Tuzaba twagabanyije kugwingira kugeza ku kigero cya 19% mu 2024- Dr Asiimwe

Yanditswe na Emma-Marie Umurerwa
Kuya 31 Gicurasi 2019 saa 02:31
Yasuwe :
0 0

Imibare ya 2015 igaragaza ko 38% by’abana bari munsi y’imyaka itanu mu Rwanda bagwingiye, abana 9% batari bafite ibiro bijyanye n’imyaka yabo, 3% bafite ikibazo cy’inzara mu gihe 78% by’abagore bonsaga abana bari hagati y’amezi 12 na 23 batafataga indyo yuzuye.

Ni ikibazo gikomeye ku gihugu kuko imibare y’abahanga igaragaza ko kugwingira k’umwana bigira ingaruka ku musaruro we amaze gukura kuko ugabanukaho 10%, bikanagabanya 3% ku musaruro mbumbe w’igihugu gifite abantu bagwingiye bakiri abana.

Abahanga basobanura ko kugwingira ingaruka z’imirire mibi zituma umwana adakura mu gihagararo no mu mitekerereze. Bigaragara iyo bamupimye bagasanga uburebure bwe ntibuhuye n’imyaka ye.

Kugwingira kandi ntibiba gusa ku mwana wavutse kuko n’ukiri mu nda ya nyina agwingira. Ni ikibazo gishobora gukosorwa umwana akiri muto ariko yarenza imyaka ibiri bikaba ari twibanire.

Guverinoma y’u Rwanda imaze kubona ko kugwingira ari ikibazo cyugarije igihugu, ntiyatereye agati mu ryinyo kuko uretse gahunda zo gufasha abaturage guteka indyo yuzuye yanashyizeho gahunda y’Igihugu mbonezamikurire y’abana bato.

Iyi gahunda izwi nka NECDP (National Early Childhood Development Program), igamije gukemura ikibazo cy’imirire mibi no kugwingira, hitawe by’umwihariko ku babyeyi batwite, abonsa n’abana bakiri bato kugeza ku myaka ibiri.

Iyi gahunda imaze kwerekana ko ikibazo cyakemuka. Urugero ni aho ibarura ryo mu 2017 ryerekanye ko mu Karere ka Rwamagana, abana 644 bari munsi y’imyaka itandatu bari bafite ikibazo cy’imirire mibi, ubu hakaba hasigaye abana 44, ahanini babikesha ingo mbonezamikurire.

Muri aka karere kandi mu tugari 84 tukagize, muri buri kagari hari urugo mbonezamikurire y’abana bato, mu karere kose hakaba hari izigera ku 156, harimo eshatu ziri ku rwego rw’icyitegererezo.

Umuhuzabikorwa wa Porogaramu y’Igihugu Mbonezamikurire y’abana bato, Dr Anita Asiimwe, ati “Umwihariko wa Rwamagana, ni uko bamenya ngo umwana ufite ikibazo ni uwuhe, ikibazo afite giteye gite hanyuma abashinzwe imbonezamikurire, ubuyobozi n’ababyeyi bagafatanya kugikemura. Ikibura kugira ngo no mu tundi turere bimere bityo, ni uko buri wese ikibazo akigira icye.”

Gukorera hamwe n’urugo mbonezamikurire byatubereye intsinzi

Umuyobozi w’Akarere ka Rwamagana, Mbonyumuvunyi Radjab, yabwiye IGIHE ko kuba bageze kuri uru rwego mu guhangana n’imirire mibi itera igwingira ry’abana, babikesha gukorera hamwe.

Avuga ko gahunda y’ingo mbonezamikurire y’abana bato zahinduye ubuzima bwa benshi.

Kugeza ubu, mu Rwanda haraburirwa Ingo mbonezamikurire zisaga 4200, abafashamyumvire bakora muri ibi bigo, bita ku bana bafite ibibazo by’imirire mibi.
Umwana ukirugeramo yitabwaho n’ababishinzwe bitewe n’icyiciro arimo ku bijyanye n’isuku, gukina, kwigishwa amasomo y’ibanze, guhabwa ifunguro rya mu gitondo n’irya saa sita bikungahaye ku ntungamubiri, kumuryamishwa akaruhuka n’ibindi.

Ababyeyi babo nabo bakagirwa inama y’uburyo bakwita ku mirire yabo, bagirwa inama kandi yo kwita by’umwihariko ku buzima bw’umwana mu gihe cy’iminsi 1000 uhereye igihe umugore yasamiye.

Umwana yamara kuvuka, umugabo ndetse n’umugore bagafatanya kwita ku mirire ye, isuku n’isukura cyane cyane igihe batangiye kumuha imfashabere kuko byagaragaye ko abana batangiye guhabwa imfashabere hagati y’amezi atandatu n’imyaka ibiri, ari bwo bagwingira cyane kubera ko bamwe mu babyeyi baba batazi uko babategurira indyo yuzuye.

Ikindi kandi umugabo ndetse n’umugore bakwiye kugira uruhare mu gukangura ubwonko bw’umwana kuva umugore agisama, bakamukinisha kuko 80% by’ubwonko bw’umwana bukura mbere y’uko agira imyaka itandatu.

Uwamurera Veneranda wo mu Murenge wa Munyiginya, mu Karere ka Rwamagana, ari mu cyiciro cya mbere cy’ubudehe. Mbere y’umwaka wa 2016, kubona ibimutunga n’abana be babiri ntibyari bimworoheye, byanatumye umwe mu bana be agira ikibazo cy’imirire mibi, undi w’imyaka 13 ntiyigeze amushyira mu ishuri kubera amikoro.

Aho Ikigo Mbonezamikurire cya Munyiginya gitangiriye, abifashijwemo n’ubuyobozi hamwe n’abajyanama b’ubuzima, yajyanyeyo umwana we, impinduka zitangira ubwo mu muryango we.

Ati “Umwana wanjye w’umuhungu yari afite ikibazo cy’imirire, baramufashe bamwitaho, ikibazo kirakemuka burundu yamaze imyaka itatu hano bamwitaho. Aho atangiriye ishuri niwe uba uwa mbere, akagira amanota arenga 80%”.

Akomeza agira ati “Twajyaga twirirwa ubusa tukanaburara, cyangwa se tukarya rimwe ku munsi, none nanjye bampaye akazi ko gukora isuku nta kibazo cy’imibereho tugifite.”

Dr Anita Asiimwe, yavuze ko bihaye intego y’uko ikibazo cyo kugwingira n’imirire mibi bigomba kuba umugani mu Rwanda mu minsi iri imbere.

Ati “Twihaye intego y’uko tuzaba twagabanyije kugwingira kugeza ku kigero cya 19% mu 2024. Bivuze ko buri mwaka tuzajya tugabanyaho 2.2%. Iyo ni imibare iri hejuru cyane mu bijyanye no kugabanya kugwingira.”

Avuga ko ikibazo cy’imirire mibi ari nacyo nyirabayazana yo kugwingira, bishoboka ko byaba amateka buri muturarwanda n’inzego zose babigizemo uruhare.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza