Iby’ingenzi ku kibazo cy’intanga z’ibihuhwe kibuza bamwe kwitwa ababyeyi

Yanditswe na Tombola Felicie
Kuya 17 Gashyantare 2017 saa 02:45
Yasuwe : XX
1

Impamvu zo kubura urubyaro ni nyinshi bitewe n’ubuzima buri wese aba yaranyuzemo cyangwa se ubumuga bushobora kumugwirira;twahisemo gukusanya amakuru ku ndwara yitwa ‘Tératospermie’ yo kugira intanga z’ibihuwe ku bagabo.

Mu mvugo ya siyansi ‘tératospermie’ ni ikibazo kiba ku bagabo cyo kugira intanga z’ibihuwe zishobora kuba ari zose cyangwa se zimwe muri zo ari zo z’ibihuhwe (zidafite ireme).

Umuryango mpuzamahanga wita ku buzima OMS, muri 2009 watangaje ko batangira kuvuga ko umugabo afite intanga z’ibihuhwe ari uko 4% by’intanga ze ari zo nzima gusa mu gihe 96% zisigaye zigaragaza ibibazo mu mitirere yazo.

Nk’uko imbuga za internet zitandukanye zirimo nk’urwitwa guerirnotrefamille.com, zibigaragaza, ikibazo cy’intanga z’ibihuhwe kirakomeye kuko bamwe kibabuza ibyishimo byo kuba bakwitwa ababyeyi igihe bativuje hakiri kare.

Umenya ute ko ufite intanga z’ibihuhwe?

Iyo umugabo agiye kwa muganga akagaragaza ko afite ikibazo cyo kutororoka kandi atari ikiremba, abasha gukora imibonano mpuzabitsina ndetse akanabasha gusohora (ejaculation) bamukorera ibizamini.

Abaganga mu bijyanye n’imyororokere bamufata ikizamini kitwa ‘spermogramme’ cyo kureba ingano y’amasohoro abasha gusohora n’ubwiza bwayo.

Umuganga areba umubare w’intanga ziri mu masohoro, uko intanga zimeze n’ukwihuta kwazo.

Hari ubwo asanga umutwe w’intanga, igihimba cyangwa umurizo bifite ikibazo cyo kuba binini cyane, kuba dutoya cyane cyangwa se bikubye kabiri (buri gace karimo uduce tubiri).

Ni iki gituma intanga ziba ibihuhwe?

Nubwo bigoye gusobanura impamvu yo kuba umuntu yasanga afite intanga z’ibihuhwe abaganga bavuga ko bituruka mu kuba hariho imikorere mibi mu ikorwa ry’intanga.

Iyo mikorere mibi ishobora guturuka ku ndwara zamaze igihe kirekire , ibibazo by’imisemburo, bishobora kandi guturuka ku ngaruka z’imiti umuntu aba yaranyweye ikangiza utunyangingo dufasha mu gukora intanga.

Bishobora guturuka kuri diyabete, umuriro ukabije , ingaruka z’ibisindisha bikabije, ihungabana ry’ubugabo bw’epfo n’ibindi.

Nubwo hari ubwo intanga z’ibihuhwe zishobora gutuma umugore adasama burundu, hari nubwo bibaho umugore agasama ariko inda zikajya zivamo.

Igihe umugore akunda gukuramo inda abaganga baba bagomba kureba niba koko ikibazo kitari ku mugabo we.

Uko ‘teratospermie’ ivurwa

Abaganga bavuga ko ‘teratospermie’ ivurwa bitewe n’ikibazo cyayiteye igihe ari ikibasha kuvurwa.

Urugero, bashobora gutanga imiti cyangwa bakakubwira amafunguro wafata igihe basanze ari ikibazo cy’imisemburo.

Iyo bidashoboka ko umugabo abasha gutera inda, abaganga bafata intanga nzima mu zo umugabo afite maze bakazitera umugore akabasha kubyara.

Inama batanga ni uko buri wese aba akwiye kujya kwa muganga hakiri kare kugira ngo indwara yose ikurikiranwe mu maguru mashya.

Kuri iyi foto intanga ya mbere ni yo nzima mu gihe izindi zose zifite ibibazo(Ifoto yakuwe kuri internet)
Ibibazo by'intanga z'ibihuhwe biterwa n'impamvu nyinshi zirimo izivukanwa cyangwa izifata umuntu amaze gukura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza