U Rwanda rugeze he mu kurwanya imirire mibi n’indwara ziterwa nayo?

Yanditswe na Evariste Nsengimana
Kuya 28 Mata 2019 saa 07:07
Yasuwe :
0 0

Hashize igihe ikibazo cy’imirire mibi n’ingaruka zacyo zirimo indwara ziterwa nayo kivugwa mu bihangayikishije Isi n’u Rwanda, ari nako hafatwa ingamba zitandukanye zigamije kukirandura burundu ariko ntibiragera ku kigero cyifuzwa.

Raporo y’Umuryango Mpuzamahanga wita ku bana (UNICEF) ya 2016, yagaragaje ko mu bagera kuri miliyoni 667 bari munsi y’imyaka itanu ku Isi, abasaga miliyoni 159 bangana na 23% bari bafite ikibazo cyo kugwingira; 7,4% bafite icya bwaki; 6,1% bakagira icy’umubyibuho ukabije nka bimwe mu bituruka ku mirire mibi.

Ubushakashatsi bwakozwe n’Ikigo Mpuzamahanga gishinzwe Politiki z’Imirire, bwagaragaje ko mu 2017, abana bari munsi y’imyaka itanu muri Afurika bafite ikibazo cyo kugwingira bari ku gipimo cya 32% ndetse ibihugu byinshi byawo biri ku cya 40%.

Igenzura ryakozwe ku rwego rw’ubuzima bw’abaturage mu Rwanda mu 2015 (DHS), ryerekanye ko kugwingira ku bana bari munsi y’imyaka itanu bigabanuka ku muvuduko wa 1, 3 buri mwaka. Abari bagwingiye bageraga kuri 38% bavuye kuri 51% mu 2005 na 44% mu 2010; abana 9% bafite ibilo bidahagije ugereranije n’imyaka yabo, 2% bafite ibidahagije ugereranije n’uburebure bafite naho 37% bafite amaraso adahagije.

Icyo gihe abantu 7.7% mu Rwanda hose bari bafite umubyibuho ukabije aho Umujyi wa Kigali wari imbere na 9.9%, ugakurikirwa n’Intara y’Amajyaruguru ifite 9.7%. Ibyo bigafatwa nka bimwe mu biterwa n’imirire mibi, cyane cyane kubura ibikungahaye ku byubaka, ibirinda indwara n’ibitera imbaraga umubiri.

Icyegeranyo ku kurwanya inzara n’imirire mibi muri Afurika cya 2016 (The Hunger and Nutrition Commitment Index Africa- HANCI-Africa), cyashingiraga ku ngingo 22 zigaragaza uruhare rwa Leta zisaga 45 mu kurwanya inzara n’imirire mibi binyuze muri politiki zitandukanye bishyiraho mu guhangana nacyo, cyashyize u Rwanda ku mwanya wa karindwi mu bihugu bihagaze neza.

Umwanzuro wa 19 w’Inama y’Igihugu y’Umushyikirano ya Cyenda yabaye mu 2011, wagaruka ku kurandura burundu ikibazo cy’imirire mibi mu bana bari munsi y’imyaka itanu. Icyo gihe cyari kuri 44%.

Ku bana, imirire mibi igira ingaruka ku mikurire yabo no ku y’ubwonko bigatuma badatekereza neza, ntibakore imirimo ijyanye n’imyaka bafite n’ibindi bishobora kubadindiza mu iterambere.

Abana bahuye n’ikibazo cy’imirire mibi, baba bafite amahirwe angana na 10% yo kubura imbaraga mu buzima bwabo, mu gihe imirire mibi ishobora gutuma igihugu gihomba 3% ku musaruro mbumbe w’ibyo cyakoresheje.

Ubushakashatsi bwakozwe na Minisiteri y’Ubuzima ifatanyije n’abandi bafatanyabikorwa, bwagaragaje ko u Rwanda rwatakaje miliyari zirenga 503 mu 2012 kubera ikibazo cy’imirire mibi no kugwingira kw’abana.

Zimwe mu ngamba zafashwe mu rwego rwo guhangana n’iki kibazo harimo gushishikariza Abanyarwanda ko buri rugo rugira umurima w’imboga, kugira isuku n’ibindi ariko ntibiratanga umusaruro uko bikwiye.

Ubwo Minisitiri w’Intebe, Dr. Ngirente Edouard yahaga ibisobanuro mu magambo Inteko Ishinga Amategeko, umutwe wa Sena mu Cyumweru gishize, ku mpamvu ingamba guverinoma yafatiye iki kibazo ariko kikaba kitarangira; Abasenateri bamubwiye ko mu igenzura bakoze mu 2014, ingamba zari zaragifatiwe n’ubu zigihari nta musaruro ufatika zatanze ndetse ko bimwe bishobora kuba byarasubiye inyuma.

Minisitiri w’Intebe yasobanuye ko ingamba Guverinoma yafashe zitanga icyizere. Ati “Icyizere dufite gishingiye ku ngamba zikomeye twafashe. Iya mbere, aho tumenyeye uburemere bw’iki kibazo, inama ya Guverinoma yo mu Ukwakira 2017 yafashe icyemezo cyo gutangiza ikigo mbonezamikurire cy’abana bato, ihurijwemo izindi gahunda zose zita ku mwana atari imirire, harimo imikurire, imirerere ye n’icyerekezo kiganisha ku iterambere rye.”

Izindi ngamba zizashyirwa mu bikorwa binyuze muri icyo kigo harimo kuboneza imikurire n’imirerere y’abana ku mudugudu, gutanga inyunganirabiribwa irimo ibinini by’inzoka na Vitamine bihabwa abana n’abagore, ifu yitwa Ongera, Shisha Kibondo; ubukangurambaga ku minsi 1000 ya mbere y’umwana n’izindi. Muri Gahunda ya Shisha Kibondo, kuva muri Mutarama 2017 kugera icyo gihe mu 2018, hatanzwe toni zisaga ibihumbi 3 548 mu gihugu hose.

Dr Ngirente yavuze ko mu ishyirwa mu bikorwa ry’izo gahunda hazamo imbogamizi zirimo imyumvire y’ababyeyi ikiri hasi mu gutegura indyo yuzuye, amakimbirane mu miryango n’izindi ariko ko Leta igenda ifata ingamba zikomeye zo kuzikuraho, gusa ngo birasaba ubufatanye bw’inzego bireba zose.

Umuyobozi w’Agateganyo w’Ihuriro ry’Imiryango 79 ya Sosiyete Sivile irwanya imirire mibi mu Rwanda, Scaling Up Nutrition (SUN) Alliance; Muhamyankaka Venuste, yabwiye IGIHE ko hari byinshi Leta yakoze bigamije kurandura ikibazo cy’imirire mibi kandi bitanga icyizere ariko ko intego zishyirwaho ziba zigoye kuzigeraho.

Ati “Twiha intego zikomeye cyane tutabanje kureba uko amateka yerekana imibereho ngo duhere aho duteganya ibishoboka.”

Yatanze urugero rw’aho igabanuka ry’ikibazo cy’imirire mibi ryavuye kuri 51% mu 2005 rikagera kuri 44% mu 2010 na 38% mu 2015, avuga ko riri hagati ya 7% na 6%, ko bigoye kugira ngo kizagere kuri 18% muri Kamena 2018 nkuko Minisiteri y’Ubuzima yabyiyemeje.

Muhamyankaka yanagarutse ku kibazo cy’uko imiterere y’iki kibazo igaragazwa mu myaka itanu, asaba ko byaba byiza bigiye bigaragazwa buri mwaka.

Mu bihe bitandukanye, hagiye hashyirwaho gahunda zitandukanye zo kurwanya imirire mibi mu bana ariko ntabwo ziratanga umusaruro uko byifuzwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza