Rubavu: Bafunguriwe ivuriro ry’impyiko, basaba kugobokwa na Mituweli

Yanditswe na Uwishyaka Jean Louis
Kuya 16 Ukwakira 2016 saa 09:25
Yasuwe : XX
0

Abarwayi b’impyiko bo mu Karere ka Rubavu no muri Repubulika Iharanira Demokarasi ya Congo, bariruhutsa nyuma yo gufungurirwa ikigo gisuzuma kikanavura impyiko mu karere ka Rubavu,Gisenyi Hospital Dialysis Center, ariko bagasaba kwivuza bakoresheje ubwisungane mu kwivuza bitewe n’uko ubundi buryo buhenda cyane.

Ubusanzwe ibitaro byavuraga iyi ndwara ni ibyitiriwe Umwami Faisal, CHUK na CHUB, ku buryo abarwaye iyi ndwara baturuka mu ntara zitandukanye bajya kwivuriza i Kigali, ibintu bavuga ko bibagora bitewe n’amafaranga y’amacumbi bishyura ndetse n’ay’urugendo.

Christine Dushimirimana, umwe mu barwaye impyiko yagize ati “ Badutuye umutwaro uremereye,ntabwo twari tworohewe no gukora ingendo za kure twiruka ku buvuzi buboneka hake, ariko badufashe tujye twivuriza ku bwisungane bwa Mituelle de santé kuko birahenda cyane. Umuti umwe ni ibihumbi 80 kandi ukawufata gatatu mu cyumweru, urumva ko bihenze badufashe rwose.”

Umuyobozi ushinzwe ubuvuzi muri Africa Healthcare Network ari nabo ba nyiri iri vuriro, Dr Ntarindwa Joseph, avuga ko abarwayi b’impyiko bahura n’ibibazo bitandukanye, ariko abizeza ko biri mu nzira zo gukemuka kuko bari mu biganiro na RSSB.

Aragira ati “Tuvuye kure, ariko turacyafite urundi rugendo, iyi serivisi aho yatangiriye muri King Faisal mu 2010, hari abarwayi najyaga mbona bavuye mu ntara ahantu kure nka za Rusizi, Rubavu bagakoresha amafaranga menshi, turi kugenda tubegera, kandi turi mu biganiro na RSSB ku buryo mu minsi iri mbere bazajya bivuriza ku bwisungane mu kwivuza, ariko nabagira inama yo kwirinda kuko ari wo muti ukomeye wabasha kugabanya impyiko.”

Ubuyobozi bwa Africa Healthcare Network buvuga ko uretse abaturage bo mu Karere ka Rubavu no mu nkengero zaho iki kigo kizafasha, ngo n’abatuye muri Congo bizabafasha kuko iwabo nta bitaro bagira bivura impyiko, ku buryo ngo abazirwaye byabasabaga kujya kwivuriza i Kigali.

Muhimuzi Primo, umwe mu baturage bo mu mujyi wa Goma muri Congo, agira ati ”Hashize iminsi mfite uburwayi bw’impyiko ku buryo ubu byansabaga kujya kwivuriza i Kigali mu bitaro byitiriwe Umwami Faisal, ariko kimwe na bagenzi banjye tugize amahirwe kuko tuzajya twivuriza i Gisenyi hafi yacu.”

Umunyamabanga wa Leta ushinzwe ubuvuzi n’ubuzima rusange muri Minisiteri y’Ubuzima, Dr Patrick Ndimubanzi, ashima ubufatanye Africa Healthcare Network ifitanye na Leta y’u Rwanda, akizeza abanyarwanda ko batangiye kugirana ibiganiro na RSSB kugira ngo barebe ko bazajya bivuriza kuri Mituweli, anabasaba kudapfusha ubusa amahirwe bagize yo kubona iri vuriro.

Aragira Ati “Uko ibiciro byari bimeze ntabwo ari ko bikimeze, uko bazajya bagenda bakura ni nako bazajya bagabanya ibiciro, ubu twatangiye kuvugana na bo tureba uko habaho ubufatanye abaturage bakajya bifuza hakoreshejwe mituweli."

Dr Ndimubanzi akomeza agira inama abanyarwanda kwirinda izi ndwara kuko kuzivuza bihenze, abibutsa ko bakwiye gukangukira gukora siporo, birinda kurya umunyu mwinshi,kwirinda amasukari, ndetse bakirinda kwicara igihe kirekire.

Gisenyi Hospital Dialysis Center, ibaye ikigo cya kane kivura impyiko gifunguwe mu Rwanda, byitezwe ko abazakigana bazajya baba boherejwe n’ibitaro bya Gisenyi.

Iki Kigo kibaye icya kane kivura impyiko gifunguwe mu Rwanda
Iki kigo ngo kije korohereza abarwayi baturukaga i Burengerazuba bajya kwivuriza impyiko i Kigali
Dushimirimana Christine avuga ko bashimishijwe n'iki kigo babegereje kuko biborohereje urugendo bakoraga bajya kwivuriza i Kigali
Dr Ndimubanzi avuga ko hari kwigwa uburyo abarwaye impyiko bajya bavurwa hifashishijwe Mituweli

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza