Ruhango: Banyuzwe n’uburyo bwo kwivuza bifashishije telefoni

Yanditswe na Uwishyaka Jean Louis
Kuya 17 Ugushyingo 2016 saa 11:54
Yasuwe :
0 0

Abaturage bo mu Karere ka Ruhango basobanuriwe uburyo bugezweho bw’ikoranabuhanga bashobora kwifashisha bagahabwa ubuvuzi n’inama zijyanye n’ubuzima bakoresheje telefoni ngendanwa.

Iri koranabuhanga ryazanwe mu Rwanda na Kompanyi yitwa Bably Health, aho umuturage ashobora gukoresha telefoni ye akavugana na muganga akamubwira ikibazo afite nawe akamuvura cyangwa akamuha inama zijyanye n’ubuzima bwe.

Mu mpera z’icyumweru gishize, ubwo bamwe mu batuye aka karere basobanurirwaga iyi gahunda, babwiwe ko igamije kuborohereza kubona serivise z’ubuzima batiriwe bajya gutonda umurongo kwa muganga.

Umukozi ushinzwe ubucuruzi muri Bably Health, Pascal Murasira, avuga ko kugira ngo umuturage abone iyi servise bisaba ko yiyandikisha agatanga n’umwirondoro we.

Ati “Bisaba kuba ufite telefoni iyo ariyo yose, uburyo winjiramo ukanda *811#, hanyuma ugakurikiza amabwiriza, icyo gihe uvugana na muganga akakubaza ibibazo bitandukanye, akagusuzuma bijyanye n’uko umerewe, hanyuma ashobora kukwandikira imiti, akakoherereza ubutumwa bugufi ukajya kuyigura ku mafarumasi dukorana. Ikindi ni uko ushobora guhamagara kuri 8111 ugahabwa ibisobanuro birambuye ku buntu.”

Murasira akomeza avuga ko iyo munganga avuganye n’umurwayi akumva uburwayi bwe bukomeye, amuha gahunda n’umunsi azajya ku ivuriro akabonana n’umuganga w’inzobere.

Ati “Iyo muganga yumvise uwo murwayi ashobora kuba hari ibizamini bamufata, amuha gahunda akamubwira ati ‘umunsi uyu n’uyu, ku isaha iyi n’iyi uzaze kwa muganga tugufate ibizamini tukuvure’, ubwo urumva ko byorohereza umurwayi kuko atirirwa ajya gutonda umurongo kwa muganga.”

Umuyobozi wungirije ushinzwe imibereho myiza y’abaturage mu Karere ka Ruhango, Annonciata Kambayire, asaba abaturage kwitabira ubu buryo bwo kwivuza bakoreshe ikoranabuhanga, by’umwihariko yibutsa urubyiruko ko bizagira uruhare mu kubaha inyigisho ku buzima bw’imyororokere.

Kambayire ati “Muzi neza ko dukunze kugira ibibazo by’urubyiruko rudasobanukiwe neza ibijyanye n’ubuzima bw’imyororokere, hari n’ibyo ababyeyi batinya kubasobanurira, urumva rero binyuze muri ubu buryo bazajya bavugana na muganga bisanzuye bamubaze ibyo bifuza kumenya, ni ibintu byiza cyane bije bikenewe.”

Bamwe mu batuye mu Karere ka Ruhango bemeza ko igihe bazaba batangiye kugezwaho ubu buvuzi bizaborohereza kubona serivise z’ubuzima mu buryo bwihuse, bikagabanya imirongo bajyaga batonda ku bitaro no ku bigo nderabuzima bagiye kwivuza.

Umukecuru witwa Philomène Nyiramana yagize ati “Uko babitubwiye, ibi birihutisha, kuko kwa muganga twajyaga twicara mu ntebe tugategereza hakaba nubwo umuntu atashye batamuvuye.”

Basaba ko serivise nk’izi zikoresha ikoranabuhanga zashyirwamo ingufu, kuko bizabagirira akamaro mu gukoresha igihe neza. Uretse ubuzima bw’imyororokere, abazajya bakoresha iyi serivise bazasobanukirwa n’ibindi bijyanye n’imirire myiza, kwirinda indwara zidakira n’ibindi.

Mu rwego rwo kugeza iyi serivise ku bantu benshi, Bably Health ifite abakozi (agents) hirya no hino mu turere bafasha abaturage kwiyandikisha no gusobanukirwa neza uko serivisi zayo zikora.

Bably Health yatangiriye mu Bwongereza, ikaba yarageze mu Rwanda mu mwaka ushize wa 2015. Imaze kugera mu turere twose tw’u Rwanda.

Nk’uko byasobanuwe kwiyandikisha mu bazakoresha iyi serivise ni ubuntu ndetse no kuvugana na muganga na byo nta mafaranga bitwara, kandi uzatangira gukoresha iyi serivise azajya ahabwa ubuvuzi ku buntu mu gihe cy’amezi abiri.

Abanya-Ruhango basobanuriwe uko bakwivuza bakoresheje telefoni zabo ngendanwa
Kuri Telefoni ushobora kuvugana na muganga akagusuzuma cyangwa akaguha inama zijyanye n'ubuzima bwawe ku buntu
Bamwe mu baturage bafashijwe kwiyandikisha muri ubwo buryo bw'ikoranabuhanga
Abakozi ba Bably Health bashyizwe hirya no hino mu turere kugira ngo bafashe abaturage kumenya serivise batanga
Abaturage batuye aka karere bishimiye ubu buryo bavuga ko bugiye kubakiza imirongo birirwaga batonze ku mavuriro
Visi Meya Kambayire akangurira urubyiruko kwitabira iyi gahunda kuko bazajya bahabwa inama ku buzima bw'imyororokere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244