U Rwanda ku mwanya wa 41 ku Isi mu bihugu bigerwaho n’ingaruka nke z’imirire

Yanditswe na Evariste Nsengimana
Kuya 25 Mata 2019 saa 02:15
Yasuwe :
0 0

Mu bihugu bitandukanye ku Isi, bimaze kugaragara ko imirire itaboneye ihitana abantu benshi kurusha n’impamvu zirimo kunywa itabi cyangwa umuvuduko w’amaraso.

Iyi mirire igarukwaho si ukuba abantu bishwe n’inzara kuko babuze ibyo barya, ahubwo ni igihe bibonetse ariko bakabifata mu buryo butaboneye, ugasanga nk’umuntu arya inyama, umunyu mwinshi cyangwa isukari, usanga bihitana umuntu umwe muri batanu bapfa ku Isi nk’uko ubushakashatsi bwabyerekanye.

Raporo yatangajwe mu kinyamakuru The Lancet ku wa 3 Mata 2019 ireba ku bihugu 195 ku Isi, igaragaza ko imirire itaboneye mu 2017 yahitanye abantu miliyoni 10.9 cyangwa 22% by’impfu zose zabayeho muri uwo mwaka mu bantu bakuru, ndetse miliyoni 255 zihura n’izindi ndwara. Iziza imbere ni indwara z’umutima na diabete.

Ugereranyije n’izindi mpamvu zica abantu benshi, itabi muri uwo mwaka ryateye impfu miliyoni 8.0 mu gihe umuvuduko w’amaraso wahitanye miliyoni 10.4.

Imibare igaragaza ko nko mu Rwanda, mu 1990 abahuye n’ingaruka zishingiye kuri iyi mirire bari 7575.7 naho mu 2017 baba 3420.8, mu gihe ku bapfuye, mu 1990 bari 346.5 maze mu 2017 bakaba 167.2. Mu bapfuye mu 2017, abagera ku 145.1 byatewe n’indwara z’umutima naho 12.1 ni diabete.

Umwarimu muri Kaminuza yigisha iby’ubuzima muri Kaminuza ya Washington akaba n’umwe mu bayoboye ubu bushakashatsi, Ashkan Afshin, yavuze ko ikibazo ari uko abantu bafata amafunguro ugasanga haburamo ibiribwa bibafitiye akamaro no kurya umunyu mwinshi.

Mu biza imbere mu gutera zirimo indwara zitandura n’urupfu harimo kurya umunyu mwinshi no kurya ibinyampeke n’imbuto bidahagije, kurusha ibiribwa bifunze birimo ibinure, ibinyobwa birimo isukari n’inyama zanyuze mu nganda.

Isesengura ryagaragaje ko mu mafunguro abantu bashobora kurya ntabagireho ingaruka harimo imbuto, imboga, ibinyampeke, amata n’ibishyimbo. Ryerekanye ko kugabanya ingano y’umunyu n’inyama no kongera imboga n’imbuto bishobora kurinda impfu ku gipimo cyo hejuru.

Ubwo bushakashatsi kandi bugaragaza ko impfu miliyoni 10 mu 2017 zari zifitanye isano n’indwara z’umutima, ibihumbi 913 ziyifitanye na kanseri naho ibihumbi 339 zaturutse kuri diabete. 66% by’ubumuga nabwo bwari bufitanye isano n’imirire itaboneye.

Uzbekistan niyo yagize umubare munini w’abantu bishwe no kurya nabi, ikurikirwa na Afghanistan, ibirwa bya Marshall, Papua New Guinea na Vanuatu mu gihe Israel ariyo ifite umubare muto, ikurikirwa n’u Bufaransa, Espagne n’u Buyapani.

Ibihugu bikomeye biza hafi mu bifite umubare muto w’abishwe no kurya nabi harimo u Bwongereza bwa 23, Ireland ya 24, Suède ya 25 naho Leta Zunze Ubumwe za Amerika ya 43 ziri inyuma y’u Rwanda rwa 41 na Nigeria ya 42.

Ku bihugu nka USA, U Buhinde, Brazil, Pakistan, Nigeria, u Burusiya, Misiri, u Budage, Iran na Turikiya, impfu zishingiye ku kurya nabi zatewe no kurya ibinyampeke byanyujijwe mu nganda bitagifite intungamubiri z’umwimerere.

Nko mu Bushinwa, u Buyapani, Indonesia na Thailand, impfu nyinshi zatewe no kurya amafunguro arimo umunyu.

Umuyobozi w’ishami ry’imirire n’iterambere mu Ishami ry’umuryango w’Abibumbye ryita ku Buzima (OMS), Francesco Branca, yasabye ibihugu ko bikwiye "gusobanukirwa isano iteye inkeke iri hagati y’amafunguro n’ubuzima, bakagira icyo bakora mu gufasha abantu kubona ibiribwa bituma bagira ubuzima bwiza."

Amafunguro amwe n'amwe byagaragaye ko agira ingaruka ku buzima

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza