Rubavu izwiho kugira ibiribwa byinshi itunze abana bugarijwe n’imirire mibi

Yanditswe na Mukwaya olivier
Kuya 19 Kanama 2017 saa 10:59
Yasuwe :
0 0

Akarere ka Rubavu kari mu tugize Intara y’Iburengerazuba twugarijwe n’imirire mibi mu bana mu gihe kazwiho kuba ikigega cy’ibiribwa by’amoko yose.

Ikibazo cy’imirire mibi itera abana kugwingira muri aka karere ahanini giterwa n’imvumvire ikiri hasi mu babyeyi ku bijyanye no kugaburira abana babo indyo yuzuye.

Ibi byagarutsweho ku wa Kane w’iki cyumweru mu karere ka Rubavu mu biganiro byahuje abafite aho bahurira no kurwanya imirire mibi mu karere ka Rubavu n’abakozi bo mu muryango SUN Alliance uharanira kurwanya imirire mibi.

Ubushakasatsi buherutse gukorwa mu mwaka wa 2015 bwerekanye ko akarere ka Rubavu gafite abana 46,3% bagwingiye.

Bamwe mu bari bitabiriye ibi biganiro bavuzeko bagiye gushyira imbaraga mu kurwanya ikibazo cy’imirire mibi bibanda ku bukangurambaga.

Usabimana Hawa, umukozi wa Handicap International avuga ko ubu bagiye gukaza ubukangurambaga ku bagore batwite, babigisha gutegura indyo yuzuye no kwita ku bana mu gihe cy’iminsi 1000.

Butera John R Mugabe, Umuyobozi Mukuru Wa Sun Alliance avuga ko uturere two mu Ntara y’Iburengerazuba twugarijwe n’icyorezo cy’imirire mibi no kugwingira kw’abana tukaba tuza ku isonga mu rwego rw’igihugu.’’

Yagize ati “Iyi ntara y’Iburengerazuba ifite ikibazo gikomeye cyane kubera ko uturere twayo tuza imbere mu rwego rw’igihugu by’umwihariko akarere ka Rubavu kari ku mwanya wa kane ku Rwego rw’igihugu’’

Umuyobozi w’akarere wungirije ushinzwe imibereho myiza y’abaturage, Uwampayizina Marie Grace avuga ko bidakwiriye ku karere ka Rubavu kazwi nk’ikigega cy’igihugu yizeza ko ku bufatanye n’abafatanyabikorwa bagiye kongera ubukangurambaga bwo kurwanya imirire mibi.

Yagize ati “Akarere ka Rubavu ni ikigega cy’igihugu, dufite ibiribwa byose ariko biragaragara ko hakiri imirire mibi no kugwingira ku bana. Nk’ubuyobozi tubona bidakwiriye kuko biterwa n’imyumvire iri hasi. Ku bufatanye n’abafatanyabikorwa tugiye kongera ubukangurambaga duhereye ku mirenge ya Rubavu,Nyamyumba na Bugeshi kuko ariyo igaragaramo ibibazo by’imirire mibi.’’

Twabibutsa ko mu bushakashatsi buheruka mu mwaka wa 2015 uturere tw’Intara y’Iburengerazuba twaje ku isonga mu kugira umubare munini w’abana bagwingira. Nyabihu yaje ku mwanya wa mbere na 59.0%, Ngororero iba iya kabiri na 55.5%, Karongi 49.1% na ho Rubavu iza ku mwanya wa Kane na 46.3%.

Bamwe mu bari bitabiriye ibiganiro
IKIbazo cy'imirire mibi gikomeje kugaragara mu Karere ka Rubavu mu gihe bizwi ko gafite ibiribwa
Uwamapayizina M. Grace yavuze ko bagiye gukaza ubukangurambaga bwo kurwanya imirire mibi mu Karere ka Rubavu
Butera John Mugabe, Umuyobozi Mukuru wa Sun Alliance yavuze ko kugwingira kw'abana bigira ingaruka zikomeye ku buzima bwabo
Icyegeranyo ku mirire n'ibyo cyagaragaje ku turere tw'Intara y'Iburengerazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza