe gukumira Ibiza muri Madagascar, Thierry Venty, atangaza ko zibafasha kugera ku byo batashoboraga mbere y’uko batangira kuzikoresha.

Yagize ati “Zidufasha kugera mu buryo bwihuse ahabereye ibiza, kandi zikatuzanira amakuru nyayo mu gihe gito gishoboka. Ikindi zizarushaho kuba ingirakamaro nko mu gihe cy’inkubi z’umuyaga, imyuzure, gusenyuka k’urugomero cyangwa igihe umuhanda wacitse n’ibindi.”

Ubusanzwe ibikorwa by’ubutabazi muri Madagascar bikunze kugorana ndetse rimwe na rimwe bikaba birimo n’ingaruka, kubera kutagira imihanda ihagije, n’ihari ikaba ikunze kwangirika kenshi, ibyo bigatuma hari uduce bigorana kugeramo ndetse n’aho badashobora kugera mu buryo ubwo ari bwo bwose, aho hakaba ari ho Drones zije kuba igisubizo.

Abahanga mu by’ubutabazi bwihuse bavuga ko Drones ari ingirakamaro mu bihugu bikiri mu nzira y’amajyambere, kuko zihendutse ugereranyije na Kajugujugu y’agaciro k’amayero kuva kuri 800 kugeza ku 1500 ku isaha, mu gihe Drones yo isaba gucomeka batiri gusa.

Izo Drones zo muri Madagascar bazohereza ziriho akuma gafata amashusho zishobora gukora kilometero eshatu, zifashishije batiri mu gihe igihugu kitarabona ubushobozi bwa moteri zifite ubushobozi bwisumbuyeho.

Mu kwezi gushize u Rwanda narwo rwatangije ku mugaragaro serivisi y’ibikorwa byo kugeza amaraso mu bitaro hifashishijwe Drones.

Izi Drones zitezweho kongera imikorere myiza ya serivisi z’ubuvuzi mu Rwanda zatashywe na Perezida Kagame tariki ya 14 Ukwakira 2016 mu Karere ka Muhanga, zitwara amaraso apima ikiro n’igice.

Drone ya UNICEF mu bikorwa by'ubutabazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE